ଓଡ଼ିଶା ଡଟ୍ ନ୍ୟୁଜ୍

28/06/2024 at 4:08 PM

ସୋର: ଯାଇଥିଲେ କୀର୍ତ୍ତନ କରିବାକୁ । ପୂରା ରାତି ହରିନାମ ଜପ କଲେ । ସକାଳେ କୀର୍ତ୍ତନ ସାରି ଘରକୁ ଫେରୁଥିଲେ । ହେଲେ କିଏ ଜାଣିଥିଲା, ଏହି ହରିନାମ ଜପ ତାଙ୍କ ଜୀବନରେ ଥିଲା ଶେଷ ଜପ ବୋଲି । ସ୍କୁଟିରେ ଫେରୁଥିବା ବେଳେ ପଛରୁ ପିଟିଲା ଟ୍ରକ । ଘଟଣା ସ୍ଥଳରେ ଚାଲିଗଲା ଜଣଙ୍କର ଜୀବନ । ଗୁରୁତର ଅବସ୍ଥାରେ ଆଉ ଦୁଇ ଜଣ ମେଡିକାଲରେ ହୋଇଛନ୍ତି ଭର୍ତ୍ତି । ଏମିତି ଘଟଣା ଘଟିଛି ବାଲେଶ୍ବର ଜିଲ୍ଲା ସୋର ଥାନା ବରଫକଳ ଛକ ନିକଟରେ ।
ଆହତ ଦ୍ୱୟଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ମୃତ ଯୁବକ ଖଇରା ଥାନା ଡାଲଙ୍ଗ ଗାଁର ହୋଇଥିବା ବେଳେ ଆହତ ଦ୍ୱୟ ସୋର ଥାନା ଆଟପୁର ଗାଁର ବୋଲି ଜଣାପଡ଼ିଛି ।
ଆଜି ସକାଳେ ତିନି ଯୁବକ କୀର୍ତ୍ତନ ସାରି ସ୍କୁଟି ଯୋଗେ ଘରକୁ ଫେରୁଥିଲେ । ଏହି ସମୟରେ ବରଫକଳ ଛକ ନିକଟରେ ସେମାନଙ୍କ ସ୍କୁଟିକୁ ଏକ ଟ୍ରକ୍ ପଛରୁ ଧକ୍କା ଦେଇଥିଲା । ଜଣେ ଯୁବକ ସ୍କୁଟିରୁ ଛିଟିକି ତଳେ ପଡ଼ି ଯାଇଥିଲେ। ତାଙ୍କ ଉପରେ ଟ୍ରକ୍ ଚଢ଼ି ଯାଇଥିଲା । ଘଟଣାସ୍ଥଳରେ ଉକ୍ତ ଯୁବକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୨ ଜଣ ଗୁରୁତର ଆହତ ହୋଇଥିଲେ । ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଦୁର୍ଘଟଣା ଘଟାଇଥିବା ଗାଡିକୁ ଜବତ କରି ତଦନ୍ତ ଆରମ୍ଭ କରିଛି ।