ସିରିଜ୍ ନିର୍ଣ୍ଣାୟକ ମ୍ୟାଚ୍ରେ ଟସ୍ ଜିତି ଭାରତ କରିବ ବୋଲିଂ
ନୂଆଦିଲ୍ଲୀ,୬|୧୨: ଟସ୍ ଜିତିଛି ଭାରତ | ଟସ୍ ଜିତିବା ପରେ ଭାରତୀୟ ଦଳ ବୋଲିଂ ନିଷ୍ପତ୍ତି ନେଇଥିଲା ବେଳେ ଦକ୍ଷିଣ ଆଫ୍ରିକାର ପ୍ରଥମେ ବ୍ୟାଟିଂ କରିବାର ରହିଛି | ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଆରମ୍ଭ ହୋଇଛି ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଅନ୍ତିମ ମ୍ୟାଚ୍ । ଏହି ମ୍ୟାଚ୍ ବିଶାଖାପାଟଣାର ଡକ୍ଟର ୱାଇଏସ୍ ରାଜଶେଖର ରେଡ୍ଡୀ ଏସିଏ-ବିଡିସିଏ କ୍ରିକେଟ ଷ୍ଟାଡିୟମରେ ଆଜି ଖେଳାଯାଉଛି | ଏହି ମ୍ୟାଚ୍ ରେ କେ ଏଲ୍ ରାହୁଲ ଅଧିନାୟକ ଥିବା ବେଳେ ଟେମ୍ବା ବାବୁମା ଦକ୍ଷିଣ ଆଫ୍ରିକା ଟିମ୍ ର ଅଧିନାୟକ ରହିଛନ୍ତି |
ଦିନିକିଆ ସିରିଜର ପ୍ରଥମ ମ୍ୟାଚ୍ ରାଞ୍ଚିରେ ଖେଳାଯାଇଥିଲା । ଏବଂ ଏହି ମ୍ୟାଚ୍ରେ ଭାରତ ଦଳ ବିଜୟ ହାସଲ କରିଥିଲା । ରାୟପୁରରେ ଏହି ସିରିଜର ଦ୍ଵିତୀୟ ମ୍ୟାଚ୍ ଖେଳାଯାଇଥିଲା ବେଳେ ସେହି ମ୍ୟାଚ୍ରେ ଦକ୍ଷିଣ ଆଫ୍ରିକା ବିଜୟ ଲାଭ କରିଥିଲା | ଯାହାଫଳରେ ସିରିଜ୍ ୧-୧ରେ ବରାବର ହୋଇଛି । ଏବେ ବିଶାଖାପାଟଣାରେ ଦିନିକିଆ ସିରିଜର ଅନ୍ତିମ ମ୍ୟାଚ୍ କେଉଁ ଦଳ ନିଜର କରିବ ତାକୁ ରହିଛି ଅପେକ୍ଷା | ଆଜି ଖେଳ ଦିନ ୧.୩୦ରୁ ଆରମ୍ଭ ହେବ |
ଏହି ଦିନିକିଆ ସିରିଜ୍ରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଉପରେ ସମସ୍ତଙ୍କ ନଜର ରହିବ । କିନ୍ତୁ ଭାରତର ଯୁବ ଖେଳାଳିମାନଙ୍କ ଉପରେ ମଧ୍ୟ ଚାପ ରହିବ । ଦ୍ଵିତୀୟ ମ୍ୟାଚ ଦକ୍ଷିଣ ଆଫ୍ରିକାଠୁ ହାରିବା ପରେ ଭାରତୀୟ ଦଳ ଉପରେ ଜିତିବାକୁ ନେଇ ବହୁତ ଚାପ ରହିଛି | ତେବେ ଏହି ମ୍ୟାଚକୁ ନେଇ ଭାରତୀୟ ଦଳରେ ଏକ ପରିବର୍ତ୍ତନ କରାଯାଇଛି। ଓ୍ବାସିଂଟନ୍ ସୁନ୍ଦରଙ୍କ ସ୍ଥାନରେ ତିଳକ ବର୍ମାଙ୍କୁ ସୁଯୋଗ ମିଳିଛି । ଏବଂ ଅନ୍ୟପଟେ ଆଫ୍ରିକା ଦଳରେ ଦୁଇଟି ପରିବର୍ତ୍ତନ କରାଯାଇଛି। ଆଘାତ ଯୋଗୁଁ ନାନ୍ଦ୍ରେ ବର୍ଗର ଏବଂ ଟୋନି ଡି ଜୋରଜିଙ୍କ ସ୍ଥାନରେ ଦ୍ରୁତ ବୋଲର ଓଟନିଏଲ୍ ବାର୍ଟମ୍ୟାନ୍ ଏବଂ ବ୍ୟାଟ୍ସମ୍ୟାନ୍ ରିଆନ୍ ରିକେଲଟନ୍ଙ୍କୁ ଯଥାକ୍ରମେ ସେମାନଙ୍କ ସ୍ଥାନରେ ସୁଯୋଗ ମିଳିଛି।
