ମହେନ୍ଦ୍ର କୁମାର ସାଇ

7/12/2024 at 10:31 PM

ମରାମତି ଅଭାବରୁ ମରଣଜନ୍ତା ପାଲଟିଛି ୪୯ ନଂ ଜାତୀୟ ରାଜପଥ
ଝାରସୁଗୁଡା ୭/୧୨ (ଆପ୍ର) ୪୯ ନଂ ଜାତୀୟ ରାଜପଥ ଝାରସୁଗୁଡା ଜିଲ୍ଲାର ବେଳପାହାଡ଼ ଠାରୁ କନକତୋରା ପର୍ଯ୍ୟନ୍ତ ମରାମତି ଅଭାବରୁ ରାସ୍ତାଟି ମରଣଜନ୍ତା ପାଲଟିଛି । ଫଳରେ ରାଜପଥରେ ଯାତାୟାତ ବେଳେ ସାଧାରଣ ଲୋକେ ଦୁର୍ଘଟଣାର ସମ୍ମୁଖୀନ ହୋଇ ଅନେକଙ୍କ ଜୀବନ ଦୀପ ଲିଭି ଯାଉଥିବା ବେଳେ ଆଉ କେତେ ଗୁରୁତର ହୋଇ ବିଭିନ୍ନ ଡାକ୍ତରଖାନାରେ ଚିକିତ୍ସିତ ଅବସ୍ଥାରେ ମୃତ୍ୟୁ ସହ ସଂଗ୍ରାମ କରୁଛନ୍ତି । ଏଭଳି ବାରମ୍ବାର ଦୁର୍ଘଟଣା ଘଟିଥିବା ସତ୍ବେ ସବୁ ଜାଣିଶୁଣି ଏନଏଚଏଆଇ ବିଭାଗ ଏବଂ ଜିଲ୍ଲା ପ୍ରଶାସନ ନୀରବଦ୍ରଷ୍ଟା ସାଜିଥିବା ସାଧାରଣରେ ଅଭିଯୋଗ ହେଉଛି ।
ତଥ୍ୟ ଅନୁଯାୟୀ ଝାରସୁଗୁଡା କନକତୋରା ୪୯ ନଂ ଜାତୀୟ ରାଜପଥ ଦେଇ ଛତିଶଗଡ଼ ତଥା ଅନ୍ୟ ରାଜ୍ୟର ବିଭିନ୍ନ ଶିଳ୍ପ ସଂସ୍ଥା ମାନଙ୍କୁ ପ୍ରତ୍ୟେକ ଦିନ ଶହ ଶହ ସଂଖ୍ୟକ ଭାରିଯାନ ଦ୍ୱାରା କ୍ଷମତା ଠାରୁ ଅଧିକ ମାଲ ପରିବହନ ହେଉଛି । ଯାହା ଫଳରେ ବେଳପାହାଡ଼ ଠାରୁ ସୀମାନ୍ତ କନକତୋରା ପର୍ଯ୍ୟନ୍ତ ଅଧିକାଂଶ ସ୍ଥାନରେ ରାସ୍ତା ଦବି ଯିବା ସହ ରାସ୍ତା ସାରା ଗର୍ତ୍ତ ମାନ ସୃଷ୍ଟି ହୋଇଛି । ଏହାର ରକ୍ଷଣାବେକ୍ଷଣ ଓ ମରାମତି କାର୍ଯ୍ୟ ନିମନ୍ତେ ପ୍ରତି ବର୍ଷ ବିଭାଗ ପକ୍ଷରୁ ଅଜସ୍ର ଟଙ୍କା ମଞ୍ଜୁର ହେଉଛି । କିନ୍ତୁ ତାହା ଠିକ ଭାବେ ବିନିଯୋଗ ନ ହେବା ଫଳରେ ରାଜପଥର ଉଭୟ ପାର୍ଶ୍ଵରେ ଅନାବନା ଘାସ ତଥା ବିଭିନ୍ନ ପ୍ରକାର ଗଛଲତା ଯୋଗୁଁ ଦୁଇ ଓ ଚାରି ଚକିଆ ଯାନବାହନ,ସାଇକେଲ ଚାଳକ ତଥା ପଥଚାରୀ ଯାତାୟାତ ବେଳେ ଦୁର୍ଘଟଣାର ସମ୍ମୁଖୀନ ହେଉଥିବା ଅଭିଯୋଗ ହେଉଛି । ତେଣୁ ଅଞ୍ଚଳବାସୀଙ୍କ ସୁରକ୍ଷା ବ୍ୟବସ୍ଥାକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ତଥା ଜାତୀୟ ରାଜପଥ ବିଭାଗ ଯଥାଶୀଘ୍ର ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ପକ୍ଷରୁ ଦାବି ହେଉଛି ।