Odisha Govt Suspends 2 Senior Officers:୪୮ ଘଣ୍ଟାରୁ ଅଧିକ ସମୟ ହେପାଜତରେ ରହିବା ପରେ ୨ ବରିଷ୍ଠ ଅଧିକାରୀ ନିଲମ୍ବିତ, ମୁଖ୍ୟମନ୍ତ୍ରୀଙ୍କ ଅନୁମୋଦନ
ଭୁବନେଶ୍ୱର: ଗିରଫ ଓ ନ୍ୟାୟିକ ହେପାଜତରେ ଥିବା ଦୁଇ ବରିଷ୍ଠ ଅଧିକାରୀଙ୍କୁ ନିଲମ୍ବନ କରିଛନ୍ତି ଓଡ଼ିଶା ସରକାର। ବାଣିଜ୍ୟ ଓ ପରିବହନ ବିଭାଗର ଅତିରିକ୍ତ ସଚିବ ଅରୁଣ କୁମାର ବିଶ୍ୱାଳ ଏବଂ କଟକ ସର୍କଲ୍ ଜେଲ୍ର ସିନିୟର ସୁପରିନ୍ଟେଣ୍ଡେଣ୍ଟ ସୁଜିତ କୁମାର ରାଉଳଙ୍କ ନିଲମ୍ବନ ପ୍ରସ୍ତାବକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁମୋଦନ କରିଛନ୍ତି। ଉଭୟ ଅଧିକାରୀ ଭିନ୍ନ ମାମଲାରେ ଗିରଫ ହୋଇ ବର୍ତ୍ତମାନ ନ୍ୟାୟିକ ହେପାଜତରେ ଅଛନ୍ତି।
ଅରୁଣ କୁମାର ବିଶ୍ୱାଳଙ୍କୁ ଜଣେ ମହିଳା କର୍ମଚାରୀଙ୍କ ଅଭିଯୋଗ ଆଧାରରେ ପୁଲିସ ଗିରଫ କରିଥିବା ରିପୋର୍ଟ ରହିଛି। ସେହିପରି, ସୁଜିତ କୁମାର ରାଉଳଙ୍କୁ ଚୌଦ୍ୱାର ସର୍କଲ୍ ଜେଲ୍ରେ ଦୁଇ ଜଣ ବିଚାରାଧୀନ କଏଦୀ ଫେରାର ଘଟଣା ସମ୍ପର୍କିତ ରେକର୍ଡରେ କଥିତ ହେରଫେର ଓ ଦସ୍ତଖତ ଜାଲିଆତି ଅଭିଯୋଗରେ ଗିରଫ କରାଯାଇଥିବା ଖବର ପ୍ରକାଶ ପାଇଛି। ଗିରଫ ପରେ ତାଙ୍କୁ ନ୍ୟାୟିକ ହେପାଜତକୁ ପଠାଯାଇଥିଲା।
ସରକାରୀ ନିୟମ ଅନୁଯାୟୀ, କୌଣସି ସରକାରୀ କର୍ମଚାରୀ ଗିରଫ ହୋଇ ୪୮ ଘଣ୍ଟାରୁ ଅଧିକ ସମୟ ହେପାଜତରେ ରହିଲେ ନିଲମ୍ବନର ବ୍ୟବସ୍ଥା ରହିଛି ବୋଲି ସରକାରୀ ପକ୍ଷରୁ କୁହାଯାଇଛି। ଏହି ନିୟମ ଅନୁସାରେ ଉଭୟ ଅଧିକାରୀଙ୍କ ନିଲମ୍ବନ ପ୍ରସ୍ତାବକୁ ମୁଖ୍ୟମନ୍ତ୍ରୀ ମଞ୍ଜୁର କରିଛନ୍ତି। ତେବେ ଉଭୟଙ୍କ ବିରୋଧରେ ଥିବା ମାମଲାର ତଦନ୍ତ ଓ ଆଇନଗତ ପ୍ରକ୍ରିୟା ଜାରି ରହିଛି।
