Adani Ports: ୨.୫୬ ବିଲିୟନ୍ ୟୁରୋରେ ୟୁରୋପର Evos କମ୍ପାନୀକୁ କିଣିବ ଆଦାନୀ ପୋର୍ଟସ୍
ନୂଆଦିଲ୍ଲୀ: ଆଦାନୀ ପୋର୍ଟସ୍ ଆଣ୍ଡ୍ ସ୍ପେଶାଲ୍ ଇକୋନୋମିକ୍ ଜୋନ୍ ଲିମିଟେଡ୍ (APSEZ) ୟୁରୋପର ଦ୍ୱିତୀୟ ବୃହତ୍ ସ୍ୱାଧୀନ ତରଳ ପଦାର୍ଥ ସଂରକ୍ଷଣ କମ୍ପାନୀ Evos B.V.କୁ ଅଧିଗ୍ରହଣ କରିବାକୁ ଘୋଷଣା କରିଛି। ନେଦରଲାଣ୍ଡ୍ସ୍ର ଏହି କମ୍ପାନୀର ୧୦୦ ପ୍ରତିଶତ ଅଂଶଧନ ଆଦାନୀ ପୋର୍ଟସ୍ କିଣିବ। Igneo Infrastructure Partnersଠାରୁ ଏହି ଅଧିଗ୍ରହଣ ୨.୫୬ ବିଲିୟନ୍ ୟୁରୋର ମୋଟ ମୂଲ୍ୟରେ ହେବ। ଏହା ଏକ ନଗଦ ଅର୍ଥରେ କାରବାର ହୋଇଥିବା ବେଳେ କମ୍ପାନୀର ଇକ୍ୱିଟି ମୂଲ୍ୟ ୧.୧୮ ବିଲିୟନ୍ ୟୁରୋ ଧାର୍ଯ୍ୟ ହୋଇଛି।
APSEZ ଅନୁଯାୟୀ, ୨୦୨୫ କ୍ୟାଲେଣ୍ଡର ବର୍ଷରେ Evosର ଆୟ ୩୯୨ ମିଲିୟନ୍ ୟୁରୋ ଏବଂ EBITDA ୨୧୯ ମିଲିୟନ୍ ୟୁରୋ ରହିଥିଲା। କମ୍ପାନୀର EBITDA ମାର୍ଜିନ୍ ୫୬ ପ୍ରତିଶତ ଥିଲା। ଏହି ଅଧିଗ୍ରହଣ ପାଇଁ ଋଣ ମାଧ୍ୟମରେ ଅର୍ଥ ଯୋଗାଡ଼ କରାଯିବ। ତେବେ କାରବାର ପାଇଁ ନିୟାମକ ସଂସ୍ଥାଙ୍କ ଅନୁମତି, ଅନ୍ୟାନ୍ୟ ମଞ୍ଜୁରୀ ଏବଂ କର୍ମଚାରୀ ପରିଷଦ ସହ ପରାମର୍ଶ ଆବଶ୍ୟକ। APSEZର ମ୍ୟାନେଜିଂ ଡାଇରେକ୍ଟର କରଣ ଆଦାନୀ କହିଛନ୍ତି, Evosକୁ କମ୍ପାନୀର ଅଂଶ କରିବା ଦ୍ୱାରା ବିଶ୍ୱର ପ୍ରମୁଖ ତରଳ ପଦାର୍ଥ ସଂରକ୍ଷଣ ଓ ଶକ୍ତି କେନ୍ଦ୍ରଗୁଡ଼ିକରେ ଏହାର ଉପସ୍ଥିତି ବଢ଼ିବ।
Evosର ୟୁରୋପର ପାଞ୍ଚଟି ଦେଶ—ନେଦରଲାଣ୍ଡ୍ସ୍, ଜର୍ମାନୀ, ସ୍ପେନ୍, ବେଲଜିୟମ୍ ଓ ମାଲ୍ଟାରେ ଆଠଟି ବନ୍ଦର ଟର୍ମିନାଲ୍ ରହିଛି। ଏହାର ମୋଟ ସଂରକ୍ଷଣ କ୍ଷମତା ୬.୩ ନିୟୁତ ଘନମିଟର ଏବଂ ୨୦୨୫ରେ ୩୭ ନିୟୁତ ମେଟ୍ରିକ୍ ଟନ୍ ତରଳ ପଦାର୍ଥ ପରିଚାଳନା କରିଥିଲା। ଏହି ଅଧିଗ୍ରହଣ ପରେ APSEZର ବିଶ୍ୱବ୍ୟାପୀ ବନ୍ଦର ଓ ଟର୍ମିନାଲ୍ ସଂଖ୍ୟା ୧୦ଟି ଦେଶରେ ୨୮କୁ ବୃଦ୍ଧି ପାଇବ। Evosର ଟର୍ମିନାଲ୍ଗୁଡ଼ିକରେ ଇନ୍ଧନ, ଜେଟ୍ ଫ୍ୟୁଏଲ୍, ବାୟୋଫ୍ୟୁଏଲ୍ ଓ ସସ୍ଟେନେବଲ୍ ଏଭିଏସନ୍ ଫ୍ୟୁଏଲ୍ (SAF) ଭଳି ବିଭିନ୍ନ ତରଳ ଇନ୍ଧନ ସଂରକ୍ଷଣ କରାଯାଏ। ଏହା ଆଦାନୀ ପୋର୍ଟସ୍ର ବ୍ୟବସାୟକୁ ଅଧିକ ବିସ୍ତୃତ ଓ ବିବିଧ କରିବା ସହ ୟୁରୋପର ଶକ୍ତି ପରିବର୍ତ୍ତନ କ୍ଷେତ୍ରରେ ସୁଯୋଗ ବଢ଼ାଇବ।
