ଦୁବାଇ: ୨୦୨୩ ବିଶ୍ବକପ୍ । ଭାରତ- ଅଷ୍ଟ୍ରେଲିଆ ଫାଇନାଲ ମ୍ୟାଚ୍ । ସାରା ବିଶ୍ବରେ ଥିବା ଭାରତୀୟ କ୍ରିକେଟରଙ୍କ ପ୍ରଶଂସକ ଚାହିଁ ବସିଥିଲେ କେତେବେଳେ ମେନ୍ ଇନ୍ ବ୍ଲ୍ୟୁ ଟ୍ରଫି ଉଠାଇବେ । ହେଲେ ଶହ ଶହ କୋଟି ପ୍ରଶଂସକଙ୍କ ହୃଦୟ ଭାଙ୍ଗି ଦେଇଥିଲା କଙ୍ଗାରୁ ଦଳ । ଆଉ ଭାରତକୁ ଫାଇନାଲରେ ହରାଇ ହାତେଇ ହୋଇଥିଲା ବିଶ୍ବ ବିଜୟ । ଆଜି ବି ସେ ଦିନ ମନେ ପଡ଼ିଲେ ଭାରତୀୟ କ୍ରିକେଟରଙ୍କ ଆଖିରେ ଲୁହ ଆସିଯାଏ । ହେଲେ ଏବେ ସେ ପୁରୁଣା କଥାକୁ ମନେ ପକାଇ କାନ୍ଦିବାର ସମୟ ଚାଲି ଯାଇଛି । କାରଣ ୨୦୨୩ ବିଶ୍ବକପ ପରାଜୟର ପ୍ରତିଶୋଧ ୨୦୨୫ ଚମ୍ପିନ୍ସସ ଟ୍ରଫିରେ କଙ୍ଗାରୁ ଶିକାର କରି ନେଇଛି ଭାରତ । ଗତକାଲି ଖେଳା ଯାଇଥିବା ହାଇ ଭୋଲଟେଜ ପ୍ରଥମ ସେମି-ଫାଇନାଲରେ ଅଷ୍ଟ୍ରେଲିଆକୁ ଚିତପଟ୍ଟାଙ୍ଗ କରି ଭାରତ ଫାଇନାଲରେ ପ୍ରବେଶ କରିଛି । ଆଉ ସହ ୨୩ ବିଶ୍ବକପର ବଦଲା ୨୫ରେ ନେଇଛି ।
ଗତକାଲି ଦୁବାଇ ଇଣ୍ଟର ନ୍ୟାସନାଲ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ଭାରତ ୪ ଓ୍ବିକେଟରେ ଜିତି ନେଇଛି । ୨୬୫ ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଭାରତୀୟ ଟିମ୍ ୬ ଓ୍ବିକେଟ୍ ହରାଇ ଲକ୍ଷ୍ୟ ହାସଲ କରିନେଇଛି । ଆଉ ଏହାସହ ପ୍ରଥମ ଦଳ ଭାବେ ଚମ୍ପିୟନ୍ସ ଟ୍ରଫି ଫାଇନାଲରେ ପ୍ରବେଶ କରିଛି ।
ମ୍ୟାଚରେ ଭାରତୀୟ ଖେଳାଳିଙ୍କ ଧର୍ଯ୍ୟପୂର୍ଣ୍ଣ ବାଟିଂ ଦେଖିବାକୁ ମିଳିଥିଲା । ଦୁଇ ଓପ୍ନର ରୋହିତ ଶର୍ମା ଏବଂ ଶୁଭମନ ଗିଲ୍ ଧର୍ଯ୍ୟର ସହ ଇଂନିସ୍ ଆରମ୍ଭ କରିଥିଲେ । ହେଲେ ଗିଲ୍ ବଡ଼ ସ୍କୋର କରିବାରେ ବିଫଳ ହୋଇଥିଲେ । ୧୧ ବଲରୁ ମାତ୍ର ୮ ରନ କରି ଗିଲ ଆଉଟ ହୋଇଯାଇଥିଲେ । ଏହାପରେ ପଡ଼ିଆକୁ ଆସିଥିଲେ ବିରାଟ କୋହଲି । ରୋହିତ ଭଲ ଆରମ୍ଭ ଦେଇଥିଲେ ବି ବଡ଼ ସ୍କୋର କରିପାରି ନଥିଲେ । ୨୯ ବଲରୁ ୨୮ ରନ୍ କରି ରୋହିତ ଆଉଟ ହୋଇଯାଇଥିଲେ । ୪୩ ରନରେ ଦୁଇ ଓପ୍ନରଙ୍କ ଆଉଟ ପରେ ଭାରତ ଉପରେ ଚାପ ବଢ଼ି ଯାଇଥିଲା । ଆଉ ଏହି ସମୟରେ କୋହଲିଙ୍କୁ ସାଥ ଦେବାକୁ ଓହ୍ଲାଇଥିଲେ ଶ୍ରେୟସ ଆୟର । ବିରୋଟଙ୍କ ସହ ମିଶି ସେ ଧର୍ଯ୍ୟର ସହ ବ୍ୟାଟିଂ କରିବା ସହ ସ୍ଥିତିକୁ ସମ୍ଭାଳି ଥିଲେ । ଆୟର ୬୨ ବଲରେ ୪୫ ରନ୍ କରି ଆଉଟ ହେବା ପରେ ଅକ୍ଷର ପଟେଲ ଫିଲ୍ଡକୁ ଆସିଥିଲେ । ସେ ମଧ୍ୟ ବିରାଟଙ୍କ ଭଲ ସାଥ ଦେଇଥିଲେ । ୩୦ ବଲରେ ୨୭ ରନ୍ କରି ସେଟ୍ ହୋଇ ଆସୁଥିବା ବେଳେ କ୍ଲିନ ବୋଲ୍ଡ ହୋଇଯାଇଥିଲେ । ତେବେ ଅକ୍ଷରଙ୍କ ପରେ ଫିଲ୍ଡକୁ ଆସିଥିଲେ କେ.ଏଲ. ରାହୁଲ । ଆରମ୍ଭରୁ ଏକ, ଦୁଇ ରନ୍ ଉପରେ ଫୋକସ କରିଥିଲେ । ଆଉ ଅନ୍ୟପଟେ ବିରାଟ ଚୌକା, ଛକା ଛାଡ଼ି ସିଙ୍ଗଲରେ ରନ୍ କରି ୮୪ ରନରେ ପହଞ୍ଚି ଯାଇଥିଲେ । ବିରାଟ ସହଜରେ ଶତକ ମାରିବା ସହ ଭାରତର ବିଜୟ ମୁଣ୍ଡି ମାରି ଫେରିବା ପରି ଲାଗୁଥିବା ବେଳେ, ଏକ ବଡ଼ ସର୍ଟ ଖେଳିବା ଛକ୍କରରେ ଜାମ୍ପାଙ୍କ ଦ୍ବାରା ଆଉଟ୍ ହୋଇଯାଇଥିଲେ । ଏହାପରେ ଫିଲ୍ଡକୁ ଆସିଥିଲେ ହାର୍ଦ୍ଦିକ ପାଣ୍ଡ୍ୟା । ଆଉ ଚିରାଚରିତ ଢଙ୍ଗରେ ୩ଟି ବିଶାଳ ଛକା ଓ ଗୋଟିଏ ଚୌକା ସହାୟତାରେ ବିସ୍ଫୋରକ ୨୮ ରନ କରି ଅଷ୍ଟ୍ରେଲିଆର ବିଜୟ ଆଶାକୁ ଧୂଳିସାତ କରି ଦେଇଥିଲେ । ବିଜୟ ପାଇଁ ୪ ରନ୍ ବାକି ଥିବା ବେଳେ ରାହୁଲ ଏକ ବିରାଟ ଛକା ମରି ଭାରତକୁ ବିଜୟ ମୁକୁଟ ପିନ୍ଧାଇ ଥିଲେ ।
ଅଷ୍ଟ୍ରେଲିଆ ପକ୍ଷରୁ ନାଥନ ଏଲିସ ଏବଂ ଆଦମ ଜାମ୍ପା ଦୁଇଟି ଲେଖାଏଁ ଓ୍ବିକେଟ୍ ନେଇଥିଲେ । ସେହିପରି ଦ୍ବାରଶୁଇସ୍ ଓ କୁପର କନୋଲି ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।
ଟସ୍ ଜିତିବା ପରେ ବ୍ୟାଟିଂ ନିଷ୍ପତ୍ତି ନେଇଥିଲା ଆଷ୍ଟ୍ରେଲିଆ । ୫୦ ଓଭରରେ ଦଳ ସମସ୍ତ ଓ୍ବିକେଟ ହରାଇ ୨୬୪ ରନ୍ କରିଥିଲା । ଦଳ ପକ୍ଷରୁ ଟ୍ରାଭିସ୍ ହେଡ ୩୯, ଲାବୁଶାନ ୨୯, ସ୍ମିଥ ୭୩, ଆଲେକ୍ସ କେରୀ ୬୧, ଗ୍ଲେନ ମାକ୍ସଓ୍ବେଲ ୭, ବେନ ଦ୍ବାରଶୁଇସ୍ ୧୯ ଓ ଜାମ୍ପା ୭ ରନ କରିଥିଲେ । ଭାରତ ପକ୍ଷରୁ ମହମ୍ମଦ ସାମି ୩ଟି ଓ୍ବିକେଟ ନେଇଥିବା ବେଳେ ବରୁଣ ଚକ୍ରବର୍ତ୍ତି ଏବଂ ରବୀନ୍ଦ୍ର ଜାଡେଜା ଦୁଇଟି ଲେଖାଏଁ ଓ୍ବିକେଟ୍ ନେଇଥିଲେ । ସେହିପରି ଅକ୍ଷର ପଟେଲ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କୁ ଗୋଟିଏ ଲେଖାଏଁ ଓ୍ବିକେଟ ମିଳିଥିଲା ।