Orangutan Smuggling Case: Odisha STFର ତଦନ୍ତ ଜୋରଦାର, ଏଯାଏଁ କାହାରି Arrest ହୋଇନାହିଁ
ଓଡ଼ିଶା ଉପକୂଳକୁ ୫ଟି ଶିଶୁ ଓରାଙ୍ଗଉଟାନ୍ଙ୍କୁ ଚୋରାଚାଲାଣ ଘଟଣାର ତଦନ୍ତ କରୁଥିବା ଏସ୍ଟିଏଫ୍ ଏଯାଏଁ କାହାରିକୁ ଗିରଫ କରିନାହିଁ। ବାଲେଶ୍ୱର ଭୋଗରାଇ ବିଚିତ୍ରାପୁର ଗାଁ ନିକଟ କାଶୁଆରିନା ଜଙ୍ଗଲରୁ ସୋମବାର ରାତିରେ ଏହି ବିଲୁପ୍ତପ୍ରାୟ ପ୍ରାଣୀଗୁଡ଼ିକୁ ପରିତ୍ୟକ୍ତ ଅବସ୍ଥାରେ ଠାବ କରାଯାଇଥିଲା। ମଙ୍ଗଳବାର ସକାଳେ ବନ ବିଭାଗ ସେମାନଙ୍କୁ ଉଦ୍ଧାର କରିଥିଲା। ଇଣ୍ଡୋନେସିଆର ସୁମାତ୍ରା ଓ ବୋର୍ନିଓ ଅଞ୍ଚଳର ଏହି ପ୍ରାଣୀମାନେ ବାଲେଶ୍ୱରକୁ କିପରି ଆସିଲେ, ତାହା ନେଇ ତଦନ୍ତ ଚାଲିଛି।
ଓଡ଼ିଶା ପୁଲିସ ଡିଜି ବିନୟତୋଷ ମିଶ୍ର କହିଛନ୍ତି, ତଦନ୍ତ ସମ୍ପର୍କିତ ସମସ୍ତ ତଥ୍ୟ ଏବେ ପ୍ରକାଶ କରିବା ସମ୍ଭବ ନୁହେଁ, କାରଣ ଏହାଦ୍ୱାରା ଅପରାଧୀମାନେ ସତର୍କ ହୋଇପାରନ୍ତି। ଗୁଜବ କିମ୍ବା ଅପ୍ରମାଣିତ ସୂଚନା ଆଧାରରେ ଗିରଫ କରିବା ଉଚିତ୍ ନୁହେଁ ବୋଲି ସେ କହିଛନ୍ତି। ଏସ୍ଟିଏଫ୍ ମାମଲା ରୁଜୁ କରି ଏକାଧିକ ଟିମ୍ ଗଠନ କରିଛି। ତଦନ୍ତକାରୀମାନେ ଦୀଘାର କିଛି ହୋଟେଲ ମାଲିକଙ୍କ ସମେତ ଅନେକ ବ୍ୟକ୍ତିଙ୍କୁ ପଚରାଉଚରା କରୁଥିବା ବେଳେ ଅନ୍ୟ ଏକ ଟିମ୍ ସିସିଟିଭି ଫୁଟେଜ୍ ଯାଞ୍ଚ କରୁଛି।
ସୂତ୍ର ଅନୁସାରେ, ୩ଟି ମାଈ ଓ ୨ଟି ଅଣ୍ଡିରା ଓରାଙ୍ଗଉଟାନ୍କୁ ସେମାନଙ୍କ ହ୍ୟାଣ୍ଡଲରମାନେ ଭାରତ-ମିଆଁମାର ସୀମା ଦେଇ ଆଣି ଦୀଘା ରାସ୍ତାରେ ବାଲେଶ୍ୱରକୁ ପହଞ୍ଚାଇଥିବା ଏସ୍ଟିଏଫ୍ ସନ୍ଦେହ କରୁଛି। ସେମାନଙ୍କ ଗନ୍ତବ୍ୟସ୍ଥଳ ଏଯାଏଁ ସ୍ପଷ୍ଟ ହୋଇନାହିଁ। ତଦନ୍ତରେ ପ୍ରାୟ ୬ ଜଣଙ୍କ ଉପରେ ସନ୍ଦେହ କରାଯାଉଥିବା ବେଳେ ସୋମବାର ରାତିରେ ଓଡ଼ିଶାରେ ପ୍ରବେଶ କରିବା ଏବଂ ପରେ ବିଚିତ୍ରାପୁର ନିକଟରେ ଦେଖାଯାଇଥିବା ଏକ କଳା ଏସ୍ୟୁଭିକୁ ମଧ୍ୟ ଯାଞ୍ଚ କରାଯାଉଛି। ଏପଟେ ନନ୍ଦନକାନନରେ ରଖାଯାଇଥିବା ୫ଟି ଓରାଙ୍ଗଉଟାନ୍ ସୁସ୍ଥ ଥିବା ଅଧିକାରୀମାନେ କହିଛନ୍ତି।
