ଜନଗଣନା ୨୦୨୭; ଆସନ୍ତା ମାସରୁ ଆରମ୍ଭ ହେବ ପ୍ରି-ଟେଷ୍ଟ ପ୍ରକ୍ରିୟା
ନୂଆଦିଲ୍ଲୀ: ୨୦୨୭ର ପ୍ରଥମ ପର୍ଯ୍ୟାୟ ଭାରତୀୟ ଜନଗଣନା ପାଇଁ ପ୍ରି-ଟେଷ୍ଟ ପ୍ରକ୍ରିୟା ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକର ମନୋନୀତ ଅଞ୍ଚଳରେ ୨୦୨୫ ନଭେମ୍ବର ୧୦ରୁ ୩୦ ପର୍ଯ୍ୟନ୍ତ କରାଯିବ। ରେଜିଷ୍ଟ୍ରାର ଜେନେରାଲ ଏବଂ ଜନଗଣନା କମିଶନର ମୃତ୍ୟୁଞ୍ଜୟ କୁମାର ନାରାୟଣ ଶୁକ୍ରବାର ଏକ ଗେଜେଟ୍ ବିଜ୍ଞପ୍ତିରେ କହିଛନ୍ତି ଯେ ସ୍ଵ-ଗଣନା ବିକଳ୍ପ ମଧ୍ୟ ନଭେମ୍ବର ୧ରୁ ୭ ପର୍ଯ୍ୟନ୍ତ ଉପଲବ୍ଧ ହେବ। ଏହା ଦେଶର ପ୍ରଥମ ଡିଜିଟାଲ୍ ଜନଗଣନା ହେବ। ଯେଉଁଥିରେ ନାଗରିକଙ୍କ ଜାତି ମଧ୍ୟ ରେକର୍ଡ କରାଯିବ।
ପ୍ରି-ଟେଷ୍ଟ ପ୍ରକ୍ରିୟାର ଉଦ୍ଦେଶ୍ୟ ହେଉଛି ଦୁଇ ପର୍ଯ୍ୟାୟ ଜନଗଣନାର ପ୍ରଭାବ ପରୀକ୍ଷା କରିବା। ଯାହା ୧ ଏପ୍ରିଲ ୨୦୨୬ରୁ ୨୮ ଫେବୃଆରୀ ୨୦୨୭ ପର୍ଯ୍ୟନ୍ତ କରାଯିବାକୁ ସ୍ଥିର କରାଯାଇଛି। ପ୍ରଥମ ପର୍ଯ୍ୟାୟରେ ଘର ତାଲିକାକରଣ ଅନ୍ତର୍ଭୁକ୍ତ ହେବ। ଯାହା ଗୃହର ଅବସ୍ଥା, ସମ୍ପତ୍ତି ଏବଂ ସୁବିଧା ସମ୍ପର୍କରେ ତଥ୍ୟ ସଂଗ୍ରହ କରିବ। ଦ୍ୱିତୀୟ ପର୍ଯ୍ୟାୟରେ ଜନସଂଖ୍ୟା ଗଣନା ଅନ୍ତର୍ଭୁକ୍ତ ହେବ। ଯାହା ପ୍ରତ୍ୟେକ ବ୍ୟକ୍ତିଙ୍କ ଜନସଂଖ୍ୟାଗତ, ସାମାଜିକ-ଆର୍ଥିକ, ସାଂସ୍କୃତିକ ଏବଂ ଅନ୍ୟାନ୍ୟ ବିବରଣୀ ରେକର୍ଡ କରିବ। ଦ୍ୱିତୀୟ ପର୍ଯ୍ୟାୟ ଫେବୃଆରୀ ୧, ୨୦୨୭ରେ ଆରମ୍ଭ ହେବ।
ଏହା ଭାରତର ୧୬ତମ ଏବଂ ସ୍ୱାଧୀନତା ପରଠାରୁ ୮ମ ଜନଗଣନା ହେବ। ଏହି ପ୍ରି-ଟେଷ୍ଟ ପ୍ରକ୍ରିୟା ମୁଖ୍ୟ ପ୍ରକ୍ରିୟା ଆରମ୍ଭ ହେବା ପୂର୍ବରୁ ତ୍ରୁଟି ଚିହ୍ନଟ କରିବା ପାଇଁ ପ୍ରଶ୍ନ, ତଥ୍ୟ ସଂଗ୍ରହ, ତାଲିମ, ଲଜିଷ୍ଟିକ୍ସ, ମୋବାଇଲ୍ ଆପ୍ସ ଏବଂ ସଫ୍ଟୱେର୍ ସମ୍ପର୍କରେ ପରୀକ୍ଷା କରିବ। ୩.୪ ନିୟୁତରୁ ଅଧିକ ଗଣନାକାରୀ ଏବଂ ପର୍ଯ୍ୟବେକ୍ଷକ ଏବଂ ୧୩୦,୦୦୦ ଜନଗଣନା କର୍ମଚାରୀ ଅଂଶଗ୍ରହଣ କରିବେ।
ମୃତ୍ୟୁଞ୍ଜୟ କୁମାର ନାରାୟଣ ଆହୁରି କହିଛନ୍ତି ଯେ ସ୍ୱ-ଗଣନା ପାଇଁ ଏକ ଅନଲାଇନ୍ ପୋର୍ଟାଲ୍ ନଭେମ୍ବର ୧-୭, ୨୦୨୫ ପର୍ଯ୍ୟନ୍ତ ଉପଲବ୍ଧ ହେବ, ଯାହା ନାଗରିକମାନଙ୍କୁ ସେମାନଙ୍କର ସୂଚନା ନିଜେ ପ୍ରବେଶ କରିବାକୁ ଅନୁମତି ଦେବ। ଏହି ପଦକ୍ଷେପ ଡିଜିଟାଲ୍ ପ୍ରଯୁକ୍ତିବିଦ୍ୟାର ବ୍ୟବହାରକୁ ପ୍ରୋତ୍ସାହିତ କରିବ ଏବଂ ପ୍ରକ୍ରିୟାକୁ ସ୍ୱଚ୍ଛ କରିବ।
