Social Media Post: ସୁଜାତା ରାଉତଙ୍କ ବିରୋଧରେ ଆପତ୍ତିଜନକ ପୋଷ୍ଟ ଅଭିଯୋଗ, କ୍ୟାପିଟେଲ ଥାନା ସମ୍ମୁଖରେ ବିଜେଡିର ବିକ୍ଷୋଭ
ଭୁବନେଶ୍ୱର: ବରିଷ୍ଠ ବିଜେଡି ନେତ୍ରୀ ସୁଜାତା ରାଉତଙ୍କ ବିରୋଧରେ ସୋସିଆଲ ମିଡିଆରେ ଆପତ୍ତିଜନକ ପୋଷ୍ଟ କରାଯାଇଥିବା ଅଭିଯୋଗକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ବିଜେଡିର ଅଭିଯୋଗ ଅନୁସାରେ, ‘ବଣ ବିଛୁଆତି’ ନାମକ ଏକ ସୋସିଆଲ ମିଡିଆ ପ୍ଲାଟଫର୍ମରେ ସୁଜାତା ରାଉତଙ୍କୁ ନେଇ ଆପତ୍ତିଜନକ ଟିପ୍ପଣୀ ଓ ପୋଷ୍ଟ କରାଯାଇଛି।
ଏହାକୁ ବିରୋଧ କରି ବିଜେଡି ନେତା ଓ କର୍ମୀମାନେ ଭୁବନେଶ୍ୱରର କ୍ୟାପିଟେଲ ଥାନା ସମ୍ମୁଖରେ ବିକ୍ଷୋଭ କରିଛନ୍ତି। ମାମଲା ପଞ୍ଜିକରଣ ନହେବା ପର୍ଯ୍ୟନ୍ତ ଥାନା ସମ୍ମୁଖରେ ଆନ୍ଦୋଳନ ଜାରି ରହିବ ବୋଲି ଦଳ ପକ୍ଷରୁ କୁହାଯାଇଛି। ‘ବଣ ବିଛୁଆତି’ ପଛରେ ବିଜେପିର ଆଇଟି ସେଲ୍ର ଭୂମିକା ଥିବା ବିଜେଡି ଅଭିଯୋଗ କରିଛି। ତେବେ ଏହି ଅଭିଯୋଗର ସ୍ୱାଧୀନ ପୁଷ୍ଟି ହୋଇନାହିଁ।
ସେହିପରି ସୁଜାତା ରାଉତଙ୍କ କଣ୍ଠସ୍ୱରକୁ କଥିତ ଭାବେ ଡିପଫେକ୍ କରି ତାଙ୍କ ବିରୋଧରେ ଆପତ୍ତିଜନକ ଟିପ୍ପଣୀ ପ୍ରସାର କରାଯାଇଥିବା ମଧ୍ୟ ବିଜେଡି ଅଭିଯୋଗ କରିଛି। ଉଲ୍ଲେଖଯୋଗ୍ୟ, ସୁଜାତା ରାଉତ ନିକଟରେ MMDR ପ୍ରସଙ୍ଗକୁ ନେଇ ଶାସକ ଦଳକୁ ସମାଲୋଚନା କରିଥିଲେ। ଏହି ଅଭିଯୋଗକୁ ନେଇ ବିଜେଡି ପକ୍ଷରୁ ପୁଲିସରେ ଅଭିଯୋଗ ଏବଂ ତଦନ୍ତ ଦାବି କରାଯାଇଛି।
