Odisha Governor Hari Babu Kambhampati: ଲୋକଭବନରେ ରାଜ୍ୟପାଳଙ୍କୁ ବିଦାୟ ସମ୍ବର୍ଦ୍ଧନା, ୧ ବର୍ଷ ୯ ମାସର କାର୍ଯ୍ୟକାଳ ହେଲା ଶେଷ
ଭୁବନେଶ୍ୱର: ଓଡ଼ିଶାର ରାଜ୍ୟପାଳ ଡ. ହରି ବାବୁ କମ୍ଭମପାଟିଙ୍କ ପାଇଁ ଗୁରୁବାର ଲୋକଭବନରେ ବିଦାୟ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ନ୍ୟୁ ଅଭିଷେକ ହଲ୍ରେ ହୋଇଥିବା ଏହି ସମାରୋହରେ ଲୋକଭବନର ଅଧିକାରୀ ଓ କର୍ମଚାରୀମାନେ ତାଙ୍କୁ ସମ୍ମାନ ଜଣାଇଥିଲେ। ରାଜ୍ୟପାଳଙ୍କ ପତ୍ନୀ ଜୟଶ୍ରୀ କମ୍ଭମପାଟି ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।
ଏହି ଅବସରରେ ରାଜ୍ୟପାଳ ଓଡ଼ିଶାରେ ବିତାଇଥିବା ପ୍ରାୟ ଏକ ବର୍ଷ ୯ ମାସର ଅନୁଭୂତି ବିଷୟରେ କହିଥିଲେ। ନିଜ କାର୍ଯ୍ୟକାଳରେ ଲୋକଭବନର ଅଧିକାରୀ ଓ କର୍ମଚାରୀଙ୍କଠାରୁ ମିଳିଥିବା ସହଯୋଗକୁ ସେ ମନେ ପକାଇବା ସହ ସମସ୍ତଙ୍କୁ ଧନ୍ୟବାଦ ଦେଇଥିଲେ। ଓଡ଼ିଶା ସହ ଜଡ଼ିତ ଅନୁଭୂତି ତାଙ୍କ ପାଇଁ ସବୁଦିନ ସ୍ମରଣୀୟ ହୋଇ ରହିବ ବୋଲି ସେ ଉଲ୍ଲେଖ କରିଥିଲେ।
କାର୍ଯ୍ୟକ୍ରମରେ ରାଜ୍ୟପାଳଙ୍କ କମିଶନର-ତଥା-ଶାସନ ସଚିବ ଡ. ରୂପା ରୋଶନ ସାହୁଙ୍କ ସହ ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ନିଜ ଅନୁଭବ ବାଣ୍ଟିଥିଲେ। ରାଜ୍ୟପାଳଙ୍କ ସହ କାର୍ଯ୍ୟ କରିବା ସମୟର ସ୍ମୃତି ଉଲ୍ଲେଖ କରି ସେମାନେ ତାଙ୍କ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଥିଲେ। ଲୋକଭବନର ଏହି ବିଦାୟ ସମାରୋହରେ ରାଜ୍ୟପାଳଙ୍କ କାର୍ଯ୍ୟକାଳର ଅନୁଭୂତି ଓ ସହକର୍ମୀଙ୍କ ସହ ତାଙ୍କ ସମ୍ପର୍କକୁ ସ୍ମରଣ କରାଯାଇଥିଲା।
