ସାମ୍ବାଦିକ ନବୀନ ଦାଶ ଙ୍କ ଚିକିତ୍ସାଧିନ ଅବସ୍ଥାରେ ଦେହାନ୍ତ,ସବୁ ମହଲରେ ଶୋକ ପ୍ରକାଶ I
ସମ୍ବଲପୁର/ଚିପିଲିମା ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇ ଭୀମସାର ହସ୍ପିଟାଲ ବୁର୍ଲା ରେ ଚିକିତ୍ସିତ ହେଉଥିବା ଅବସ୍ଥାରେ ସାମ୍ବାଦିକ ନବୀନ ଦାଶ (୪୨) ଙ୍କ ଆଜି ଦିବା ଘ. ୧୧. ୪୫ ମି. ସମୟରେ ଚିକିତ୍ସାଧିନ ଅବସ୍ଥାରେ ପରଲୋକ ଘଟିଛି I ନବୀନ ତାଙ୍କ ଅନ୍ତେ ପିତା ବରିଷ୍ଠ ସାମ୍ବାଦିକ ପ୍ରହଲ୍ଲାଦ ଦାଶ, ମାତା ସୁରେଶ୍ୱରୀ ଦାଶ, ପତ୍ନୀ ନିରୁପମା ପଣ୍ଡା ଏବଂ ୧୧ ବର୍ଷ ବୟସ୍କ ଏକ ମାତ୍ର ପୁଅ ବିକାଶକୁ ଛାଡି ଯାଇଛନ୍ତି I ସାମ୍ବାଦିକ ନବୀନ ଦାଶ ସମ୍ବଲପୁରର ସ୍ଥାନୀୟ ନ୍ୟୁଜ୍ ଚ୍ୟାନେଲ “ସମ୍ବଳଭୂମି” ରେ ୧୪ ବର୍ଷରୁ ଅଧିକ ସମୟ ପାଇଁ ରିପୋର୍ଟିଂ କରିଥିଲେ I ଏହା ସହିତ ସାପ୍ତାହିକ ଖବର କାଗଜ “ସମ୍ବଲଭୂମି”ର ରିପୋର୍ଟର, ସ୍ୱାତିକ ଟିଭି ଓଡ଼ିଆ (ୱେବ୍ ଡିଜିଟାଲ୍ ଟିଭି ଚ୍ୟାନେଲ)ରେ ଜିଲ୍ଲା ପ୍ରତିନିଧି, ଡିଜିଟାଲ ମିଡ଼ିଆ “ମହକ୍” ଟିଭିରେ ଜିଲ୍ଲା ବ୍ୟୁରୋ, “ବଡ଼ ଖବର”ରେ ୧ ବର୍ଷ ପାଇଁ ଜିଲ୍ଲା ରିପୋର୍ଟର ଭାବରେ କାର୍ଯ୍ୟ କରିଥିଲେ I ଏହା ସହିତ “ଓଡ଼ିଶା ଭାସ୍କର” ରେ ଜିଲ୍ଲା ରିପୋର୍ଟର ଭାବରେ କାର୍ଯ୍ୟ କରିଥିଲେ I ମୃତ୍ୟୁ ପୂର୍ବରୁ ସେ ଡିଜିଟାଲ ଟିଭି ‘ଖବର ଓଡ଼ିଶା’ରେ ଜିଲ୍ଲା ରିପୋର୍ଟର ଭାବରେ କାର୍ଯ୍ୟ କରୁଥିଲେ I ଏହା ସହିତ କ୍ୟାମେରା, ସମ୍ପାଦନା ଏବଂ କମ୍ପ୍ୟୁଟରରେ ନବୀନଙ୍କ ବିଶେଷ ଅଭିଜ୍ଞତା ରହିଥିଲା I ସୂଚନା ଯୋଗ୍ୟ ଯେ ନବୀନ ଗତ ୧୯ ତାରିଖ ଶନିବାର ଦିନ ମୁକ୍ତେଶ୍ଵର ମନ୍ଦିର କିମ୍ବଦନ୍ତୀକୁ ନେଇ ଷ୍ଟୋରୀ କରିବାକୁ ଯାଇ ଫେରୁଥିବା ସମୟରେ ଜମନକିରା ଥାନା ଗୌଡ଼ପାଲି ଫାଣ୍ଡି ଅନ୍ତର୍ଗତ ଏନଏଚ ୫୩ ଗୌଡ଼ପାଲି – କୁଲୁଣ୍ଡି ମଝି ପତରପେଣ୍ଡି ଛକରେ ସନ୍ଧ୍ୟା ପ୍ରାୟ ୫ ଘଣ୍ଟା ସମୟରେ ବିପରୀତ ଦିଗରୁ ଆସୁଥିବା ଏକ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା I ଫଳରେ ଘଟଣାସ୍ଥଳରେ ଉଭୟ ବାଇକରେ ବସିଥିବା ୪ ଜଣ ଗୁରୁତର ଭାବେ ଆହତ ହୋଇଥିଲେ I ଏହି ଦୁର୍ଘଟଣାରେ ଜମନକିରା ନିକଟସ୍ଥ ମୁକ୍ତେଶ୍ଵର ଶିବ ମନ୍ଦିରକୁ ସମ୍ବାଦ ସଂଗ୍ରହ ପାଇଁ ଯାଇଥିବା ସମ୍ବଲପୁରର ସାମ୍ବାଦିକ ନବୀନ ଦାଶ ଏବଂ ତାଙ୍କ ପତ୍ନୀ ନିରୁପମା ପଣ୍ଡା ଓ ବରଗଡ ଜ଼ିଲ୍ଲା ଅମ୍ଭାଭୋନା ବ୍ଲକର ଉତ୍ତମ ଗାଆଁର ଭରତ ଭୁଏଙ୍କ ପୁଅ ସାନ୍ତାନୁ ଭୁଏ ଓ ଦୟାନିଧି ବୁଡେକଙ୍କ ପୁଅ ସନ୍ତୋଷ ବୁଡେକ ଆହତ ହୋଇଥିଲେ I ଏହି ଦୁର୍ଘଟଣାରେ ସାମ୍ବାଦିକ ନବୀନ ଦାଶ ଓ ସନ୍ତୋଷ ବୁଡ଼େକ ଅତ୍ୟନ୍ତ ଗୁରୁତର ହୋଇଥିଲେ I ଏନଏଚଏଆଇର ଆମ୍ବୁଲାନ୍ସ ଯୋଗେ ସମସ୍ତଙ୍କୁ ଚିକିତ୍ସା ପାଇଁ ବୁର୍ଲା ଡ଼ାକ୍ତରଖାନା ପଠାଯାଇଥିଲା I ଦୁର୍ଘଟଣାରେ ଗୁରୁତର ଆହତ ଥିବା ସନ୍ତୋଷ ବୁଡ଼େକଙ୍କ ଗତ ରବିବାର ଚିକିତ୍ସାଧିନ ଅବସ୍ଥାରେ ମୃତ୍ୟୁ ହୋଇଥିବା ବେଳେ ଗୁରୁତର ଆହତ ହୋଇ ଭୀମସାର ଆଇସିୟୁ ରେ ଚିକିତ୍ସିତ ହେଉଥିବା ସାମ୍ବାଦିକ ନବୀନ ଦାଶ ଙ୍କ ଚିକିତ୍ସାଧୀନ ଅବସ୍ଥାରେ ଆଜି ପରଲୋକ ହୋଇଛି I ନବୀନ ଦାଶ ଙ୍କ ପରଲୋକରେ ସାମ୍ବାଦିକ ମହଲରେ ଗଭୀର ଶୋକ ପ୍ରକାଶ ପାଇଛି I କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରେଢ଼ାଖୋଲ ବିଧାୟକ ପ୍ରସନ୍ନ ଆଚାର୍ଯ୍ୟ, ସମ୍ବଲପୁର ବିଧାୟକ ଜୟ ନାରାୟଣ ମିଶ୍ର, ପୂର୍ବତନ ବିଧାୟକ ନାଉରି ନାୟକ ଗଭୀର ଶୋକ ପ୍ରକାଶ କରିଛନ୍ତି I ନବୀନ ଦାଶଙ୍କ ମୃତ୍ୟୁ ଶଯ୍ୟା ନିକଟରେ ଓଡିଶା ସାମ୍ବାଦିକ ସଂଘ ପ୍ରାନ୍ତୀୟ ସମ୍ପାଦକ ରମାକାନ୍ତ ବିଶ୍ୱାଳ, ରାଜ୍ୟ ଉପ ସଭାପତି ସୁଶାନ୍ତ ମହାପାତ୍ର, ଜ଼ିଲ୍ଲା ସଭାପତି ହିମାଂଶୁ ମିଶ୍ର, କାର୍ଯ୍ୟକାରୀ ସଭାପତି ସୁକାନ୍ତ କର,ବରିଷ୍ଠ ସାମ୍ବାଦିକ ରତ୍ନାକର ଭୋଇ, ଗାର୍ଗୀ ଶତପଥି, ସରୋଜ ସାହୁ, ବିରାଜ ମିଶ୍ର, ଅମଳେନ୍ଦୁ ନାୟକ, ଡ଼.ରାଜାରାମ ଷଡ଼ଙ୍ଗୀ,ପ୍ରଦୀପ କୁମାର ନାୟକ, ସତ୍ୟଜିତ ମହାପାତ୍ର, ସରୋଜ ସେଠ୍, ମଳୟ ଭୋଇ, ମାନସ ସାହୁ ପ୍ରମୁଖ ଉପସ୍ଥିତ ରହିଥିଲେ I ମର ଶରୀର କୁ କୁଳୁଥକାନି ବାସଭବନ କୁ ଅଣାଯାଇଥିବା ବେଳେ ବନ୍ଧୁ ପରିଜନ ଉପସ୍ଥିତ ରହି ଶେଷ ଦର୍ଶନ କରିଥିଲେ I ସନ୍ଧ୍ୟା ରେ ସ୍ଥାନୀୟ ରାଜଘାଟ ରେ ଶେଷକୃତ୍ୟ ସମ୍ପର୍ଣ୍ଣ ହୋଇଥିଲା I ସ୍ଥାନୀୟ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା କେନ୍ଦ୍ର ରେ ପଞ୍ଚମ ଶ୍ରେଣୀ ରେ ପଢ଼ୁଥିବା ଏକ ମାତ୍ର ପୁଅ ବିକାଶ ମୁଖାଗ୍ନି ଦେଇଥିଲେ I
