Agra Hindu Wedding: ତାଜମହଲ ସହର ଆଗ୍ରାରେ ହିନ୍ଦୁ ରୀତିନୀତିରେ ବିବାହ କଲେ ଇଟାଲୀର ପ୍ରେମୀ ଯୁଗଳ
ଉତ୍ତରପ୍ରଦେଶ: ପ୍ରେମର ସହର ଆଗ୍ରାରେ ଭାରତୀୟ ସଂସ୍କୃତି ପ୍ରତି ଆକର୍ଷିତ ହୋଇ ହିନ୍ଦୁ ରୀତିନୀତିରେ ବିବାହ କରିଛନ୍ତି ଇଟାଲୀର ଏକ ପ୍ରେମୀ ଯୁଗଳ। ଇଟାଲୀର ଲିଗୁରିଆ ଅଞ୍ଚଳର ମ୍ୟାଟିଓ ଓ କାଟ୍ରିନା ମଙ୍ଗଳବାର ସନ୍ଧ୍ୟାରେ ବୈଦିକ ମନ୍ତ୍ର ଉଚ୍ଚାରଣ ମଧ୍ୟରେ ସାତ ଫେରା ନେଇ ପରସ୍ପରକୁ ଜୀବନସାଥୀ ଭାବେ ବାଛିଛନ୍ତି।
ବିବାହ ସମୟରେ ବର ମ୍ୟାଟିଓ ଧୋତି-କୁର୍ତ୍ତା ପିନ୍ଧିଥିବା ବେଳେ କନ୍ୟା କାଟ୍ରିନା ଲାଲ ରଙ୍ଗର ବିବାହ ପୋଷାକରେ ନଜର ଆସିଥିଲେ। ସିନ୍ଦୂରଦାନ ଓ ମଙ୍ଗଳସୂତ୍ର ପିନ୍ଧାଇବା ସମେତ ସମସ୍ତ ପାରମ୍ପରିକ ରୀତିନୀତି ପାଳନ କରାଯାଇଥିଲା। ବିବାହର ଏକ ବିଶେଷ ଦିଗ ଥିଲା ଯେ, ପଣ୍ଡିତ ହିନ୍ଦୀ ଓ ଇଂରାଜୀ ଉଭୟ ଭାଷାରେ ମନ୍ତ୍ରର ଅର୍ଥ ବୁଝାଇଥିଲେ, ଯାହାଦ୍ୱାରା ଏହି ଯୋଡ଼ି ଭାରତୀୟ ପରମ୍ପରାକୁ ବୁଝିପାରିଥିଲେ।
ଏହି ବିବାହକୁ ନେଇ ମ୍ୟାଟିଓ ଓ କାଟ୍ରିନା କହିଛନ୍ତି ଯେ, ତାଜମହଲର ସହର ଆଗ୍ରାରେ ହିନ୍ଦୁ ରୀତିନୀତିରେ ବିବାହ କରିବା ସେମାନଙ୍କ ଜୀବନର ଏକ ସ୍ମରଣୀୟ ଅନୁଭୂତି ହୋଇ ରହିବ। ଭାରତୀୟ ପରମ୍ପରା ଅନୁସାରେ ବିବାହ କରିବା ସେମାନଙ୍କ ପାଇଁ ଏହି ଦିନକୁ ଆହୁରି ସ୍ୱତନ୍ତ୍ର କରିଦେଇଛି।
