UP Rajya Sabha Election: ତୃତୀୟ ପ୍ରାର୍ଥୀ ଦେଲେନି ଅଖିଳେଶ, କ୍ରସ୍ ଭୋଟିଂ ଭୟ ନା ୨୦୨୭ ନିର୍ବାଚନ ଉପରେ ନଜର ନେଇ ଆରମ୍ଭ ହେଲା ଚର୍ଚ୍ଚା
ଉତ୍ତରପ୍ରଦେଶ: ଉତ୍ତରପ୍ରଦେଶରେ ଆସନ୍ତା ୧୬ ଅକ୍ଟୋବରରେ ୧୦ଟି ରାଜ୍ୟସଭା ଆସନ ପାଇଁ ନିର୍ବାଚନ ହେବାକୁ ଥିବା ବେଳେ ସମାଜବାଦୀ ପାର୍ଟି ତୃତୀୟ ପ୍ରାର୍ଥୀ ଦେବା ଯୋଜନାରୁ ଓହରିଛି। ପ୍ରଥମେ ଏସ୍ପି ତୃତୀୟ ପ୍ରାର୍ଥୀ ଦେଇ ମୁକାବିଲା କରିବା ନେଇ ଚର୍ଚ୍ଚା ହେଉଥିଲା। କିନ୍ତୁ ଅକ୍ଟୋବର ୬ରେ ନାମାଙ୍କନ ଦାଖଲର ଶେଷ ଦିନରେ ବିଜେପି ୮ ଜଣ ଏବଂ ଏସ୍ପି ୨ ଜଣ ପ୍ରାର୍ଥୀ ଦେଇଛନ୍ତି। ଫଳରେ ମୋଟ ୧୦ଟି ଆସନ ପାଇଁ ୧୦ ଜଣ ପ୍ରାର୍ଥୀ ରହିଥିବାରୁ ନିର୍ବାଚନ ବିନା ପ୍ରତିଦ୍ୱନ୍ଦ୍ୱିତାରେ ଶେଷ ହେବାର ରାସ୍ତା ସ୍ପଷ୍ଟ ହୋଇଛି।
ଅଖିଳେଶ ଯାଦବଙ୍କ ଏହି ନିଷ୍ପତ୍ତି ପଛରେ କ୍ରସ୍ ଭୋଟିଂକୁ ନେଇ ଚିନ୍ତା ଏକ ବଡ଼ କାରଣ ବୋଲି ରାଜନୈତିକ ବିଶ୍ଳେଷଣରେ କୁହାଯାଉଛି। ୩୯୬ ସଦସ୍ୟ ବିଶିଷ୍ଟ ବର୍ତ୍ତମାନର ଉତ୍ତରପ୍ରଦେଶ ବିଧାନସଭାରେ ପ୍ରତ୍ୟେକ ରାଜ୍ୟସଭା ଆସନ ପାଇଁ ୩୭ଟି ପ୍ରଥମ ପସନ୍ଦ ଭୋଟ ଆବଶ୍ୟକ। ଏସ୍ପି ପାଖରେ ଦୁଇଟି ଆସନ ଜିତିବା ପାଇଁ ଆବଶ୍ୟକ ସଂଖ୍ୟା ଥିବାବେଳେ ତୃତୀୟ ପ୍ରାର୍ଥୀଙ୍କୁ ଜିତାଇବା ପାଇଁ ଅଧିକ ଭୋଟ ଆବଶ୍ୟକ ହୋଇଥାନ୍ତା। ଏଭଳି ସ୍ଥିତିରେ କିଛି ବିଧାୟକଙ୍କ କ୍ରସ୍ ଭୋଟିଂ ହେଲେ ଦଳର ଆଭ୍ୟନ୍ତରୀଣ ସମୀକରଣ ସାମ୍ନାକୁ ଆସିପାରିଥାନ୍ତା ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।
ଏହି ନିଷ୍ପତ୍ତିକୁ ୨୦୨୭ ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଦଳୀୟ ଏକତା ଓ ସଂଗଠନକୁ ଗୁରୁତ୍ୱ ଦେବାର ରଣନୀତି ଭାବେ ମଧ୍ୟ ଦେଖାଯାଉଛି। ୨୦୨୪ର ରାଜ୍ୟସଭା ନିର୍ବାଚନରେ ବିଜେପି ଅତିରିକ୍ତ ପ୍ରାର୍ଥୀ ଦେଇ ମୁକାବିଲା ସୃଷ୍ଟି କରିଥିଲା ଏବଂ କ୍ରସ୍ ଭୋଟିଂ ପରେ ଏସ୍ପିର ତିନି ଆସନ ବଦଳରେ ଦୁଇ ପ୍ରାର୍ଥୀ ଜିତିଥିଲେ। ଏଥର ତୃତୀୟ ପ୍ରାର୍ଥୀ ନ ଦେଇ ଏସ୍ପି ଏଭଳି ଅନିଶ୍ଚିତ ମୁକାବିଲାକୁ ଏଡ଼ାଇବା ସହ ୨୦୨୭ ନିର୍ବାଚନ ପାଇଁ ଦଳୀୟ ସମୀକରଣ ଉପରେ ଧ୍ୟାନ ଦେବାକୁ ଚାହୁଁଥିବା ରାଜନୈତିକ ବିଶ୍ଳେଷକମାନେ କହୁଛନ୍ତି।
