ମୁକେଶ ଅମ୍ବାନୀ ପୁଣି ଥରେ ଦେଶର ସବୁଠାରୁ ଧନୀ ବ୍ୟକ୍ତିର ମାନ୍ୟତା ପାଇଛନ୍ତି, ତାଙ୍କର ମୋଟ ସମ୍ପତ୍ତି ପ୍ରାୟ ୯.୫ ଲକ୍ଷ କୋଟି
ଜୁଲାଇ ମାସ ପାଇଁ ଫୋର୍ବସ୍ ବିଶ୍ୱର ଶ୍ରେଷ୍ଠ ଧନୀ ବ୍ୟକ୍ତିଙ୍କ ତାଲିକା ପ୍ରକାଶ କରିଛି । ଏହି ତାଲିକା ପ୍ରକାଶିତ ହେବା ପରେ ଭାରତରେ ଧନୀକଙ୍କୁ ନେଇ ଚର୍ଚ୍ଚା ହୁଏ । ଫୋର୍ବସର ସଦ୍ୟତମ ତାଲିକା ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ରିଲାଏନ୍ସ ଇଣ୍ଡଷ୍ଟ୍ରିଜ୍ ଅଧ୍ୟକ୍ଷ ମୁକେଶ ଅମ୍ବାନୀ ପୁଣି ଥରେ ଦେଶର ସବୁଠାରୁ ଧନୀ ବ୍ୟକ୍ତିର ମାନ୍ୟତା ପାଇଛନ୍ତି ।
ତାଙ୍କର ମୋଟ ସମ୍ପତ୍ତି ବର୍ତ୍ତମାନ ପ୍ରାୟ ୧୧୬ ବିଲିୟନ ଡଲାର (ପ୍ରାୟ ୯.୫ ଲକ୍ଷ କୋଟି)ରେ ପହଞ୍ଚିଛି । ଏହା ତାଙ୍କୁ କେବଳ ଭାରତରେ ନୁହେଁ ବରଂ ସମଗ୍ର ଏସିଆର ସବୁଠାରୁ ଧନୀ ବ୍ୟକ୍ତି ଭାବରେ ଉଭା କରିଛି ।
ମୁକେଶ ଅମ୍ବାନୀଙ୍କ ପରେ ଗୌତମ ଆଦାନୀ ଦ୍ୱିତୀୟ ସ୍ଥାନରେ ଅଛନ୍ତି । ତାଙ୍କ ସମ୍ପତ୍ତି ପ୍ରାୟ ୮୪ ବିଲିୟନ ଡଲାର ହେବ ବୋଲି ଆକଳନ କରାଯାଇଛି। ଆଦାନୀ ଗ୍ରୁପର ବ୍ୟବସାୟ ବିଶେଷକରି ଶକ୍ତି, ବନ୍ଦର ଏବଂ ଭିତ୍ତିଭୂମି କ୍ଷେତ୍ରରେ ପ୍ରମୁଖ ଭୂମିକା ନେଇଛି । ଯଦିଓ ଗତ ବର୍ଷଗୁଡ଼ିକରେ କିଛି ବିବାଦ ଏବଂ ବଜାରରେ ଉତ୍ଥାନ-ପତନ ଯୋଗୁଁ ତାଙ୍କର ରାଙ୍କିଂ ପରିବର୍ତ୍ତନ ହୋଇଛି, ତଥାପି ସେ ଶୀର୍ଷ ୨ରେ ରହିଛନ୍ତି । ତୃତୀୟ ସ୍ଥାନରେ ଅଛନ୍ତି ଟେକ୍ନୋଲୋଜି ମହାରଥି ଏବଂ HCL ଟେକ୍ ପ୍ରତିଷ୍ଠାତା ଶିବ ନାଦର । ତାଙ୍କ ସମ୍ପତ୍ତିର ମୂଲ୍ୟ ପ୍ରାୟ ୩୬.୯ ବିଲିୟନ ଡଲାର ।
ସେହିପରି ଭାରତର ସବୁଠାରୁ ଧନୀ ମହିଳା ସାବିତ୍ରୀ ଜିନ୍ଦଲ ଚତୁର୍ଥ ସ୍ଥାନରେ ଅଛନ୍ତି । ତାଙ୍କ ପାଖରେ ୩୩.୫ ବିଲିୟନ ଡଲାର ମୂଲ୍ୟର ସମ୍ପତ୍ତି ରହିଛି । ଶ୍ରେଷ୍ଠ ୧୦ ତାଲିକାରେ ଥିବା ଅନ୍ୟ ବ୍ୟକ୍ତିମାନେ ହେଉଛନ୍ତି, ଦିଲୀପ ସାଙ୍ଗଭି (ସନ୍ ଫାର୍ମା), ସାଇରସ୍ ପୁନାୱାଲା (ସେରମ ଇନଷ୍ଟିଚ୍ୟୁଟ୍), କୁଶଲ ପାଲ ସିଂହ (ଡିଏଲଏଫ), କୁମାର ମଙ୍ଗଳମ୍ ବିର୍ଲା (ଆଦିତ୍ୟ ବିର୍ଲା ଗ୍ରୁପ୍), ରାଧାକିଶନ ଦମାନି (ଡିମାର୍ଟ) ଏବଂ ଲକ୍ଷ୍ମୀ ମିତ୍ତଲ (ଆର୍ସେଲର ମିତ୍ତଲ) ।
ଏହି ତାଲିକାରୁ ଗୋଟିଏ କଥା ସ୍ପଷ୍ଟ ଯେ, ଭାରତୀୟ ଶିଳ୍ପପତିମାନେ କେବଳ ଦେଶରେ ନୁହେଁ ବରଂ ବିଶ୍ୱ ସ୍ତରରେ ମଧ୍ୟ ନିଜର ଦବଦବା ଜାରି ରଖିଛନ୍ତି । ପ୍ରଯୁକ୍ତିବିଦ୍ୟା, ଫାର୍ମା ଏବଂ ଭିତ୍ତିଭୂମି ଭଳି କ୍ଷେତ୍ରରେ ସେମାନେ ପ୍ରତିବର୍ଷ ଶିଖର ଛୁଇଁବାରେ ଲାଗିଛନ୍ତି ।
