ବକ୍ସ ଅଫିସ୍ରେ ଦମଦାର ପ୍ରଦର୍ଶନ କରୁଛି ‘କକଟେଲ୍ ୨’, ୧୦୦ କୋଟି କ୍ଲବ୍ ଆଡକୁ ଦୌଡ଼
ଶାହିଦ କପୁର, କୃତି ସାନନ ଓ ରଶ୍ମିକା ମନ୍ଦାନା ଅଭିନୀତ ‘କକଟେଲ୍ ୨’ ବକ୍ସ ଅଫିସ୍ରେ ଜବରଦସ୍ତ ପ୍ରଦର୍ଶନ ଜାରି ରଖିଛି। ଜୁନ୍ ୧୯ରେ ମୁକ୍ତିଲାଭ କରିଥିବା ଏହି ଫିଲ୍ମ ମାତ୍ର ତିନି ଦିନରେ ବିଶ୍ୱବ୍ୟାପୀ ୭୬.୨୫ କୋଟି ଟଙ୍କାର ବ୍ୟବସାୟ କରିଛି। ଏହା ସହିତ ଫିଲ୍ମଟି ଖୁବ୍ ଶୀଘ୍ର ୧୦୦ କୋଟି କ୍ଲବ୍ରେ ପ୍ରବେଶ କରିବ ବୋଲି ଆଶା କରାଯାଉଛି।
ଟ୍ରେଡ୍ ଟ୍ରାକର ସ୍ୟାକନିଲ୍କ ଅନୁସାରେ, ଫିଲ୍ମଟି ଭାରତରେ ୫୭ କୋଟି ଟଙ୍କା ଗ୍ରସ୍ କଲେକ୍ସନ୍ କରିଥିବାବେଳେ ବିଦେଶୀ ବଜାରରୁ ୧୯.୨୫ କୋଟି ଟଙ୍କା ଆୟ କରିଛି। ଘରୋଇ ବଜାରରେ ଫିଲ୍ମର ନେଟ୍ କଲେକ୍ସନ୍ ୪୭.୫୦ କୋଟି ଟଙ୍କାରେ ପହଞ୍ଚିଛି। ପ୍ରଥମ ଦିନରେ ୧୩.୫ କୋଟି ଟଙ୍କା ଆୟ କରିଥିବା ଫିଲ୍ମ ଦ୍ୱିତୀୟ ଦିନରେ ୧୬.୨୫ କୋଟି ଟଙ୍କା ଯୋଡ଼ିଥିଲା।
ହୋମି ଆଡାଜାନିଆଙ୍କ ନିର୍ଦ୍ଦେଶିତ ଏହି ଫିଲ୍ମ ବର୍ତ୍ତମାନ ବବି ଦେଓଲଙ୍କ ‘ବନ୍ଦର’, ହଲିଉଡ୍ ହରର ଫିଲ୍ମ ‘ଅବସେସନ୍’, ଇମତିଆଜ୍ ଅଲିଙ୍କ ‘ମେଁ ୱାପସ୍ ଆଉଙ୍ଗା’ ଓ ବିକ୍ରମ ଭଟ୍ଟଙ୍କ ‘ହଣ୍ଟେଡ୍ 3D: Echoes of the Past’ ଭଳି ଫିଲ୍ମ ସହ ପ୍ରତିଯୋଗିତା କରୁଛି। ତଥାପି ଦର୍ଶକଙ୍କ ଭଲ ପ୍ରତିକ୍ରିୟା ଯୋଗୁ ‘କକଟେଲ୍ ୨’ ବକ୍ସ ଅଫିସ୍ରେ ନିଜର ଦବଦବା ବଜାୟ ରଖିଛି।
