ଓଡ଼ିଶା ଡଟ୍ ନ୍ୟୁଜ୍11/04/2025 at 12:19 PM
କାଠମାଣ୍ଡୁ: ନେପାଳର ରାଜ ହିନ୍ଦୁତ୍ବର ପ୍ରତୀକ । ରାଜା ହିଁ ଥିଲେ ନେପାଳର ଭାବ୍ୟ ବିଧାତା । ତେବେ ୧୭ ବର୍ଷ ପୂର୍ବେ ଅର୍ଥାତ ୨୦୦୮ରେ ନେପାଳରେ ରାଜତନ୍ତ୍ରର ଅନ୍ତ ଘଟିଥିଲା । ହେଲେ ଏବେ ସ୍ଥିତି ବଦଳିବାରେ ଲାଗିଛି । ବର୍ତ୍ତମାନର ରାଜନୈତକ ଦଳ ଓ ସରକାର ନେପାଳବାସୀଙ୍କ ବିଶ୍ବାସ ହରାଇବାକୁ ଲାଗିଛନ୍ତି । ଏମିତି ସ୍ଥିତିରେ ନେପାଳରେ ପୁଣି ଥରେ ରାଜତନ୍ତ୍ର ପ୍ରତିଷ୍ଠା ପାଇଁ ସପକ୍ଷବାଦୀ ସ୍ବର ଉଠାଇବାରେ ଲାଗିଛନ୍ତି । କେବଳ ସ୍ବାର ଉଠାଉ ନାହାନ୍ତି, ସେମାନଙ୍କ ଦାବି ପୂରଣ ପାଇଁ ସାରା ଦେଶରେ ବିକ୍ଷୋଭ ଓ ରାଲିମାନ ଦେଖିବାକୁ ମିଳୁଛି ।
ମିଳିଥିବା ସୂଚନା ଅନୁସାରେ, ନେପାଳରେ ରାଜା ଶାସନ ପ୍ରତି ଆଗ୍ରହ ବଢୁଛି । ଦେଶର ବିଭିନ୍ନ ସ୍ଥାନରେ ଜାରି ରହିଛି ରାଜତନ୍ତ୍ର ସପକ୍ଷବାଦୀ ଆନ୍ଦୋଳନ । ଦେଶରେ ଅର୍ଥନୈତିକ ଅସ୍ଥିରତା ଓ ବର୍ତ୍ତମାନର ନେତାଙ୍କ ଉପରେ ଲୋକଙ୍କ ବିଶ୍ବାସର ଅଭାବକୁ କେନ୍ଦ୍ର କରି ଦେଶରେ ଅସନ୍ତୋଷ ବଢୁଛି । ଗତମାସରୁ ବିଭିନ୍ନ ସ୍ଥାନରେ ବିକ୍ଷୋଭ ଜାରି ରହିଛି ।
ରାଜତନ୍ତ୍ର ସପକ୍ଷବାଦୀ ଦଳ ରାଷ୍ଟ୍ରୀୟ ପ୍ରଜାତନ୍ତ୍ର ପାର୍ଟି ବା ଆରପିପି ଅଧ୍ୟକ୍ଷ ରାଜେନ୍ଦ୍ର ଲିଙ୍ଗଦେନ କହିଛନ୍ତି, ରାଜା ହେଉଛନ୍ତି ଜାତୀୟତାବାଦ ଓ ଗର୍ବର ପ୍ରତୀକ । ୨୦୧୭ରେ ଆରପିପି ଗୋଟିଏ ସାଂସଦ ପଦ ଜିଣିଥିବାବେଳେ ୨୦୨୨ ନିର୍ବାଚନରେ ଦଳ ୧୪ ଆସନ ହାତେଇବାରେ ସଫଳ ହୋଇଥିଲା । ରାଜତନ୍ତ୍ର ସପକ୍ଷରେ ଓ ହିନ୍ଦୁତ୍ବବାଦୀ ଆଭିମୁଖ୍ୟ ନେଇଥିବାରୁ ଦଳର ବିଶେଷ ସଫଳତା ହାସଲ କରିଥିଲା । ରାଜା ବୀରେନ୍ଦ୍ର ବୀର ବିକ୍ରମ ଶାହ ଓ ପରିବାରର ସଦସ୍ୟଙ୍କୁ ହତ୍ୟା କରାଯିବା ପରେ ୨୦୦୧ରେ ଭାଇ ଜ୍ଞାନେନ୍ଦ୍ର ବୀର ବିକ୍ରମ ଶାହା ରାଜା ହୋଇଥିଲେ । ୨୦୦୫ରେ ଜ୍ଞାନେନ୍ଦ୍ର ସମ୍ବିଧାନକୁ ରଦ୍ଦ କରିଥିଲେ ଏବଂ ପାର୍ଲାମେଣ୍ଟ ଭଙ୍ଗ କରିଥିଲେ । ଏହାକୁ ନେଇ ଦେଶରେ ମାଓବାଦୀମାନେ ଉତ୍ତ୍ୟକ୍ତ ହୋଇଥିଲେ । ଶେଷରେ ୨୦୦୮ରେ ନେପାଳରେ ୨୪୦ ବର୍ଷର ହିନ୍ଦୁ ରାଜତ୍ବର ଅବସାନ ହୋଇ ଗଣତନ୍ତ୍ର ପ୍ରତିଷ୍ଠା ହୋଇଥିଲା ।