“ବ୍ୟାଟଲ୍ ଅଫ୍ ଗାଲୱାନ୍” ଫିଲ୍ମକୁ ନେଇ ଉତ୍ତେଜିତ ଚୀନ, ସମର୍ଥନ କଲା ଭାରତ…
ନୂଆଦିଲ୍ଲୀ: ବଲିଉଡ ସୁପରଷ୍ଟାର ସଲମାନ ଖାନଙ୍କ ଆଗାମୀ ଫିଲ୍ମ “ବ୍ୟାଟଲ୍ ଅଫ୍ ଗାଲୱାନ୍”ର ଟିଜର ରିଲିଜ୍ ହେବା ପରେ ଚୀନରେ ଅସନ୍ତୋଷ ପ୍ରକାଶ ପାଇଛି। ଏହି ଫିଲ୍ମଟି 2020 ଗାଲୱାନ୍ ଭ୍ୟାଲି ସଂଘର୍ଷ ଉପରେ ଆଧାରିତ। ଯେଉଁଥିରେ ସଲମାନ କର୍ଣ୍ଣେଲ ବିକ୍କୁମାଲ୍ଲା ସନ୍ତୋଷ ବାବୁଙ୍କ ଭୂମିକାରେ ଅଭିନୟ କରିଛନ୍ତି। ଯିଏକି ସେହି ସଂଘର୍ଷରେ ସହିଦ ହୋଇଥିଲେ।
ଚୀନର ସରକାରୀ ଖବରକାଗଜ, ଗ୍ଲୋବାଲ୍ ଟାଇମ୍ସ, ଫିଲ୍ମଟିକୁ କଡ଼ା ସମାଲୋଚନା କରି ଏହାକୁ “ତଥ୍ୟର ଭୁଲ ଉପସ୍ଥାପନା” ବୋଲି କହିଛି। ଖବରକାଗଜ ଅନୁଯାୟୀ, ବଲିଉଡ ଫିଲ୍ମଗୁଡ଼ିକ ଭାବପ୍ରବଣ ଏବଂ ମନୋରଞ୍ଜନ ପାଇଁ ଉଦ୍ଦିଷ୍ଟ, କିନ୍ତୁ “କୌଣସି ସିନେମାଟିକ୍ ଅତିରଞ୍ଜିତ ଇତିହାସକୁ ପୁନଃଲିଖନ କରିପାରିବ ନାହିଁ କିମ୍ବା ପିପୁଲ୍ସ ଲିବରେସନ୍ ଆର୍ମି (PLA) ର ସାର୍ବଭୌମ କ୍ଷେତ୍ରକୁ ରକ୍ଷା କରିବା ପାଇଁ ସଂକଳ୍ପକୁ ଦୋହଲାଇ ପାରିବ ନାହିଁ।” ଗ୍ଲୋବାଲ୍ ଟାଇମ୍ସ ଦାବି କରିଛି ଯେ ଗାଲୱାନ୍ ଭ୍ୟାଲି ପ୍ରକୃତ ନିୟନ୍ତ୍ରଣ ରେଖା (LAC)ର ଚୀନ୍ ପାର୍ଶ୍ୱରେ ଅବସ୍ଥିତ ଏବଂ 2020 ସଂଘର୍ଷ ଭାରତୀୟ ସୈନିକଙ୍କ ସୀମା ପାର ଏବଂ ଉତ୍ତେଜନା ଯୋଗୁଁ ହୋଇଥିଲା। ଏହି ଫିଲ୍ମକୁ “ଅତି ହାଇ ଡ୍ରାମା” ବୋଲି କହିଛି ଏବଂ କହିଛି ଯେ ଏହା ଜାତୀୟତାବାଦୀ ଭାବନାକୁ ଉସୁକାଇବାର ଏକ ପ୍ରୟାସ ଥିଲା।
ତେବେ ଏନେଇ ଭାରତ ସରକାର କହିଛନ୍ତି ଯେ ଭାରତରେ ଚଳଚ୍ଚିତ୍ର ନିର୍ମାତା ମାନଙ୍କର କଳାତ୍ମକ ସ୍ୱାଧୀନତା ଅଛି ଏବଂ ସିନେମା ହେଉଛି ପ୍ରକାଶନର ଏକ ମାଧ୍ୟମ। ସେମାନେ ୧୯୬୨ ମସିହାର ଭାରତ-ଚୀନ୍ ଯୁଦ୍ଧ ଉପରେ ଆଧାରିତ “ହକିକତ” ଚଳଚ୍ଚିତ୍ରର ଉଦାହରଣ ଦେଇଥିଲେ।
