iPhone 18 Pro କିଣିବା ହୋଇପାରେ ଅଧିକ ମହଙ୍ଗା! ୧୦%ରୁ ୨୦% ପର୍ଯ୍ୟନ୍ତ ବଢ଼ିପାରେ ଦାମ
ଆପଲ୍ର ଆଗାମୀ iPhone 18 Pro ଓ iPhone 18 Pro Max କିଣିବାକୁ ଚାହୁଁଥିବା ଗ୍ରାହକଙ୍କ ପାଇଁ ବଡ଼ ଝଟକା ଆସିପାରେ। ବିଭିନ୍ନ ଲିକ୍ ରିପୋର୍ଟ ଓ ଟେକ୍ ବିଶେଷଜ୍ଞଙ୍କ ସୂଚନା ଅନୁସାରେ, ଏଥର ଆପଲ୍ ନିଜର ପ୍ରିମିୟମ୍ iPhone ମଡେଲ୍ଗୁଡ଼ିକର ଦାମରେ ୧୦%ରୁ ୨୦% ପର୍ଯ୍ୟନ୍ତ ବୃଦ୍ଧି କରିପାରେ। ଆପଲ୍ ସିଇଓ ଟିମ୍ କୁକ୍ ସମ୍ପ୍ରତି କମ୍ପାନୀର ଅନ୍ୟାନ୍ୟ ପ୍ରଡକ୍ଟର ମୂଲ୍ୟ ବଢ଼ାଇଥିବାରୁ iPhone 18 Pro ସିରିଜ୍ରେ ମଧ୍ୟ ସମାନ ଧରଣର ମୂଲ୍ୟ ବୃଦ୍ଧି ହେବାର ସମ୍ଭାବନା ଆହୁରି ଜୋରଦାର ହୋଇଛି।
ପ୍ରସିଦ୍ଧ ଚୀନ୍ ଟେକ୍ ଟିପ୍ଷ୍ଟର Digital Chat Stationଙ୍କ ମତରେ, iPhone 18 Proର ମୂଲ୍ୟ ପୂର୍ବ ମଡେଲ୍ ତୁଳନାରେ ପ୍ରାୟ ୧୧% ବଢ଼ିପାରେ। ଅନ୍ୟପକ୍ଷରେ Instant Digital ଓ Fixed Focus Digital ଦାବି କରିଛନ୍ତି ଯେ Pro Max ମଡେଲ୍ର ଦାମ ୧୫%ରୁ ୨୦% ପର୍ଯ୍ୟନ୍ତ ବଢ଼ିପାରେ। କିଛି ଆନ୍ତର୍ଜାତୀୟ ରିପୋର୍ଟରେ ତ iPhone 18 Proର ବେସ୍ ଭାରିଆଣ୍ଟର ମୂଲ୍ୟ ୧,୩୯୯ ଡଲାର ପର୍ଯ୍ୟନ୍ତ ହୋଇପାରେ ବୋଲି ଆକଳନ କରାଯାଇଛି, ଯାହା ଗତ ବର୍ଷ ତୁଳନାରେ ପ୍ରାୟ ୨୭% ଅଧିକ।
ତେବେ ଆପଲ୍ ପକ୍ଷରୁ ଏପର୍ଯ୍ୟନ୍ତ iPhone 18 Pro ସିରିଜ୍ର ଦାମ କିମ୍ବା ଲଞ୍ଚ୍ ସମ୍ପର୍କରେ କୌଣସି ଅଧିକୃତ ସୂଚନା ଦିଆଯାଇନାହିଁ। ତେଣୁ ବର୍ତ୍ତମାନର ସମସ୍ତ ସୂଚନା କେବଳ ଲିକ୍ ଓ ଅନୁମାନ ଉପରେ ଆଧାରିତ। ତଥାପି ନିକଟରେ MacBook, iPad Pro, Vision Pro ଓ Apple TV ସମେତ ଅନେକ ପ୍ରଡକ୍ଟର ଦାମ ବୃଦ୍ଧି ପାଇଥିବାରୁ iPhone 18 Pro ସିରିଜ୍ରେ ମଧ୍ୟ ବଡ଼ ମୂଲ୍ୟ ବୃଦ୍ଧି ହେବାର ସମ୍ଭାବନାକୁ ଟେକ୍ ବଜାର ଗୁରୁତ୍ୱର ସହ ଦେଖୁଛି।
