ଆମେରିକା ପାଇଁ ଆଜି ଗୁରୁତ୍ୱପୂର୍ଣ୍ଣ ଦିନ, ନାବାଳିକା ଯୁବତୀ ସମୁହଙ୍କ ଯୌନ ଶୋଷଣ ଜନିତ ଏଲଫିନଷ୍ଟନ ଫାଇଲ ଆଜି ଖୋଲିବ
ନୂଆଦିଲ୍ଲୀ: ଗୁରୁବାର ଦିନ ଆମେରିକାର ପ୍ରତିନିଧି ସଭାର ଡେମୋକ୍ରାଟମାନେ ଦୋଷୀ ସାବ୍ୟସ୍ତ ଯୌନ ଅପରାଧୀ ଜେଫ୍ରି ଏପଷ୍ଟାଇନଙ୍କ ସମ୍ପତ୍ତିରୁ ପ୍ରାପ୍ତ ୬୮ଟି ନୂତନ ଫଟୋଗ୍ରାଫ ପ୍ରକାଶ କରିଛନ୍ତି। ଏହି ପ୍ରକାଶନର ଲକ୍ଷ୍ୟ ପ୍ରଭାବଶାଳୀ ବ୍ୟକ୍ତିତ୍ୱଙ୍କ ସହିତ ଏପଷ୍ଟାଇନଙ୍କ ସମ୍ପର୍କକୁ ପ୍ରକାଶ କରିବା। ତେବେ ଆମେରିକା ପାଇଁ ଆଜି ଗୁରୁତ୍ୱପୂର୍ଣ ଦିନ। ନାବାଳିକା ଯୁବତୀ ସମୁହଙ୍କ ସହ ଯୌନ ଶୋଷଣ ଜନିତ ଏଲଫିନଷ୍ଟନ ଫାଇଲ ଆଜି ଖୋଲିବ ବୋଲି ଜଣାପଡିଛି।
ରିପୋର୍ଟ ଅନୁଯାୟୀ ଏହି ଫଟୋଗୁଡିକ ୨୦୧୯ ରେ ଜେଲରେ ଏପଷ୍ଟାଇନଙ୍କ ମୃତ୍ୟୁ ପୂର୍ବରୁ ହାଉସ ତଦାରଖ କମିଟି ଦ୍ୱାରା ଜବତ କରାଯାଇଥିବା ୯୫,୦୦୦ ଫଟୋଗ୍ରାଫରୁ ପ୍ରାପ୍ତ ହୋଇଛି।ଡେମୋକ୍ରାଟମାନଙ୍କ ଦ୍ୱାରା ପ୍ରକାଶିତ ଫଟୋଗୁଡିକରେ ଏପଷ୍ଟାଇନଙ୍କୁ ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ୍ ଗେଟ୍ସ, ଚଳଚ୍ଚିତ୍ର ନିର୍ମାତା ଉଡି ଆଲେନ, ଗୁଗୁଲ ସହ-ପ୍ରତିଷ୍ଠାତା ସର୍ଗେ ବ୍ରିନ୍, ଦାର୍ଶନିକ ନୋଆମ୍ ଚମସ୍କି ଏବଂ ପୂର୍ବତନ ଟ୍ରମ୍ପ ପରାମର୍ଶଦାତା ଷ୍ଟିଭ୍ ବାନନଙ୍କ ସମେତ ଅନେକ ପ୍ରଭାବଶାଳୀ ଏବଂ ଧନୀ ବ୍ୟକ୍ତିଙ୍କ ସହିତ ବିଭିନ୍ନ ସାମାଜିକ କାର୍ଯ୍ୟକ୍ରମରେ ଦେଖାଯାଇଛି। ପ୍ରକାଶିତ ଫଟୋଗୁଡିକ ମଧ୍ୟରୁ ଦୁଇଟି ଫଟୋଗ୍ରାଫରେ ବିଲ୍ ଗେଟ୍ସଙ୍କୁ ମହିଳାଙ୍କ ସହିତ ଦେଖାଯାଇଛି।
ନ୍ୟୁୟର୍କ ଟାଇମ୍ସ ସ୍ତମ୍ଭକାର ଡେଭିଡ୍ ବ୍ରୁକ୍ସଙ୍କୁ ମଧ୍ୟ ଗୋଟିଏ ଫଟୋଗ୍ରାଫରେ ଦେଖାଯାଇଛି। ପରବର୍ତ୍ତୀ ସମୟରେ ନ୍ୟୁୟର୍କ ଟାଇମ୍ସ ଏକ ବିବୃତ୍ତି ଜାରି କରି କହିଛି ଯେ ବ୍ରୁକ୍ସ ତାଙ୍କ ସ୍ତମ୍ଭ ପାଇଁ ସୂଚନା ସଂଗ୍ରହ କରିବା ଉଦ୍ଦେଶ୍ୟରେ ୨୦୧୧ରେ ଏକ ରାତ୍ରୀଭୋଜନରେ ଯୋଗ ଦେଇଥିଲେ।ଡେମୋକ୍ରାଟମାନେ ଜୋର ଦେଇ କହିଥିଲେ ଯେ ଫଟୋଗ୍ରାଫ ପ୍ରକାଶନ କୌଣସି ବ୍ୟକ୍ତିବିଶେଷଙ୍କ ଦ୍ୱାରା କୌଣସି ଭୁଲ କାର୍ଯ୍ୟକୁ ସୂଚିତ କରିନାହିଁ। କମିଟି କହିଛି ଯେ କୌଣସି ଫଟୋଗ୍ରାଫରେ ଏପଷ୍ଟାଇନଙ୍କ ଜଣାଶୁଣା ସହଯୋଗୀଙ୍କ ଦ୍ୱାରା କୌଣସି ଅପରାଧିକ କାର୍ଯ୍ୟକଳାପ ଦର୍ଶାଯାଇ ନାହିଁ, ବରଂ ଏପଷ୍ଟାଇନଙ୍କ ପ୍ରଭାବକୁ ପ୍ରଦର୍ଶନ କରାଯାଇଛି।ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶୁକ୍ରବାର ସୁଦ୍ଧା ଏପଷ୍ଟାଇନ ଏବଂ ଘିସଲେନ ମ୍ୟାକ୍ସୱେଲ ମାମଲା ଫାଇଲଗୁଡ଼ିକୁ ପ୍ରକାଶ କରିବାକୁ ନ୍ୟାୟ ବିଭାଗକୁ ନିର୍ଦ୍ଦେଶ ଦେଇଥିବା ଏକ ବିଲରେ ସ୍ୱାକ୍ଷର କରିବାର କିଛି ଦିନ ପରେ ଏହି ରିପୋର୍ଟ ଆସିଛି।
