ଓଡ଼ିଶା ଡଟ୍ ନ୍ୟୁଜ୍

5/04/2025 at 11:26 AM

ଭୁବନେଶ୍ବର: ବିଜେଡି-ବିଜେପି ସମ୍ପର୍କକୁ ନେଇ ପ୍ରଶ୍ନ ଉଠାଇଲା କଂଗ୍ରେସ । କହିଲା, ଦୁଇ ଦଳ ମଧ୍ୟରେ ଚାଲିଛି ସଲାସୁତରା । ମେଣ୍ଟ କରିଛନ୍ତି ବିଜେଡି ବିଜେପି ଦଳ । ସଂସଦ ଓ ବିଧାନସଭାରେ ବିଜେପିକୁ ବିଜେଡି କାହିଁକି ସମର୍ଥନ କରୁଛି ବୋଲି ଦଳ ପ୍ରଶ୍ନ କରିଛି । ପରାଜୟ ପରେ ନବୀନ ଭୟଭିତ କି ତାଙ୍କ ନିର୍ଦ୍ଦେଶକୁ ବିଜେଡି ନେତା ମାନୁନାହାନ୍ତି ବୋଲି ମଧ୍ୟ ପଚାରିଛି କଂଗ୍ରେସ । ସୋସିଆଲ ମିଡିଆରେ କଂଗ୍ରେସର ଏପରି ପ୍ରତିକ୍ରିୟା ରାଜ୍ୟ ରାଜନୀତିକୁ ସରଗରମ କରିଛି ।

ଦଳ ପକ୍ଷରୁ କୁହାଯାଇଛି, କେନ୍ଦ୍ର ଆଣିଲା ୱାକଫ୍‌ ବିଲ୍‌ । ଏହାକୁ ବିଜେଡି ସମର୍ଥନ କଲା । ରାଜ୍ୟ ଆଣିଲା ବିଶ୍ବବିଦ୍ୟାଳୟ ବିଲ୍ । ସାରାରାତି ବିଜେଡି କଲା ଆଲୋଚନା । କେନ୍ଦ୍ରରେ ବିଜେପି ସରକାର ଓ ରାଜ୍ୟରେ ବି ବିଜେପି ସରକାର । ଏକା ଥରେ ଦୁଇ ଦୁଇଟି ଐତିହାସିକ ବିଲ୍‌ ପାରିତ କରିଛନ୍ତି । ସାରା ରାତି ଗୃହ ଚଳାଇ ଇତିହାସ ସୃଷ୍ଟି କରିଛନ୍ତି । ଯାହାକୁ ଖୋଲା ଖୋଲି ଦୀର୍ଘ ସମୟ ଧରି ଆଲୋଚନା କରିବା ପରେ ବିଜେଡି ନେତା ସରକାରଙ୍କୁ ସମର୍ଥନ କରିଛନ୍ତି ।

କଂଗ୍ରେସର ଯୁକ୍ତି ହେଲା, ରାଜ୍ୟରେ ବିଜେଡି-ବିଜେପି ମେଣ୍ଟ କାଏମ ରହିଛି । ସୋସିଆଲ୍‌ ମିଡିଆ ‘ଏକ୍ସ’ରେ ରାଜ୍ୟ କଂଗ୍ରେସ କହିଛି, ରାଜ୍ୟସଭାରେ ୱାକଫ୍‌ ବିଲ୍‌କୁ ବିବେକ ଅନୁସାରେ ଭୋଟିଂ କରିବାକୁ ବିଜେଡି ନିଜ ସାଂସଦଙ୍କୁ କହିଥିଲା । ବିଲ୍‌ ସପକ୍ଷରେ ବିଜେଡିର ବରିଷ୍ଠ ସାଂସଦ ସସ୍ମିତ ପାତ୍ର ଭୋଟ୍‌ ଦେଇଛନ୍ତି । ରାଜ୍ୟରେ ବିଜେଡି-ବିଜେପି ମଧ୍ୟରେ ମେଣ୍ଟ କାଏମ ରହିଛି । ପରସ୍ପର ମଧ୍ୟରେ ସଲାସୁତରାରେ ସେମାନେ ଓଡ଼ିଶା ଜନତାଙ୍କୁ ଠକି ଚାଲିଛନ୍ତି ।

କଂଗ୍ରେସର ଅଭିଯୋଗ ପରେ ବିଜେଡି ବରିଷ୍ଠ ନତା ତଥା ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ଏନେଇ ଆମ ନେତାଙ୍କ ସହ ଆଲୋଚନା ହେବ ।