NEET ପ୍ରସଙ୍ଗକୁ ନେଇ ଧର୍ମେନ୍ଦ୍ର ପ୍ରଧାନଙ୍କ ଫେସବୁକ୍ ପୋଷ୍ଟରେ ୫୮ ହଜାର ରିଆକ୍ସନ୍ ମଧ୍ୟରୁ ୩୬ ହଜାରରୁ ଅଧିକ ‘😂’ (ହସ) ରିଆକ୍ସନ୍’
NEET ପେପର ଲିକ୍ ପ୍ରସଙ୍ଗକୁ ନେଇ ବିରୋଧୀଙ୍କ ଆନ୍ଦୋଳନ ମଧ୍ୟରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏକ ଦୀର୍ଘ ଫେସବୁକ୍ ପୋଷ୍ଟ କରି କଂଗ୍ରେସ ଓ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ କଡ଼ା ସମାଲୋଚନା କରିଛନ୍ତି। ସେ ଅଭିଯୋଗ କରିଛନ୍ତି ଯେ, କଂଗ୍ରେସ ଛାତ୍ରଛାତ୍ରୀଙ୍କୁ ରାଜନୈତିକ ହାତିଆର ଭାବେ ବ୍ୟବହାର କରୁଛି ଏବଂ ସଂସଦରେ ଆଲୋଚନା ପରିବର୍ତ୍ତେ ରାଜନୈତିକ ନାଟକକୁ ଅଧିକ ଗୁରୁତ୍ୱ ଦେଉଛି। ପୋଷ୍ଟରେ ସେ କହିଛନ୍ତି, ସରକାର NEET ପ୍ରସଙ୍ଗରେ ସଂସଦରେ ବିସ୍ତୃତ ଆଲୋଚନା ପାଇଁ ପ୍ରସ୍ତୁତ ଥିଲେ ମଧ୍ୟ କଂଗ୍ରେସ ପ୍ରଧାନମନ୍ତ୍ରୀଙ୍କ ବାସଭବନ ବାହାରେ ଧାରଣା ଦେଇ କେବଳ ରାଜନୈତିକ ଶିରୋନାମା ସୃଷ୍ଟି କରିବାକୁ ଚାହୁଁଛି। ସେ ଆହୁରି କହିଛନ୍ତି, ଛାତ୍ରଛାତ୍ରୀଙ୍କୁ ସ୍ଲୋଗାନ୍ ନୁହେଁ, ବରଂ ସମାଧାନ, ସଂସ୍କାର ଓ ଜବାବଦେହିତା ଦରକାର।
ହେଲେ ଧର୍ମେନ୍ଦ୍ର ପ୍ରଧାନଙ୍କ ଏହି ପୋଷ୍ଟକୁ ମିଳିଥିବା ସୋସିଆଲ ମିଡିଆ ପ୍ରତିକ୍ରିୟା ଏବେ ଚର୍ଚ୍ଚାର ବିଷୟ ପାଲଟିଛି। ପୋଷ୍ଟଟିରେ ପ୍ରାୟ ୫୮ ହଜାର ରିଆକ୍ସନ୍ ମଧ୍ୟରୁ ୩୬ ହଜାରରୁ ଅଧିକ ‘😂’ (ହସ) ରିଆକ୍ସନ୍, ୧୮ ହଜାର ‘ଲାଇକ୍’ ଏବଂ ୨.୨ ହଜାର ‘ଆଙ୍ଗ୍ରି’ ରିଆକ୍ସନ୍ ମିଳିଛି। ହସ ଇମୋଜି ସଂଖ୍ୟା ସର୍ବାଧିକ ଥିବାରୁ ଅନେକ ସୋସିଆଲ ମିଡିଆ ବ୍ୟବହାରକାରୀ ଏହି ବ୍ୟାଖ୍ୟାକୁ ବ୍ୟଙ୍ଗ କିମ୍ବା ସନ୍ଦେହର ଦୃଷ୍ଟିରେ ଦେଖୁଥିବା ନେଇ ଆଲୋଚନା ଜୋର ଧରିଛି। ସେହିପରି ଅନ୍ୟପକ୍ଷରେ ଅଳ୍ପ ସଂଖ୍ୟକ ‘ଲାଇକ୍’ ରିଆକ୍ସନ୍ ମଧ୍ୟ ଶିକ୍ଷା ମନ୍ତ୍ରୀଙ୍କ ମତକୁ ସମର୍ଥନ କରୁଥିବା ବର୍ଗ ରହିଥିବାର ସଙ୍କେତ ଦେଉଛି।
ସୋସିଆଲ ମିଡିଆର ରିଆକ୍ସନ୍ ଲୋକଙ୍କ ତତ୍କାଳିକ ମନୋଭାବର ଏକ ଝଲକ ଦେଇଥାଏ, କିନ୍ତୁ ଏହାକୁ ସମଗ୍ର ଜନମତର ପ୍ରତିନିଧିତ୍ୱ ବୋଲି କୁହାଯାଇପାରିବ ନାହିଁ। ତଥାପି, ଏଭଳି ପ୍ରତିକ୍ରିୟାରୁ ଏତିକି ସ୍ପଷ୍ଟ ହେଉଛି ଯେ NEET ପେପର ଲିକ୍ ପ୍ରସଙ୍ଗରେ ସରକାରଙ୍କ ଆଭିମୁଖ୍ୟ ଓ ରାଜନୈତିକ ଆରୋପ-ପ୍ରତ୍ୟାରୋପକୁ ନେଇ ସୋସିଆଲ ମିଡିଆରେ ତୀବ୍ର ଚର୍ଚ୍ଚା ଓ ମତଭେଦ ଜାରି ରହିଛି।
