ଚକା ଜୁତା ନାରେ ତୋଫାନ ଶବର ପାଲଟିଲାଣି ସ୍କେଟିଙ୍ଗ ବଏ
ସମ୍ବଲପୁର:ନାମଟି ତୋଫାନ ଶବର l ରେଢ଼ାଖୋଲ ବ୍ଲକ ଅନ୍ତର୍ଗତ ବୁରଡ଼ା ପଞ୍ଚାୟତର ବଡ଼ମାଳ ଗ୍ରାମରେ ଘର ତାର l ବୟସ କୋଡିଏ l ସ୍କେଟିଙ୍ଗ ପ୍ରତି ଆଗ୍ରହ ବହୁତ l କିନ୍ତୁ ଯେଉଁ ଖେଳ ପ୍ରତି ତାର ଆଗ୍ରହ ତାର ସେହି ଖେଳର ନାଁ ମଧ୍ୟ ଜାଣିନାହିଁ ସେ l ସ୍କେଟିଙ୍ଗ ବୋଲି ତା ପାଟିରେ ପସେନି।ଖେଳର ନାମ ଚକାଜୁତା ବୋଲି କହେ ସେ l ବାପ ଆଉ ପୁଅ ଦୁଇଜଣ l ମାଆ ତାର ବହୁ ବର୍ଷ ପୂର୍ବେ ଆର ପାରିକୁ ଚାଲି ଯାଇଚି l ଇଟାରେ ତିଆରି ଘର ଉପରେ ଭଙ୍ଗା ଟାଇଲ, କିନ୍ତୁ ଘର ଦୁଆର ରେ ନାହିଁ କବାଟ, ଭଙ୍ଗା କାନ୍ଥ l କେତେବେଳେ ଘର ଭିତରେ ଜୀବଜନ୍ତୁ ମଧ୍ୟ ପସିଯାଆନ୍ତି l ତା ବଦଳରେ ଦୁଆର ମୁହଁ କବାଟରେ କପଡା ଢଙ୍କା ହୋଇଛି l ବାପ ମୂଳ ମଜୁରୀ କରେ ଆଉ ପୁଅ କେନ୍ଦ୍ରାପଡ଼ା ଯାଇ ଧାନ ମିଲ ରେ କାମ କରେ l ପାଠ ପଢିନାହିଁ, ତେଣୁ ଧାନ ମିଲରେ ଧାନ ବସ୍ତା ଟ୍ରକରେ ଲୋଡ ଅନଲୋଡ କରେ ସେ l ଆଜିର ଦୁନିଆରେ ନିଜ ପାଖରେ ମୋବାଇଲ କିଣିବାକୁ ପଇସା ନାହିଁ ତା ପାଖରେ ତେଣୁ ସମୟ ପାଇଲେ ଅନ୍ୟ କାହାର ମୋବାଇଲରେ ୟୁ ଟ୍ୟୁବରେ ଚକାଜୁତା ଦେଖେ ବୋଲି କୁହେ ସେ l ସେଠାରୁ ତାର ଆରମ୍ଭ ହୁଏ ଚକାଜୁତା ଖେଳ ପ୍ରତି ଆଗ୍ରହ l ବହୁ କଷ୍ଟରେ ତାର ଉପାର୍ଜିତ ଅର୍ଥରୁ ପଚିଶ ଶହ ଟଙ୍କାରେ ଚକାଜୁତା କିଣି ଆରମ୍ଭ କଲା ଅଭ୍ୟାସ l ବର୍ତ୍ତମାନ ତାକୁ ଦେଖିଲେ ମଧ୍ୟ ଜାଣିହେବ ନାହିଁ ଯେ ସେ ଏତେ ଅଳ୍ପ ସମୟ ମଧ୍ୟରେ ଏତେ ସୁନ୍ଦର ଭାବରେ ଅଭ୍ୟାସ ଜାରି ରଖିଛି ବୋଲି l ସରକାରୀ ସ୍ତରରେ ଅଞ୍ଚଳର ବିକାଶ କ୍ଷେତ୍ରରେ ଯେମିତି ଭାବରେ ସଚେତନ ଅଛନ୍ତି, ସେହିପରି ଭାବରେ ଗ୍ରାମାଞ୍ଚଳ ମାନଙ୍କରେ ତୋଫାନ ଶବର ଭଳି ଗାଁ ର ଗରିବ ପ୍ରତିଭାମାନଙ୍କ ଉପରେ ଯଦି ସରକାର ନଜର ଦେବେ ତାହେଲେ ଏଇଭଳି ପ୍ରତିଭା ଲୋକଲୋଚନକୁ ଆସିପାରନ୍ତେ ଏବଂ ଗ୍ରାମାଞ୍ଚଳ ମାନଙ୍କରେ ଯୁବ ପ୍ରତିଭା ମାନଙ୍କର ଖେଳ ପ୍ରତି ଆଗ୍ରହ ବଢନ୍ତା ବୋଲି ବୁରଡ଼ା ସରପଞ୍ଚ ରାଜା ପାଳ କହିଛନ୍ତି।
