ଆସୁଛି ଲଘୁଚାପ, ନଭେମ୍ବର ତୃତୀୟ ସପ୍ତାହରେ ହେବ ବଡ଼ ବର୍ଷା !
ଭୁବନେଶ୍ଵର: ଶୀତ ସମୟରେ ହେବ ବର୍ଷା। ଆସନ୍ତା ୧୪ ତାରିଖରେ ଦକ୍ଷିଣ ପୂର୍ବ ବଙ୍ଗୋପସାଗରରେ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି। ପରବର୍ତ୍ତୀ ସମୟରେ ଏହ ପଶ୍ଚିମ-ଉତ୍ତର-ପଶ୍ଚିମ ଦିଗକୁ ଗତି କରିବ। ୧୬ ତାରିଖ ବେଳକୁ ଦକ୍ଷିଣ ବଙ୍ଗୋପସାଗରରେ ଏହା ଘନୀଭୂତ ହେବ। ପରବର୍ତ୍ତୀ ସମୟରେ ଅଧିକ ଘନୀଭୂତ ହୋଇ ଅବପାତର ରୂପ ନେବାର ସମ୍ଭାବନା ରହିଛି। ଏ ନେଇ ଶନିବାର ଭୁବନେଶ୍ଵର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି।
#୧୪ନଭେମ୍ବର ବେଳକୁ ଦକ୍ଷିଣ-ପୂର୍ବ ବଙ୍ଗୋପସାଗର ଅଞ୍ଚଳରେ ଏକ #ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି , ଏହା ପରବର୍ତ୍ତୀ ସମୟରେ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରି #୧୬ତାରିଖ ବେଳକୁ କେନ୍ଦ୍ରୀୟ ପାର୍ଶ୍ଵବର୍ତ୍ତୀ ଦକ୍ଷିଣ ବଙ୍ଗୋପସାଗର ଅଞ୍ଚଳରେ ଆହୁରି ଘନୀଭୂତ ହୋଇ ଏକ #ଅବପାତ ର ରୂପନେବାର ସମ୍ଭାବନା ରହିଛି | pic.twitter.com/J1Mydj2NaR
— Meteorological Centre, Bhubaneswar (@mcbbsr) November 11, 2023
ରାଜ୍ୟରେ ଶୀତ ପ୍ରଭାବ ପଡ଼ିଲାଣି। ବର୍ତ୍ତମାନ ଧାନକଟା ଚାଲିଛି। ଏହି ସମୟରେ ଲଘୁଚାପଜନିତ ବର୍ଷା ଚାଷୀଙ୍କୁ ଧାନ ଅମଳରେ ସମସ୍ୟାରେ ପକାଇପାରେ। ଚଳିତ ବର୍ଷ ସେମିତିରେ ସ୍ଵାଭାବିକଠୁ କମ ବର୍ଷା ହୋଇଛି। ଯେଉଁ ସମୟରେ ଚାଷ ପାଇଁ ପାଣି ଦରକାର ସେହି ସମୟରେ ଠିକ୍ ପରିମାଣର ବର୍ଷା ହୋଇ ନ ଥିଲା। ଏଭଳି ସ୍ଥିତିରେ ନଭେମ୍ବର ତୃତୀୟ ସପ୍ତାହ ଆଡ଼କୁ ଲଘୁଚାପରେ ବଡ଼ ବର୍ଷା ହେଲେ ଚାଷୀଙ୍କ ଦୁଃଖକୁ ଆହୁରି ବଢାଇପାରେ।
