ଓଡ଼ିଶା ଡଟ୍ ନ୍ୟୁଜ୍

3/06/2024 at 12:06 PM

ସମ୍ବଲପୁର: ମହାପ୍ରଭୁ ଜଗନ୍ନାଥଙ୍କ ଦର୍ଶନ ପାଇଁ ଆସିବା ବେଳେ ବାଟରେ ଜଗିଥିଲା ଜମ । ଅଧା ବାଟରେ ଗାଡି ହେଲା ଦୁର୍ଘଟଣା ଗ୍ରସ୍ତ । ଚାହୁଁ ଚାହୁଁ ଚାଲିଗଲା ଦୁଇ ଜଗା ଭକ୍ତଙ୍କ ଜୀବନ । ଦୁର୍ଘଟଣାରେ ୧୦ ଜଣ ଗରୁତର ଆହତ ହୋଇଛନ୍ତି । ସେମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି । ନିର୍ମାଣାଧୀନ ବ୍ରିଜରୁ ପ୍ରାୟ ୩୦ ଫୁଟ ତଳକୁ ତଳକୁ ଖସିପଡିଥିଲା ପର୍ଯ୍ୟଟକଙ୍କୁ ନେଇ ଆସୁଥିବା ବୋଲେରୋ । ସମସ୍ତ ମୃତାହତ ଛତିଶଗଡ଼ ରାଜ୍ୟର ବୋଲି ଜଣାପଡିଛି ।

ମିଳିଥିବା ସୂଚନା ମୁତାବକ ଛତିଶଗଡ଼ର ଏହି ତୀର୍ଥଯାତ୍ରୀ ଗତକାଲି ରାତିରେ ଏକ ବୋଲେରୋରେ ପୁରୀ ଆସୁଥିଲେ ମହାପ୍ରଭୁଙ୍କ ଦର୍ଶନ କରିବା ପାଇଁ । ହେଲେ ସମ୍ବଲପୁର ଜିଲ୍ଲା ଯୁଜୁମୁରା ଥାନା ଅନ୍ତର୍ଗତ ୫୫ ନମ୍ବର ଜାତୀୟ ରାଜପଥର ଝାଙ୍କରପାଲି ନିକଟରେ ଗାଡିଟି ଦୁର୍ଘଟଣାର ଶିକାର ହୋଇଥିଲା । ମୃତାହତଙ୍କ ପରିଚୟ ମିଳିପାରିନାହିଁ ।

ଗାଡିଟି ପୁରୀ ଅଭିମୁଖେ ଯାଉଥିବା ବେଳେ ଭୁଲ ବଶତଃ ଝାଙ୍କରପାଲି ନିକଟରେ ନିର୍ମାଣାଧୀନ ବ୍ରିଜ ଉପରକୁ ଚଢ଼ିଯାଇଥିଲା । ପରେ ଗାଡିଟି ଅର୍ଦ୍ଧ ନିର୍ମୀତ ବ୍ରିଜରୁ ୩୦ ଫୁଟ ତଳକୁ ଖସି ପଡ଼ିଥିଲା । ଆହତମାନଙ୍କୁ ପ୍ରଥମେ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପରେ ସେମାନଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ପୋଲିସ ଗାଡ଼ିଟିକୁ ଜବତ କରି ଘଟଣାର ତଦନ୍ତ କରୁଛି ।