ଓଡ଼ିଶା ଡଟ୍ ନ୍ୟୁଜ୍19/02/2025 at 11:42 AM
ଭୁବନେଶ୍ବର: ସାରା ରାଜ୍ୟରେ ଚାଲିଛି ଧାନର କଟନୀ ଛଟନୀ । ବିଧାନସଭାରେ ଏହାକୁ ନେଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଯୋଗାଣ ମନ୍ତ୍ରୀଙ୍କ ଉପରକୁ ଅଙ୍ଗୁଳି ଉଠାଇବା ସହ ସେ ମିଲରଙ୍କ ପାଖରୁ ଲକ୍ଷେ ଲେଖାଏଁ ଟଙ୍କା ନେଉଥିବାର ଗୁରୁତର ଅଭିଯୋଗ କରିଛନ୍ତି । ପ୍ରମାଣ ସ୍ବରୂପ ସିଡି, ଫଟୋ, କାଗଜପତ୍ର ଦେଖାଇ ଯୋଗାଣ ମନ୍ତ୍ରୀଙ୍କୁ ଟାର୍ଗେଟ କରିବା ସହ ଘଟଣାର କ୍ରାଇମବ୍ରାଞ୍ଚ ତଦନ୍ତ ଦାବି କରିଛନ୍ତି ।
ବିଧାନସଭାରେ ମୁଲତବି ପ୍ରସ୍ତାବ ଆଲୋଚନାରେ ସିଡି, ଫଟୋ, ମନ୍ତ୍ରୀଙ୍କ ଦସ୍ତଖସ୍ତ ଥିବା ଚିଠି ଦେଖାଇ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କିପରି ଧାନ କିଣାରେ ଟଙ୍କା ନେଉଛନ୍ତି ତାହା ବଖାଣିଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । ସିଧାସଳଖ ଅଭିଯୋଗ କରି କହିଛନ୍ତି, ଯୋଗାଣ ମନ୍ତ୍ରୀ ରାଜନୈତିକ ସଚିବ ନିଯୁକ୍ତ କରି ମିଲ ପିଛା ଲକ୍ଷ ଲକ୍ଷ ଟଙ୍କା ଉଠାଇଛନ୍ତି । ସିଡିରେ ରହିଛି ବାବୁ ଜଣକ ଟଙ୍କା ମାଗିବାର ତଥ୍ୟ । ଗୃହରେ ତାରାଙ୍କ ଅଭିଯୋଗ ପରେ ବିଧାନସଭାରେ ସୃଷ୍ଟି ହୋଇଛି ହଇଚଇ । ତେଣୁ ପୂରା ଘଟଣାର କ୍ରାଇମବ୍ରାଞ୍ଚ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଦାବି କରିଛି କଂଗ୍ରେସ ।
ସେପଟେ ବିରୋଧୀଙ୍କ ଅଭିଯୋଗକୁ ଖଣ୍ଡନ କରିଛନ୍ତି ଯୋଗାଣ ମନ୍ତ୍ରୀ । ଚଳିତ ଖରିଫ ଋତୁରେ ୧୭ ତାରିଖ ସୁଦ୍ଧା ୧୩ ଲକ୍ଷ ୫୭ ହଜାର ୨୨୪ ଜଣ ଚାଷୀଙ୍କଠାରୁ ୬୧ ଲକ୍ଷ ୬୭ ହଜାର ୪୮୮ ମେଟ୍ରିକ ଟନ ଧାନ କିଣାଯାଇ ଥିବା ମନ୍ତ୍ରୀ କହିଛନ୍ତି । ଏଫଏକ୍ୟୁ ଆଳରେ ଚାଷୀଙ୍କୁ କରାଯାଉଛି ଶୋଷଣ । ଯାହାକୁ ନେଇ ଅନ୍ନଦାତାଙ୍କ ଭିତରେ ତେଜିବାରେ ଲାଗିଛି ଅସନ୍ତୋଷ । ଏଭଳି ସ୍ଥିତିରେ ତାରାଙ୍କ ପ୍ରମାଣ ଏବେ ଯୋଗାଣ ମନ୍ତ୍ରୀଙ୍କୁ ଅଡୁଆ ଭିତରକୁ ଟାଣି ଆଣିଛି ।