ସଂସଦରେ ହଙ୍ଗାମାକୁ ନେଇ ବର୍ଷିଲେ ଅପରାଜିତା: କହିଲେ- ନଷ୍ଟ ହେଲା ୨୧୬ କୋଟି, ବିଲ୍ ଉପରେ ହୋଇନି ପର୍ଯ୍ୟାପ୍ତ ଚର୍ଚ୍ଚା
ନୂଆଦିଲ୍ଲୀ: ସଂସଦରେ ହଙ୍ଗାମା ଓ କାର୍ଯ୍ୟଦିବସ ନଷ୍ଟକୁ ନେଇ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ବଡ଼ ବୟାନ ଦେଇଛନ୍ତି । ସଂସଦର ମୂଲ୍ୟବାନ ସମୟ ନଷ୍ଟ ହେବା ଯୋଗୁଁ ପ୍ରାୟ ୨୧୬ କୋଟି ଟଙ୍କାର ଆର୍ଥିକ କ୍ଷତି ହୋଇଥିବା ସେ କହିଛନ୍ତି। ସଂସଦ ଗଣତନ୍ତ୍ରର ସର୍ବୋଚ୍ଚ ମଞ୍ଚ ହୋଇଥିବାରୁ ଦେଶର ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଓ ବିଭିନ୍ନ ବିଲ୍ ଉପରେ ସାଂସଦମାନଙ୍କ ମଧ୍ୟରେ ବିସ୍ତୃତ ଆଲୋଚନା ହେବା ଆବଶ୍ୟକ ବୋଲି ସେ କହିଛନ୍ତି।
ଅପରାଜିତାଙ୍କ ଅଭିଯୋଗ ଅନୁସାରେ, ବାରମ୍ବାର ହଙ୍ଗାମା ଓ ବିରୋଧ ଯୋଗୁଁ ସଂସଦର ଅନେକ ମୂଲ୍ୟବାନ ସମୟ ନଷ୍ଟ ହୋଇଛି। ଲୋକସଭାରେ ୧୨ଟି ବିଲ୍ ପାସ୍ ହୋଇଥିଲେ ମଧ୍ୟ ସେଗୁଡ଼ିକ ଉପରେ ଆଶାନୁରୂପ ଚର୍ଚ୍ଚା ଓ ଆଲୋଚନା ହୋଇପାରିନାହିଁ ବୋଲି ସେ ମତ ଦେଇଛନ୍ତି। ସଂସଦରେ ହଙ୍ଗାମା ହେଲେ କେବଳ ସାଂସଦଙ୍କ ସମୟ ନୁହେଁ, ଟିକସଦାତାଙ୍କ ଟଙ୍କା ମଧ୍ୟ ପ୍ରଭାବିତ ହୁଏ ବୋଲି ସେ କହିଛନ୍ତି।
ସେହିପରି, ସଂସଦରେ ବିଲ୍ ଆସିବା ପରେ ସରକାରୀ ପକ୍ଷ ନିଜ ଯୁକ୍ତି ରଖିବା ସହ ବିରୋଧୀ ଦଳ ମଧ୍ୟ ଏହାର ବିଭିନ୍ନ ଦିଗ ଉପରେ ପ୍ରଶ୍ନ ଉଠାଇବା ଉଚିତ ବୋଲି ଅପରାଜିତା କହିଛନ୍ତି। କିନ୍ତୁ ହଙ୍ଗାମା ଯୋଗୁଁ ଯଦି ଆଲୋଚନାର ସୁଯୋଗ ହିଁ ନମିଳେ, ତେବେ ଏହା ଗଣତାନ୍ତ୍ରିକ ପ୍ରକ୍ରିୟା ପାଇଁ ଚିନ୍ତାର ବିଷୟ। ୨୧୬ କୋଟି ଟଙ୍କାର କ୍ଷତି ପାଇଁ ଦାୟୀ କିଏ ଏବଂ ପାସ୍ ହୋଇଥିବା ବିଲ୍ଗୁଡ଼ିକ ଉପରେ ପର୍ଯ୍ୟାପ୍ତ ଚର୍ଚ୍ଚା କାହିଁକି ହୋଇପାରିଲା ନାହିଁ, ତାହାର ଜବାବ ମିଳିବା ଦରକାର ବୋଲି ସାଂସଦ କହିଛନ୍ତି।
