Mysuru Dasara Drone Show: ୩,୪୭୩ ଡ୍ରୋନ୍ରେ ଆକାଶରେ ନାଚିଲା ବିଶାଳ ମୟୂର, Guinness World Recordsରେ ସ୍ଥାନ
Writing
କର୍ଣ୍ଣାଟକ: କର୍ଣ୍ଣାଟକର ମହୀଶୂର (ମୈସୁର) ଦଶହରା ଉତ୍ସବରେ ଆକାଶରେ ସୃଷ୍ଟି ହୋଇଛି ମନୋରମ ଦୃଶ୍ୟ। ଅକ୍ଟୋବର ୧୮ ତାରିଖରେ ୩,୪୭୩ଟି ଡ୍ରୋନ୍ର ସମନ୍ୱୟରେ ଆକାଶରେ ଏକ ବିଶାଳ ନୃତ୍ୟରତ ମୟୂରର ଆକୃତି ତିଆରି କରାଯାଇଥିଲା। ଏହି ଅଭିନବ ପ୍ରଦର୍ଶନ ପାଇଁ ଏହାକୁ Guinness World Recordsରେ ସ୍ଥାନ ମିଳିଛି। ବନ୍ନିମଣ୍ଟପ୍ର ଟର୍ଚ୍ଚଲାଇଟ୍ ପରେଡ୍ ଗ୍ରାଉଣ୍ଡରେ ଆୟୋଜିତ ଏହି ଶୋ’କୁ ଚାମୁଣ୍ଡେଶ୍ୱରୀ ଇଲେକ୍ଟ୍ରିସିଟି ସପ୍ଲାଏ କର୍ପୋରେସନ୍ ଲିମିଟେଡ୍ (CESC) ଆୟୋଜନ କରିଥିଲା। IIT ଦିଲ୍ଲୀରେ ଇନ୍କ୍ୟୁବେଟ୍ ହୋଇଥିବା ଦିଲ୍ଲୀର BotLab Dynamics ଡ୍ରୋନ୍ ପ୍ରଦର୍ଶନର ପରିଚାଳନା କରିଥିଲା।
ବହୁ ଡ୍ରୋନ୍କୁ ଏକାସାଙ୍ଗରେ ନିୟନ୍ତ୍ରଣ କରି ଆକାଶରେ ଏପରି ଚିତ୍ର ସୃଷ୍ଟି କରିବା ଏହି ପ୍ରଦର୍ଶନର ବିଶେଷତ୍ୱ। ମଲ୍ଟିରୋଟର୍ ଡ୍ରୋନ୍ ବ୍ୟବହାର କରି ଆକାଶରେ ପକ୍ଷୀର ସର୍ବବୃହତ୍ ପ୍ରଦର୍ଶନ ଭାବେ ଏହାକୁ ସ୍ୱୀକୃତି ମିଳିଛି। ଏହି ଟିମ୍ ୨୦୨୫ରେ ୨,୯୮୩ଟି ଡ୍ରୋନ୍ରେ ଏକ ଡେଉଁଥିବା ବାଘର ଆକୃତି ତିଆରି କରି ରେକର୍ଡ କରିଥିଲା। ଚଳିତ ବର୍ଷର ଶୋ’ରେ ମୟୂର ସହ ସିଂହ, ପ୍ରଜାପତି, ତ୍ରିରଙ୍ଗା ଧରିଥିବା ସୈନିକ ଏବଂ ଦେବୀ ଚାମୁଣ୍ଡେଶ୍ୱରୀଙ୍କ ଆକୃତି ମଧ୍ୟ ପ୍ରଦର୍ଶିତ ହୋଇଥିଲା।
ଏହି ସଫଳତାକୁ କର୍ଣ୍ଣାଟକ ପାଇଁ ଗର୍ବର ମୁହୂର୍ତ୍ତ ବୋଲି କହିଛନ୍ତି ରାଜ୍ୟର ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର। ଏହା କର୍ଣ୍ଣାଟକର ସୃଜନଶୀଳତା ଓ ସାଂସ୍କୃତିକ ପରମ୍ପରାର ଏକ ନିଆରା ପ୍ରଦର୍ଶନ ବୋଲି ସେ ମତ ଦେଇଛନ୍ତି। ପାରମ୍ପରିକ ଦଶହରା ଉତ୍ସବ ସହ ଆଧୁନିକ ଡ୍ରୋନ୍ ପ୍ରଯୁକ୍ତିର ଏହି ମିଶ୍ରଣ ଦର୍ଶକଙ୍କ ମନ ଜିଣିଛି।
