ଆଜିଠାରୁ ଟ୍ରେନରେ ଯାତ୍ରା ହେଲା ମହଙ୍ଗା…
ନୂଆଦିଲ୍ଲୀ: ଆଜିଠାରୁ ଟ୍ରେନରେ ଯାତ୍ରା ମହଙ୍ଗା ହୋଇଯାଇଛି। ଗୁରୁବାର ରେଳ ମନ୍ତ୍ରଣାଳୟ ଆନୁଷ୍ଠାନିକ ଭାବରେ ଯାତ୍ରୀବାହୀ ଟ୍ରେନ ଭଡା ବୃଦ୍ଧି ଘୋଷଣା କରିଛି। ଯାହା ଆଜିଠାରୁ ଲାଗୁ ହୋଇଛି।
ଦୂରଗାମୀ ଯାତ୍ରୀଙ୍କ ପାଇଁ ଭଡା ସାମାନ୍ୟ ବୃଦ୍ଧି କରାଯାଇଛି। ୨୧୫ କିଲୋମିଟରରୁ ଅଧିକ ଦୂରତା ପାଇଁ ସାଧାରଣ ଶ୍ରେଣୀରେ ଯାତ୍ରା କରିବା ପାଇଁ ପ୍ରତି କିଲୋମିଟରରେ ୧ ପଇସା ଦେବାକୁ ପଡିବ। ତଥାପି ଲୋକାଲ ଟ୍ରେନ ଏବଂ କମ ଦୂରତା ଯାତ୍ରା କରୁଥିବା ଯାତ୍ରୀଙ୍କ ପାଇଁ ଭଡାରେ କୌଣସି ବୃଦ୍ଧି ହୋଇନାହିଁ। ଏହି ପରିବର୍ତ୍ତନ ଦ୍ୱାରା ଚଳିତ ଆର୍ଥିକ ବର୍ଷରେ ରେଳବାଇ ପାଇଁ ପ୍ରାୟ ୬୦୦ କୋଟି ଅତିରିକ୍ତ ରାଜସ୍ୱ ମିଳିବ ବୋଲି ଆଶା କରାଯାଉଛି।
ରେଳବାଇ ଅନୁଯାୟୀ, ମେଲ୍ ଏବଂ ଏକ୍ସପ୍ରେସ୍ ଟ୍ରେନର ନନ୍-ଏସି କୋଚ୍ ଏବଂ ସମସ୍ତ ଏସି ଶ୍ରେଣୀ ପାଇଁ ଭଡା ପ୍ରତି କିଲୋମିଟରରେ ୨ ପଇସା ବୃଦ୍ଧି କରାଯାଇଛି। ଏହାର ଅର୍ଥ ହେଉଛି ୫୦୦ କିଲୋମିଟରର ନନ୍-ଏସି ଯାତ୍ରା ପାଇଁ ଭଡା କେବଳ ୧୦ ଟଙ୍କା ବୃଦ୍ଧି ପାଇବ। ନୂତନ ବ୍ୟବସ୍ଥା ଅନୁଯାୟୀ, ସ୍ଥାନୀୟ ଟ୍ରେନ ଭଡା ଏବଂ ମାସିକ ସିଜିନ୍ ଟିକେଟରେ କୌଣସି ବୃଦ୍ଧି ହେବ ନାହିଁ। ସାଧାରଣ ଶ୍ରେଣୀରେ ୨୧୫ କିଲୋମିଟର ପର୍ଯ୍ୟନ୍ତ ଯାତ୍ରା କରୁଥିବା ଯାତ୍ରୀମାନଙ୍କୁ ମଧ୍ୟ ସମାନ ଭଡା ଦେବାକୁ ପଡିବ। ରେଳବାଇ ଅଧିକାରୀମାନେ କହିଛନ୍ତି ଯେ ଗତ ଦଶନ୍ଧି ମଧ୍ୟରେ ରେଳ ନେଟୱାର୍କ ଏବଂ କାର୍ଯ୍ୟ ଯଥେଷ୍ଟ ବୃଦ୍ଧି ପାଇଛି। ଏହାକୁ ଦୃଷ୍ଟିରେ ରଖି ଭଡା ବୃଦ୍ଧି କରାଯାଇଛି। ରେଳବାଇ କାର୍ଯ୍ୟ ପାଇଁ ଚାହିଦା ବୃଦ୍ଧି ପାଇଛି ଏବଂ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ କର୍ମଚାରୀ ନିଯୁକ୍ତି ବୃଦ୍ଧି କରାଯାଇଛି। ଯାହା ଫଳରେ ଖର୍ଚ୍ଚ ବୃଦ୍ଧି ପାଇଛି।
କର୍ମଚାରୀ ଖର୍ଚ୍ଚ ୧.୧୫ ଲକ୍ଷ କୋଟିକୁ ବୃଦ୍ଧି ପାଇଛି। ଯେତେବେଳେ କି ପେନସନ ଖର୍ଚ୍ଚ ୬୦,୦୦୦ କୋଟିରେ ପହଞ୍ଚିଛି। ୨୦୨୪-୨୫ ପାଇଁ ମୋଟ ପରିଚାଳନା ଖର୍ଚ୍ଚ ୨.୬୩ ଲକ୍ଷ କୋଟି ହେବ ବୋଲି ଆକଳନ କରାଯାଇଛି।
