ପ୍ରଜ୍ଞା ପଟ୍ଟନାୟକ

18/04/2023 at 11:50 AM

ସମ୍ବଲପୁର: ଏବେ ବି ସମ୍ବଲପୁରରେ ସ୍ଥିତି ସ୍ବାଭାବିକ ହୋଇନି। ପରିସ୍ଥିତିକୁ ଦୃଷ୍ଟିରେ ରଖି ପୁଣି ୨୪ ଘଣ୍ଟା ପାଇଁ ସମ୍ବଲପୁରରେ ଇଣ୍ଟରନେଟ ସେବା ବନ୍ଦ କରାଯାଇଛି । ଯାହା ଫଳରେ ସମ୍ବଲପୁରବାସୀ  ଆଜି ବି ଇଣ୍ଟରନେଟ୍ ସେବା ପାଇବାରୁ ବଞ୍ଚିତ ରହିବେ ।   ଆସନ୍ତାକାଲି ୧୦ଟା ପର୍ଯ୍ୟନ୍ତ ସହରରେ ଇଣ୍ଟରନେଟ୍ ସେବା ବନ୍ଦ ରହିବ ବୋଲି  ଜିଲ୍ଲା ପ୍ରଶାସନ ପକ୍ଷରୁ ଘୋଷଣା କରାଯାଇଛି । ଇଣ୍ଟରନେଟ୍ ସେବା ବ୍ୟାଘାତ ଯୋଗୁ ସମ୍ବଲପୁରବାସୀ ଅନେକ ସମସ୍ୟାର ସମ୍ମୁଖୀନ ହେଉଥିବା ଜଣାପଡ଼ିଛି ।

ପୂର୍ବ ଘୋଷଣା ଅନୁଯାୟୀ ଆଜି ଦିନ ୧୦ଟାରେ ଇଣ୍ଟରନେଟ୍ ସେବାରୁ ପୂର୍ବ ପରି ଜାରି ହୋଇଥାନ୍ତା। ହେଲେ ପରିସ୍ଥିତିରେ ସୁଧାର ଆସି ନଥିବା ଯୋଗୁ କଟକଣା ଅବଧକୁ ପୁଣି ଥରେ ବଢାଇ ଦିଆଯାଇଛି। ତେବେ ଆଜିକୁ ମିଶାଇ ଦୀର୍ଘ ୫ ଦିନ ହେବ ସହରବାସୀ ଇଣ୍ଟରନେଟ୍ ସେବାରୁ ବଞ୍ଚିତ ହୋଇଛନ୍ତି ।

ସୂଚନାଥାଉ କି, ହନୁମାନ ଜୟନ୍ତୀ ଶୋଭାଯାତ୍ରାକୁ ନେଇ ସମ୍ବଲପୁରରେ ଦୁଇ ଗୋଷ୍ଠୀଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା। ଫଳରେ ପରିସ୍ଥିତି ଅଶାନ୍ତ ହୋଇପଡ଼ିଥିଲା । ପରିସ୍ଥିତିକୁ ଦେଖି ଜିଲ୍ଲା ପ୍ରଶାସନ ଇଣ୍ଟରନେଟ ସେବା ବନ୍ଦ କରିବା ସହ କର୍ଫ୍ୟୁ ଘୋଷଣା କରିଥିଲେ।

ତେବେ ଆଜି କର୍ଫ୍ୟୁକୁ ଅଧିକ  କୋହଳ କରାଯାଇଛି। ସକାଳ ବେଳା ୬ ଘଣ୍ଟା ଏବଂ ଅପରାହ୍ଣରେ ଅଢ଼େଇ ଘଣ୍ଟା ପାଇଁ କୋହଳ କରାଯାଇଛି କର୍ଫ୍ୟୁ  ।