Tamil Nadu Jailbreak: ତାମିଲନାଡୁର ଥେକ୍କମପଟ୍ଟି ସବ୍-ଜେଲ୍ରୁ ୧୭ କଏଦୀ ଫେରାର ଘଟଣାରେ ଜେଲ୍ ଅଧିକାରୀ ନିଲମ୍ବିତ, ବରିଷ୍ଠ କର୍ମଚାରୀଙ୍କ ବଦଳି
ତାମିଲନାଡୁ: ତାମିଲନାଡୁର ଥେନି ଜିଲ୍ଲାର ଥେକ୍କମପଟ୍ଟି ସବ୍-ଜେଲ୍ରୁ ୧୭ ଜଣ ବିଚାରାଧୀନ କଏଦୀ ଫେରାର ହେବା ଘଟଣାରେ କଡ଼ା ପଦକ୍ଷେପ ନେଇଛନ୍ତି ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ। ଡ୍ୟୁଟିରେ ଅବହେଳା ଓ ଜେଲ୍ର ସୁରକ୍ଷା ବ୍ୟବସ୍ଥାରେ ତ୍ରୁଟି ପାଇଁ ଦାୟୀ ଅଧିକାରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ସହ ଜେଲ୍ ପ୍ରଶାସନରେ ବଡ଼ ଧରଣର ଅଦଳବଦଳ କରାଯାଇଛି। ଏହି ଘଟଣା ଅକ୍ଟୋବର ୨୬ ରାତିରେ ଘଟିଥିଲା। ନକଲି ମେଡିକାଲ୍ ଜରୁରୀ ପରିସ୍ଥିତି ସୃଷ୍ଟି କରି କଏଦୀମାନେ ଜେଲ୍ କର୍ମଚାରୀଙ୍କୁ କାବୁ କରି ଫେରାର ହୋଇଯାଇଥିଲେ। ପରେ ପୋଲିସର ତଲାସୀ ଅଭିଯାନରେ ସମସ୍ତ ୧୭ ଜଣଙ୍କୁ ଧରାଯାଇ ପୁଣି ଜେଲ୍କୁ ଫେରାଇ ନିଆଯାଇଥିଲା।
ଏହି ଘଟଣା ପରେ ଥେନି ସବ୍-ଜେଲ୍ର ଦାୟିତ୍ୱରେ ଥିବା ଅଧିକାରୀ ଏନ୍. ନାଗେଶ୍ୱରନ୍ଙ୍କୁ ଅକ୍ଟୋବର ୩୦ରୁ ପରବର୍ତ୍ତୀ ନିର୍ଦ୍ଦେଶ ଯାଏଁ ନିଲମ୍ବିତ କରାଯାଇଛି। ଜେଲ୍ର କଏଦୀ ଓ ଡ୍ୟୁଟିରେ ଥିବା କର୍ମଚାରୀଙ୍କ ଉପରେ ଉପଯୁକ୍ତ ନଜର ରଖିବାରେ ସେ ବିଫଳ ହୋଇଥିବା ନିଲମ୍ବନ ଆଦେଶରେ ଉଲ୍ଲେଖ ରହିଛି। ଏହାସହ ମଦୁରାଇ କେନ୍ଦ୍ରୀୟ ଜେଲ୍ର ଅଧୀକ୍ଷକ ଆର୍. କୃଷ୍ଣରାଜଙ୍କୁ ସେଲମ୍ କେନ୍ଦ୍ରୀୟ ଜେଲ୍କୁ ବଦଳି କରାଯାଇଛି। ଜେଲ୍ ସୁରକ୍ଷାରେ ଅବହେଳାକୁ ସରକାର ଗୁରୁତ୍ୱର ସହ ନେଇଥିବା ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି।
ଏହି ଘଟଣା ପରେ ଜେଲ୍ ବିଭାଗର ଶୀର୍ଷସ୍ତରରେ ମଧ୍ୟ ପରିବର୍ତ୍ତନ କରାଯାଇଛି। ଜେଲ୍ ବିଭାଗର ପୋଲିସ ମହାନିର୍ଦ୍ଦେଶକ ସନ୍ଦୀପ ରାୟ ରାଠୋରଙ୍କୁ TANGEDCOର ମୁଖ୍ୟ ଭିଜିଲାନ୍ସ ଅଧିକାରୀ (CVO) ଭାବେ ବଦଳି କରାଯାଇଛି। ତାଙ୍କ ସ୍ଥାନରେ କେ. ଶଙ୍କରଙ୍କୁ ଜେଲ୍ ଓ ସଂଶୋଧନ ସେବା ବିଭାଗର ନୂଆ ଅତିରିକ୍ତ ପୋଲିସ ମହାନିର୍ଦ୍ଦେଶକ (ADGP) ଭାବେ ନିଯୁକ୍ତ କରାଯାଇଛି। ଜେଲ୍ ସୁରକ୍ଷାରେ କୌଣସି ଅବହେଳାକୁ ବରଦାସ୍ତ କରାଯିବ ନାହିଁ ଏବଂ ଭବିଷ୍ୟତରେ ଏଭଳି ତ୍ରୁଟି ଦେଖାଗଲେ କଠୋର କାର୍ଯ୍ୟାନୁଷ୍ଠାନ ହେବ ବୋଲି ସରକାର ଚେତାବନୀ ଦେଇଛନ୍ତି।
