Odisha Police Chief: DGP ଚୟନ ତାଲିକାରେ ପରିବର୍ତ୍ତନକୁ ନେଇ SCରେ ଶୁଣାଣି, ସୁଶାନ୍ତ ନାଥଙ୍କୁ ବାଦ୍ ଦେବା ପ୍ରସଙ୍ଗରେ ତର୍କ
ଭୁବନେଶ୍ୱର: ଓଡ଼ିଶାର ପରବର୍ତ୍ତୀ ଡିଜିପି ଚୟନ ପ୍ରକ୍ରିୟାକୁ ନେଇ ସୁପ୍ରିମକୋର୍ଟରେ ମଙ୍ଗଳବାର ଶୁଣାଣି ହୋଇଛି। ବରିଷ୍ଠ ଆଇପିଏସ୍ ଅଧିକାରୀ ସୁଶାନ୍ତ କୁମାର ନାଥଙ୍କୁ ‘ଜୋନ୍ ଅଫ୍ କନ୍ସିଡରେସନ୍’ରୁ ବାଦ୍ ଦେବା, ତାଙ୍କ ଇଣ୍ଟେଗ୍ରିଟି ସାର୍ଟିଫିକେଟ୍ ଏବଂ ପ୍ରାରମ୍ଭିକ ତାଲିକା ପରେ କିଛି ଅଧିକାରୀଙ୍କ ପଦୋନ୍ନତି ଯୋଗୁଁ ତାଲିକାରେ ହୋଇଥିବା ପରିବର୍ତ୍ତନ ଉପରେ ଆଲୋଚନା ହୋଇଛି। ଏହି ମାମଲା ୨୦୦୬ ମସିହାର ପ୍ରକାଶ ସିଂହ ରାୟରେ ଡିଜିପି ଚୟନ ପାଇଁ ଦିଆଯାଇଥିବା ବ୍ୟବସ୍ଥା ସହ ମଧ୍ୟ ଜଡ଼ିତ।
ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପି. ଚିଦମ୍ବରମ୍ ଚୟନ ପ୍ରକ୍ରିୟାରେ ରାଜ୍ୟ ସରକାରଙ୍କ ପଦକ୍ଷେପର କ୍ରମ ଉପରେ ପ୍ରଶ୍ନ ଉଠାଇଥିଲେ। ସୁଶାନ୍ତ ନାଥଙ୍କ ପକ୍ଷରୁ ବରିଷ୍ଠ ଆଇନଜୀବୀ କରୁଣା ନୁନ୍ଦୀ ତାଙ୍କ ଇଣ୍ଟେଗ୍ରିଟି ସାର୍ଟିଫିକେଟ୍ ସମ୍ପର୍କିତ ପ୍ରସଙ୍ଗ ଉଠାଇଥିଲେ। ଅନ୍ୟପଟେ, ଓଡ଼ିଶା ସରକାରଙ୍କ ପକ୍ଷରୁ ସଲିସିଟର ଜେନେରାଲ୍ ତୁଷାର ମେହତା ପକ୍ଷ ରଖିଥିଲେ। ପୂର୍ବରୁ ରାଜ୍ୟ ସରକାର ପଠାଇଥିବା ତାଲିକା ଏବଂ ପରେ ଡିଜି ପାହ୍ୟାକୁ ପଦୋନ୍ନତି ପାଇଥିବା ଅଧିକାରୀଙ୍କ ନାମ ସାମିଲ ହେବା ନେଇ ମଧ୍ୟ ପ୍ରଶ୍ନ ଉଠିଥିଲା।
ସୁପ୍ରିମକୋର୍ଟଙ୍କ ପୂର୍ବ ନିର୍ଦ୍ଦେଶ ଅନୁସାରେ, ରାଜ୍ୟ ଡିଜିପି ଚୟନ ପାଇଁ ଯୋଗ୍ୟ ବରିଷ୍ଠ ଅଧିକାରୀଙ୍କ ନାମ ୟୁପିଏସ୍ସିକୁ ପଠାଯାଇଥାଏ ଏବଂ ୟୁପିଏସ୍ସି ପ୍ୟାନେଲ ପ୍ରସ୍ତୁତ କରିଥାଏ। ଏହି ପ୍ରକ୍ରିୟାରେ ଯୋଗ୍ୟତା ତାଲିକା ଓ ‘ଜୋନ୍ ଅଫ୍ କନ୍ସିଡରେସନ୍’ରେ ପରିବର୍ତ୍ତନ କେମିତି ଏବଂ କେଉଁ ପରିସ୍ଥିତିରେ କରାଯାଇପାରିବ, ସେନେଇ ମାମଲାରେ ଆଇନଗତ ପ୍ରଶ୍ନ ଉଠିଛି। ସେପ୍ଟେମ୍ବର ୨୨ର ଶୁଣାଣି ପୂର୍ବରୁ ଏହି ପ୍ରସଙ୍ଗଗୁଡ଼ିକ ମାମଲାର କେନ୍ଦ୍ରରେ ରହିଥିବା ରିପୋର୍ଟ ରହିଛି।
