ଓଡ଼ିଶା ଡଟ୍ ନ୍ୟୁଜ୍

2/12/2024 at 11:57 AM

ବଲାଙ୍ଗୀର: ହାତୀ ଆକ୍ରମଣରେ ଆହତ ବନ କର୍ମଚାରୀଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ । ଘଟଣା ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ରେଞ୍ଜ ଢୋଲମଣ୍ଡଳ ସେକ୍ସନ ଅଞ୍ଚଳରେ ଘଟିଛି । ମୃତ ବନ କର୍ମଚାରୀ ହେଲେ ରୂପେଶ ଛାତ୍ରିଆ । 

ଗତକାଲି କଣ୍ଟାବାଞ୍ଜି ରେଞ୍ଜ ଢୋଲମଣ୍ଡଳ ସେକ୍ସନର ବାନ୍ଧନପାଲି ଗାଁ ଭିତରକୁ ଏକ ହାତୀ ପଲ ପଶି ଆସିଥିଲେ। ଏହି ସମୟରେ ବନ ବିଭାଗ ଟିମ୍ ହାତୀକୁ ଘଉଡ଼ାଇବାକୁ ଚେଷ୍ଟା କରୁଥିଲେ । ହଠାତ ଏକ ହାତୀ ବନ କର୍ମଚାରୀଙ୍କ ଆକ୍ରମଣ କରିଥିଲା । 

ଆକ୍ରମଣରେ ପାରା ସ୍କ୍ବାଡ୍ ପ୍ରଶାନ୍ତ ନାଏକ, ଗଜସାଥୀ ରୂପେଶ ଛତ୍ରୀଆ ଏବଂ ବନ କର୍ମଚାରୀ ତାରେଶ୍ୱର ରଣା ଗୁରୁତର ହୋଇଥିଲେ । ୩ ଜଣ ଗୁରୁତର ଅବସ୍ଥାରେ ବଲାଙ୍ଗୀର ଭୀମଭୋଇ ମେଡିକାଲରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ଗତରାତିରେ ଗଜସାଥୀ ରୂପେଶଙ୍କ ମୃତ୍ୟୁ ଘଟିଛି । ତେବେ ହାତୀକୁ ଘଉଡ଼ାଇବା ସମୟରେ ପ୍ରୋଟକାଲ ଫଲୋ କରାଯାଇଥିଲା ନା ନାହିଁ, ନିରାପତ୍ତା ପାଇଁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଥିଲା ନା ନାହିଁ, ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।