UP SIR: ଉତ୍ତରପ୍ରଦେଶର ଭୋଟର ତାଲିକାକୁ ନେଇ ଯୋଗୀଙ୍କ ବଡ଼ ଦାବି! ୧.୨୭ କୋଟି ହିନ୍ଦୁ ଭୋଟରଙ୍କ ନାଁ ତାଲିକାରେ ନଥିବା ଅଭିଯୋଗ
ଉତ୍ତରପ୍ରଦେଶ: ଉତ୍ତରପ୍ରଦେଶର ଭୋଟର ତାଲିକାକୁ ନେଇ ଏକ ବଡ଼ ଦାବି କରିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ। ରାଜ୍ୟର ଭୋଟର ତାଲିକାରୁ ୧.୨୭ କୋଟି ହିନ୍ଦୁ ଭୋଟରଙ୍କ ନାମ ଗାଏବ ହୋଇଥିବା ସେ ଅଭିଯୋଗ କରିଛନ୍ତି। ଅନ୍ୟପଟେ, ସ୍ୱତନ୍ତ୍ର ଗଭୀର ସଂଶୋଧନ (SIR) ପରେ ମୁସଲିମ୍ ଭୋଟରଙ୍କ ସଂଖ୍ୟା ୧.୬୫ ପ୍ରତିଶତ ବଢ଼ିଥିବା ମଧ୍ୟ ଯୋଗୀ ଦାବି କରିଛନ୍ତି।
ଏହି ପ୍ରସଙ୍ଗରେ ବିଜେପି ନିର୍ବାଚନ ଆୟୋଗଙ୍କ ନିକଟରେ ପହଞ୍ଚିଛି। ଭୋଟର ହେବା ପାଇଁ ଯୋଗ୍ୟତା ଥାଇ ମଧ୍ୟ ଯେଉଁମାନଙ୍କ ନାମ ତାଲିକାରୁ ବାଦ୍ ପଡ଼ିଛି, ସେମାନଙ୍କୁ ଭୋଟର ତାଲିକାରେ ସାମିଲ କରିବାକୁ ଦଳ ଦାବି କରିଛି। ଯୋଗୀଙ୍କ ପକ୍ଷରୁ ଉଠାଯାଇଥିବା ଭୋଟର ସଂଖ୍ୟା ସମ୍ପର୍କିତ ଦାବିଗୁଡ଼ିକ ଏବେ ରାଜନୈତିକ ଆଲୋଚନାର ବିଷୟ ହୋଇଛି।
ଉତ୍ତରପ୍ରଦେଶର ମୁଖ୍ୟ ନିର୍ବାଚନ ଅଧିକାରୀ ନବଦୀପ ରିନୱା ନଭେମ୍ବର ୧୭ ତାରିଖରେ SIR ସମ୍ପର୍କିତ ପ୍ରଶ୍ନର ଉତ୍ତର ରଖିବେ ବୋଲି ଆଶା କରାଯାଉଛି। ତେବେ ଡ୍ରାଫ୍ଟ ଭୋଟର ତାଲିକା ପ୍ରକାଶ ପାଇବା ପରେ ଏହାର ସ୍ପଷ୍ଟୀକରଣ ଆସିବ। ତେଣୁ ଭୋଟର ତାଲିକାରେ ନାମ ବାଦ୍ ପଡ଼ିବା ଓ ନୂଆ ନାମ ସାମିଲ ହେବାକୁ ନେଇ ଆଗାମୀ ଘୋଷଣା ଉପରେ ନଜର ରହିଛି।
