ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ11/06/2025 at 1:07 PM
ନୂଆଦିଲ୍ଲୀ: ଇନ୍ଦୋରର ରାଜା ରଘୁବଂଶୀ ହତ୍ୟା ମାମଲାରେ ନିରନ୍ତର ନୂଆ ନୂଆ ଖୁଲାସା ହେଉଛି। ଏହି ଚାଞ୍ଚଲ୍ୟକର ମାମଲାରେ ପତ୍ନୀ ସୋନମଙ୍କୁ ସମ୍ପୂର୍ଣ୍ଣ ଷଡ଼ଯନ୍ତ୍ରର ଅଭିଯୁକ୍ତ କୁହାଯାଇଛି। ମେ ୨୩ ତାରିଖରୁ ନିଖୋଜ ଥିବା ସୋନମଙ୍କୁ ପ୍ରାୟ ୧୭ ଦିନ ପରେ ୟୁପିର ଗାଜିପୁରରୁ ଗିରଫ କରାଯାଇଥିଲା। ସେ ପୋଲିସ ନିକଟରେ ଆତ୍ମସମର୍ପଣ କରିଥିଲେ।
ଏବେ ମେଘାଳୟ ପୋଲିସ ସୋନମଙ୍କୁ ଟ୍ରାଞ୍ଜିଟ୍ ରିମାଣ୍ଡରେ ଶିଲଙ୍ଗ ନେଇଯାଉଛି। ଏହି ସମୟରେ ବଲିଉଡ୍ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରାଣାୱତ ଏହି ମାମଲାରେ ପ୍ରତିକ୍ରିୟା ଦେଇଛନ୍ତି। ରାଜା ରଘୁବଂଶୀଙ୍କ ହତ୍ୟା ମାମଲାରେ ସେ ସୋନମଙ୍କ ଉପରେ ବର୍ଷିଛନ୍ତି। ସେ ସୋନମଙ୍କୁ ମୂର୍ଖ କହିଛନ୍ତି। ହିମାଚଳ ପ୍ରଦେଶର ମଣ୍ଡି ଲୋକସଭା ଆସନର ସାଂସଦ କଙ୍ଗନା ରାଣାୱତ ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ ରାଜା ଏବଂ ସୋନମ ରଘୁବଂଶୀଙ୍କ ଫଟୋ ସହିତ ଏକ ଷ୍ଟୋରୀ ସେୟାର କରିଛନ୍ତି।
ସେ ଏହି ଘଟଣାକୁ ଦୁର୍ଭାଗ୍ୟଜନକ, ନିଷ୍ଠୁର, ଜଘନ୍ୟ ଏବଂ ସର୍ବୋପରି ଅବାନ୍ତର ବୋଲି କହିଛନ୍ତି। କଙ୍ଗନା ରାଣାୱତ ଲେଖିଛନ୍ତି, ‘ଏହା କେତେ ଦୁର୍ଭାଗ୍ୟଜନକ! ଜଣେ ମହିଳା ବିବାହକୁ ମନା କରିପାରିବେ ନାହିଁ କାରଣ ସେ ନିଜ ପିତାମାତାଙ୍କୁ ଭୟ କରନ୍ତି କିନ୍ତୁ ସେ ଜଣେ କଣ୍ଟ୍ରାକ୍ଟ କିଲର ସହିତ ଏକ ହତ୍ୟା ଯୋଜନା କରିପାରିବେ।’ଏହା କେତେ ନିଷ୍ଠୁର, ଘୃଣ୍ୟ ଏବଂ ମୂର୍ଖତାପୂର୍ଣ୍ଣ ପଦକ୍ଷେପ ଥିଲା। ଏପରି ମୂର୍ଖ ଲୋକଙ୍କୁ କେବେବି ହାଲୁକା ଭାବରେ ନିଆଯିବା ଉଚିତ୍ ନୁହେଁ। ସେମାନେ ଯେକୌଣସି ସମାଜ ପାଇଁ ସବୁଠାରୁ ବଡ଼ ବିପଦ।