ମ୍ୟାଚ୍ ବେଳେ କ୍ରିକେଟର ଶ୍ରେୟାସ ଆୟର ଆହତ, ହସ୍ପିଟାଲରେ ଭର୍ତି
ନୂଆଦିଲ୍ଲୀ: ସିଡନୀ କ୍ରିକେଟ୍ ଗ୍ରାଉଣ୍ଡରେ ଅଷ୍ଟ୍ରେଲିଆ ବିପକ୍ଷ ତୃତୀୟ ଏକଦିବସୀୟ ମ୍ୟାଚ୍ ଖେଳୁଥିବା ସମୟରେ ଭାରତୀୟ କ୍ରିକେଟର ଶ୍ରେୟାସ ଆୟର ଆହତ ହୋଇଥିଲେ। ଯାହା ତାଙ୍କୁ ପଡ଼ିଆ ଛାଡିବାକୁ ବାଧ୍ୟ କରିଥିଲା।
ଏହି ଘଟଣା ଅଷ୍ଟ୍ରେଲିଆ ଇନିଂସର ୩୪ତମ ଓଭର ସମୟରେ ଘଟିଥିଲା। ହର୍ଷିତ ରାଣାଙ୍କ ଓଭରର ଚତୁର୍ଥ ବଲରେ ଅଷ୍ଟ୍ରେଲୀୟ ୱିକେଟକିପର ବ୍ୟାଟ୍ସମ୍ୟାନ୍ ଆଲେକ୍ସ କ୍ୟାରି ଏକ ଏରିଆଲ୍ ସଟ୍ ଖେଳିଥିଲେ। ଏହି ସମୟରେ ଶ୍ରେୟାସ ଆୟର କ୍ୟାଚ୍ ନେବା ପାଇଁ ବିପରୀତ ଦିଗରେ ଦୌଡ଼ିବା ଆରମ୍ଭ କରିଥିଲେ। ଆୟର ବଲ୍ ଧରିବାକୁ ଡେଇଁ ପଡ଼ିଥିଲେ ଏବଂ ଏହାକୁ ଧରିବାରେ ସଫଳ ମଧ୍ୟ ହୋଇଥିଲେ। ଏହି କ୍ୟାଚ ବେଳେ ସେ ଆହତ ହୋଇଥିଲେ। ଯାହା ଫଳରେ ତାଙ୍କୁ ପଡ଼ିଆରୁ ବାହାରିବାକୁ ପଡିଥିଲା। ତେବେ ଏହି ଆଘାତ ଭାରତ ପାଇଁ ଏକ ପ୍ରମୁଖ ଚିନ୍ତାର ବିଷୟ ପାଲଟିଛି। ଏହା ପୂର୍ବରୁ ଅଧିନାୟକ ଶୁଭମନ ଗିଲ ଟସ୍ ସମୟରେ ଘୋଷଣା କରିଥିଲେ ଯେ ନୀତିଶ କୁମାର ରେଡ୍ଡୀ ଏବଂ ଅର୍ଶଦୀପ ସିଂହ ମଧ୍ୟ ଆଘାତ ଯୋଗୁଁ ଖେଳରୁ ବାଦ ପଡ଼ିଛନ୍ତି। ନୀତିଶ ଦ୍ୱିତୀୟ ଏକଦିବସୀୟ ମ୍ୟାଚ୍ରେ ଜଙ୍ଘ ମାଂସପେଶୀରେ ଆଘାତ ପାଇଥିଲେ, ଯେତେବେଳେ କି ପୂର୍ବ ମ୍ୟାଚ୍ରେ ଅର୍ଶଦୀପଙ୍କ ଜଙ୍ଘ ମାଂସପେଶୀରେ ଆଘାତ ଲାଗିଥିଲା। ଏହି ଖେଳାଳିମାନଙ୍କ ଅନୁପସ୍ଥିତି ଦଳର ଗଭୀରତା ଉପରେ ପ୍ରଶ୍ନ ଉଠାଇଛି।
