ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

27/07/2025 at 5:40 AM

ଖୋର୍ଦ୍ଧା ବଲାଙ୍ଗୀର ଜାତୀୟରାଜପଥର ଦଶପଲ୍ଲା ଥାନା ଟାକେରା ଘାଟି ନିକଟରେ ମର୍ମନ୍ତୁଦ ଦୁର୍ଘଟଣା । ଦୁଇ ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା ହୋଇ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୨ ଗୁରୁତର ହୋଇଛନ୍ତି । ଗୁରୁତରଙ୍କୁ ଦଶପଲ୍ଲା ମେଡିକାଲରେ ଭର୍ତ୍ତି କରାଯାଇଛି ।

ଦଶପଲ୍ଲା ପଟୁ ଏକ ଟ୍ରକରେ ଫିଟିକିରି ଲୋଡ୍ ହୋଇ ଯାଉଥିବା ବେଳେ ବୌଦ୍ଧ ପଟୁ ଆସୁଥିବା ଏକ ଟ୍ରକରେ ଚୁନ ଲୋଡ୍ ହୋଇଥିଲା ।

ଟାକେରା ଘାଟି ନିକଟରେ ହଠାତ୍ ଏକ କୁକୁର ରାସ୍ତା ଉପରକୁ ଆସିଯିବାରୁ ଦୁଇ ଟ୍ରକ୍ ତାକୁ ରକ୍ଷା କରିବାକୁ ଯାଇ ମୁହାଁମୁହିଁ ଧକ୍କା ହୋଇ ରାସ୍ତା କଡକୁ ଓଲଟି ପଡିଥିଲା । ଅଗ୍ନିଶମ କର୍ମଚାରୀ ଘଟଣାସ୍ଥଳକୁ ଯାଇ ୩ଜଣଙ୍କୁ ଉଦ୍ଧାର କରି ଦଶପଲ୍ଲା ମେଡିକାଲକୁ ପଠାଇଥିଲେ । ସେଠାରେ ଡାକ୍ତର ଜଣଙ୍କୁ ମୃତ ଘୋଷଣା କରିଥିବାବେଳେ ଅନ୍ୟ ଦୁଇଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ଟ୍ରକରେ ଏବେବି ଦୁଇଜଣ ମୃତ ଅବସ୍ଥାରେ ଚାପି ହୋଇ ରହିଛନ୍ତି ।

ସେମାନଙ୍କୁ ବାହାର କରିବାକୁ ଚେଷ୍ଟା ଚାଲିଛି । ତେବେ ଏହି ସମୟରେ ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଛନ୍ତି ଜଣେ ବାଇକ୍ ଆରୋହୀ । ଗୋଟିଏ ଟ୍ରକ୍ ଓଲଟି ବାଇକ୍ ଉପରେ ପଡିଛି । ବାଇକ୍ ଚାଳକ ଗାଡି ଛାଡି ଦୌଡି ପଳାଇବାରୁ ସେ ବଞ୍ଚି ଯାଇଛନ୍ତି । ମୃତାହତଙ୍କ ପରିଚୟ ମିଳିନଥିବାବେଳେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।