COP31: ବିଶ୍ୱ ତାପମାତ୍ରା ବୃଦ୍ଧି ୧.୫ ଡିଗ୍ରୀ ମଧ୍ୟରେ ରଖିବାକୁ ଦେଶଗୁଡ଼ିକର ଆହ୍ୱାନ, ତୁର୍କୀର ଆଣ୍ଟାଲ୍ୟାରେ ଆୟୋଜିତ ଜଳବାୟୁ ସମ୍ମିଳନୀର ପ୍ରଥମ ଦିନରେ ଜଳବାୟୁ ସଙ୍କଟ ଉପରେ ଆଲୋଚନା
ନୂଆଦିଲ୍ଲୀ: ତୁର୍କୀର ଆଣ୍ଟାଲ୍ୟାରେ ଜଳବାୟୁ ପରିବର୍ତ୍ତନ ସମ୍ପର୍କିତ ମିଳିତ ଜାତିସଂଘର ସମ୍ମିଳନୀ COP31 ଆରମ୍ଭ ହୋଇଛି। ସମ୍ମିଳନୀର ପ୍ରଥମ ଦିନରେ ଅଷ୍ଟ୍ରେଲିଆ ଓ ତୁର୍କୀ ମିଳିତ ଭାବେ ଅଧ୍ୟକ୍ଷତା ଦାୟିତ୍ୱ ଗ୍ରହଣ କରିଛନ୍ତି। ଏହି ଅବସରରେ ଜଳବାୟୁ ସଙ୍କଟର ମୁକାବିଲା, ବିଶ୍ୱ ତାପମାତ୍ରା ବୃଦ୍ଧି ଏବଂ ପରିବେଶ ସୁରକ୍ଷା ଭଳି ପ୍ରସଙ୍ଗ ଉପରେ ବିଭିନ୍ନ ଦେଶ ନିଜ ମତ ରଖିଛନ୍ତି।
ସମ୍ମିଳନୀରେ ନେପାଳ ହିମବାହ ବା ଗ୍ଲେସିୟର୍ ସହ ଜଡ଼ିତ ବିପଦ ଏବଂ ପାର୍ବତ୍ୟ ଅଞ୍ଚଳରେ ରହୁଥିବା ସମୁଦାୟଙ୍କ ସମସ୍ୟାକୁ ପ୍ରାଥମିକତା ଦେବାକୁ ଦାବି କରିଛି। ସେହିପରି ଆଫ୍ରିକୀୟ ଦେଶଗୁଡ଼ିକ ଜଳବାୟୁ ପରିବର୍ତ୍ତନର ମୁକାବିଲା ପାଇଁ ଆର୍ଥିକ ସହାୟତା ବା ଜଳବାୟୁ ଅର୍ଥଯୋଗାଣ ପ୍ରସଙ୍ଗକୁ ସମ୍ମିଳନୀର ଏଜେଣ୍ଡାରେ ସାମିଲ କରିବାରେ ସଫଳ ହୋଇଛନ୍ତି। ଅନ୍ୟପଟେ ପ୍ରଶାନ୍ତ ମହାସାଗରୀୟ ଦେଶଗୁଡ଼ିକ ବିଶ୍ୱର ତାପମାତ୍ରା ବୃଦ୍ଧିକୁ ୧.୫ ଡିଗ୍ରୀ ସେଲସିୟସ୍ ମଧ୍ୟରେ ସୀମିତ ରଖିବାକୁ ଆହ୍ୱାନ ଦେଇଛନ୍ତି।
ଏହି ସମ୍ମିଳନୀରେ ହାଇ ଆମ୍ବିସନ୍ କୋଏଲିସନ୍ ମଧ୍ୟ ଜଳବାୟୁ ସଙ୍କଟକୁ ନେଇ ଚେତାବନୀ ଦେଇଛି। କେବଳ ପ୍ରତିଶ୍ରୁତି ଓ ଘୋଷଣା ଦ୍ୱାରା ଜଳବାୟୁ ସଙ୍କଟର ସମାଧାନ ସମ୍ଭବ ନୁହେଁ, ଏଥିପାଇଁ ଦେଶଗୁଡ଼ିକୁ ଠୋସ୍ ପଦକ୍ଷେପ ନେବାକୁ ପଡ଼ିବ ବୋଲି ସଂଗଠନ ପକ୍ଷରୁ କୁହାଯାଇଛି। ୧.୫ ଡିଗ୍ରୀ ସେଲସିୟସ୍ ଲକ୍ଷ୍ୟକୁ ବଜାୟ ରଖିବା ପାଇଁ ଏବେଠାରୁ ଦୃଢ଼ କାର୍ଯ୍ୟାନୁଷ୍ଠାନ ନେବା ଉପରେ ସମ୍ମିଳନୀରେ ଗୁରୁତ୍ୱ ଦିଆଯାଇଛି।
