Kapilash Viral Video: କପିଳାଶ ଫେରୁଥିବା ୪ ଭକ୍ତଙ୍କୁ ଅଟକାଇ ମାଡ଼ ଅଭିଯୋଗ, ଜମୁଇ ଘଟଣା ପରେ ଭାଇରାଲ୍ ହେଲା ଭିଡିଓ
ଢେଙ୍କାନାଳ: କପିଳାଶ ମନ୍ଦିର ଦର୍ଶନ କରି ଫେରୁଥିବା ଚୌଦ୍ୱାର ଅଞ୍ଚଳର ୪ ଜଣ ଭକ୍ତଙ୍କୁ ରାସ୍ତାରେ ଅଟକାଇ ଗାଳିଗୁଲଜ ଓ ମାଡ଼ ମାରିବା ଅଭିଯୋଗ ସାମ୍ନାକୁ ଆସିଛି। ସେପ୍ଟେମ୍ବର ୧୮ରେ କପିଳାଶ-ଢେଙ୍କାନାଳ ରାସ୍ତାର ଭାନରବେଡ଼ା ନିକଟରେ ଏହି ଘଟଣା ଘଟିଥିବା ପୁଲିସ କହିଛି। ଦୁଇ ଯୁବକ ଓ ଦୁଇ ଯୁବତୀ ସ୍କୁଟରରେ କପିଳାଶ ଯାଇ ଫେରୁଥିବା ବେଳେ କିଛି ସ୍ଥାନୀୟ ଯୁବକ ସେମାନଙ୍କୁ ଅଟକାଇଥିବା ଅଭିଯୋଗ ହୋଇଛି। ପରେ ଘଟଣାର ଭିଡିଓ ସୋସିଆଲ ମିଡିଆରେ ଛାଡ଼ିବା ପରେ ମାମଲାଟି ସାମ୍ନାକୁ ଆସିଥିଲା। ପୁଲିସ ଦୁଇ ଜଣଙ୍କୁ ଧରି ପଚରାଉଚରା କରିଛି ଏବଂ ଅନ୍ୟମାନଙ୍କ ସମ୍ପୃକ୍ତି ନେଇ ତଦନ୍ତ ଚାଲିଛି।
ଏହି ଘଟଣାର ଭିଡିଓ ସାମ୍ନାକୁ ଆସିବାର ଠିକ୍ ପୂର୍ବରୁ ବିହାରର ଜମୁଇରେ ମଧ୍ୟ ଏଭଳି ଏକ ଘଟଣାର ଭିଡିଓ ଭାଇରାଲ୍ ହୋଇଥିଲା। ସେପ୍ଟେମ୍ବର ୧୯ରେ ଜମୁଇରେ ଦଶମ ଶ୍ରେଣୀର ଜଣେ ଛାତ୍ରୀ ଓ ତାଙ୍କ ପୁରୁଷ ସହପାଠୀ ଦୁଇଚକିଆ ଯାନରେ ଫେରୁଥିବା ବେଳେ ଏକ ଗୋଷ୍ଠୀ ସେମାନଙ୍କୁ ଅଟକାଇଥିଲା। ପୁଲିସ ଅନୁସାରେ, ଛାତ୍ରୀଙ୍କୁ ଯୌନ ଭାବେ ହଇରାଣ କରାଯିବା ସହ ତାଙ୍କ ସହପାଠୀଙ୍କୁ ମଧ୍ୟ ମାଡ଼ ଓ ଦୁର୍ବ୍ୟବହାର କରାଯାଇଥିଲା। ଘଟଣାର ଭିଡିଓ ପରେ ସୋସିଆଲ ମିଡିଆରେ ପ୍ରସାରିତ ହୋଇଥିଲା। ଏହି ମାମଲାରେ POCSO ଆଇନ ଅଧୀନରେ ମାମଲା ହୋଇଥିବା ବେଳେ ଏକାଧିକ ଅଭିଯୁକ୍ତଙ୍କୁ ଗିରଫ କରାଯାଇଛି।
ତେବେ କପିଳାଶ ଓ ଜମୁଇ ଘଟଣା ମଧ୍ୟରେ କିଛି ସାମଞ୍ଜସ୍ୟ ଥିଲେ ମଧ୍ୟ ଆଇନଗତ ଭାବେ ଦୁଇଟି ମାମଲା ଅଲଗା। କପିଳାଶ ମାମଲାରେ ପୁଲିସ ସ୍ପଷ୍ଟ କରିଛି ଯେ ଅଭିଯୋଗରେ ଯୌନ ନିର୍ଯାତନାର କଥା ନାହିଁ। ଘଟଣାରେ ଭିଡିଓ ସୋସିଆଲ ମିଡିଆରେ ଭାଇରଲ ହେବା ପରେ ପୁଲିସର ତଦନ୍ତ ଆଗକୁ ବଢ଼ିଛି।
