କଲମ୍ବିଆରେ ରାଷ୍ଟ୍ରପତି ପ୍ରାର୍ଥୀଙ୍କୁ ଗୁଳିମାଡ଼

ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

କଲମ୍ବିଆ: କଲମ୍ବିଆରେ ଆଶାୟୀ ରାଷ୍ଟ୍ରପତି ପ୍ରାର୍ଥୀ ମିଗୁଏଲ ଉରିବେ ଟର୍ବେଙ୍କୁ ଗୁଳି କରାଯାଇଛି। ସେନେଟର ଥିବା ମିଗୁଏଲ ଉରିବେ ଟର୍ବେ ମଧ୍ୟ ଆଗାମୀ ବର୍ଷ ରାଷ୍ଟ୍ରପତି ନିର୍ବାଚନ ପାଇଁ ଜଣେ ସମ୍ଭାବ୍ୟ ପ୍ରାର୍ଥୀ। ସେ ଶନିବାର ବୋଗୋଟାରେ ଏକ ନିର୍ବାଚନୀ ରାଲି କରୁଥିବା ସମୟରେ ତାଙ୍କ ମୁଣ୍ଡରେ ଗୁଳି ବାଜିଥିଲା। ସେ ଗୁରୁତର ଆହତ ହୋଇଥିଲେ। ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।

ଡେମୋକ୍ରାଟିକ୍ ସେଣ୍ଟର ପାର୍ଟି ଏହାକୁ ନିର୍ମମ ହିଂସା ବୋଲି କହିଛି। ତାଙ୍କ ଦଳ କହିଛି ଯେ ଫଣ୍ଟିବନ୍ ପଡ଼ୋଶୀର ଏକ ପାର୍କରେ ଆକ୍ରମଣ ହୋଇଥିଲା, ଯେତେବେଳେ ସଶସ୍ତ୍ର ଆକ୍ରମଣକାରୀମାନେ ତାଙ୍କୁ ପଛରୁ ଗୁଳି କରିଥିଲେ।ବୋଗୋଟା ମେୟର କାର୍ଲୋସ ଗାଲାନ ସୋସିଆଲ ମିଡିଆ ପ୍ଲାଟଫର୍ମ X ରେ କହିଛନ୍ତି ଯେ ସନ୍ଦିଗ୍ଧ ଗୁଳି ଚାଳକଙ୍କୁ ଗିରଫ କରାଯାଇଛି। ସ୍ଥାନୀୟ ଅଧିକାରୀ ଏବଂ ପୋଲିସ ଦଳ ସମ୍ପୂର୍ଣ୍ଣ ମାମଲା ତଦନ୍ତ କରୁଛନ୍ତି। ଆକ୍ରମଣକାରୀଙ୍କୁ ପଚରାଉଚରା କରାଯାଉଛି।

ତେବେ ମେ ୨୦୨୬ରେ କଲମ୍ବିଆରେ ରାଷ୍ଟ୍ରପତି ନିର୍ବାଚନ ହେବ। ମିଗୁଏଲ ଉରିବେ ଟର୍ବେଙ୍କୁ ସମ୍ଭାବ୍ୟ ରାଷ୍ଟ୍ରପତି ପ୍ରାର୍ଥୀ ଭାବରେ ବିବେଚନା କରାଯାଏ। ଯେଉଁଥିପାଇଁ ସେ ସାରା ଦେଶରେ ନିର୍ବାଚନୀ ରାଲି ମଧ୍ୟ କରୁଛନ୍ତି।