Kalinga Ghat Landslide: ଭାରି ବର୍ଷାରେ ପୁଣି କଳିଙ୍ଗ ଘାଟରେ ଭୂସ୍ଖଳନ, ଭୁଶୁଡ଼ିଲା ଗାର୍ଡ ୱାଲ୍
କନ୍ଧମାଳ:ଭାରି ବର୍ଷାରେ ପୁଣି କଳିଙ୍ଗ ଘାଟରେ ଭୂସ୍ଖଳନ ଘଟିଛି। ଗଞ୍ଜାମ-କନ୍ଧମାଳ ସୀମାରେ ଥିବା ଏନ୍ଏଚ୍-୧୫୭ର କଳିଙ୍ଗ ଘାଟ ଅଞ୍ଚଳରେ ପ୍ରବଳ ବର୍ଷା ଯୋଗୁଁ ପାହାଡ଼ରୁ ମାଟି ଓ ପଥର ଧସିଛି। ଏହା ସହ ରାସ୍ତା କଡ଼ରେ ନିର୍ମାଣାଧୀନ ଥିବା ଗାର୍ଡ ୱାଲ୍ର ଏକ ଅଂଶ ମଧ୍ୟ ଭୁଶୁଡ଼ି ପଡ଼ିଛି। ଫଳରେ ଘାଟ ରାସ୍ତାର ସୁରକ୍ଷାକୁ ନେଇ ଚିନ୍ତା ବଢ଼ିଛି।
ଲଗାଣ ବର୍ଷା ଯୋଗୁଁ ପାହାଡ଼ ଉପରୁ ପ୍ରବଳ ବେଗରେ ଜଳ ତଳକୁ ଆସିବାରୁ ରାସ୍ତାର ଏକ ପାର୍ଶ୍ୱ ପ୍ରଭାବିତ ହୋଇଛି। ରାସ୍ତା କଡ଼ରେ ନିର୍ମାଣ ହେଉଥିବା ଗାର୍ଡ ୱାଲ୍ର ଅଂଶ ମଧ୍ୟ ଧସିଯାଇଛି। ଭୂସ୍ଖଳନ ଆଶଙ୍କା ଥିବାରୁ ଘାଟ ରାସ୍ତାରେ ଯାତାୟାତକୁ ନେଇ ପ୍ରଶାସନ ସତର୍କ ରହିଛି। ଘଟଣାସ୍ଥଳରେ ଯାଞ୍ଚ ପରେ କ୍ଷୟକ୍ଷତିର ପ୍ରକୃତ ଆକଳନ କରାଯିବ।
କଳିଙ୍ଗ ଘାଟରେ ପ୍ରତିବର୍ଷ ବର୍ଷା ଋତୁରେ ଭୂସ୍ଖଳନ ଯୋଗୁଁ ଯାତାୟାତ ପ୍ରଭାବିତ ହେଉଛି। ଗତବର୍ଷ ମଧ୍ୟ ପ୍ରବଳ ବର୍ଷା ପରେ ଏହି ଅଞ୍ଚଳରେ ଭୂସ୍ଖଳନ ହୋଇ ରାସ୍ତା ଯୋଗାଯୋଗ ବାଧାପ୍ରାପ୍ତ ହୋଇଥିଲା। ଏବେ ପୁଣି ଗାର୍ଡ ୱାଲ୍ ଭୁଶୁଡ଼ିବା ପରେ ରାସ୍ତାର ସୁରକ୍ଷା ଓ ନିର୍ମାଣକାମର ଗୁଣବତ୍ତାକୁ ନେଇ ପ୍ରଶ୍ନ ଉଠିଛି। ବର୍ଷା କମିବା ପରେ ରାସ୍ତାର ମରାମତି ଓ ସୁରକ୍ଷା ବ୍ୟବସ୍ଥା ନେଇ ପଦକ୍ଷେପ ନିଆଯିବ।
