ଜମି ମ୍ୟୁଟେସନ୍ କାମ ପାଇଁ ୫,୫୦୦ ଟଙ୍କା ଲାଞ୍ଚ; ସହକାରୀ ରାଜସ୍ୱ ନିରୀକ୍ଷକଙ୍କୁ ରଙ୍ଗେହାତ ଧରିଲା ଭିଜିଲାନ୍ସ
କେନ୍ଦ୍ରାପଡ଼ା: ଜମି ମ୍ୟୁଟେସନ୍ କାମ କରାଇ ଦେବା ପାଇଁ ଜଣେ ବ୍ୟକ୍ତିଙ୍କଠାରୁ ୫ ହଜାର ୫ ଶହ ଟଙ୍କା ଲାଞ୍ଚ ନେଉଥିବା ବେଳେ କେନ୍ଦ୍ରାପଡ଼ା ଜିଲ୍ଲା କାଉପଡ଼ା ରାଜସ୍ୱ ସର୍କଲର ସହକାରୀ ରାଜସ୍ୱ ନିରୀକ୍ଷକ ସାଇ ଦର୍ଶିନୀ ଲେଙ୍କା ଭିଜିଲାନ୍ସ ଜାଲରେ ପଡ଼ିଛନ୍ତି। କଟକ ଭିଜିଲାନ୍ସ ଟିମ୍ ପୂର୍ବରୁ ଯୋଜନାବଦ୍ଧ ଭାବେ ଫାନ୍ଦ ପକାଇ ତାଙ୍କୁ ଲାଞ୍ଚ ଟଙ୍କା ସହ ରଙ୍ଗେହାତ ଧରିଛି।
ଭିଜିଲାନ୍ସ ସୂଚନା ଅନୁସାରେ, ସୁଶାନ୍ତ ମଲ୍ଲିକ ନାମକ ଜଣେ ବ୍ୟକ୍ତିଙ୍କ ଜମିର ମ୍ୟୁଟେସନ୍ ପ୍ରକ୍ରିୟା ସମ୍ପନ୍ନ କରିବା ପାଇଁ ସାଇ ଦର୍ଶିନୀ ଲେଙ୍କା ୫,୫୦୦ ଟଙ୍କା ଲାଞ୍ଚ ଦାବି କରିଥିଲେ। ଏନେଇ ସୁଶାନ୍ତ ଭିଜିଲାନ୍ସ ବିଭାଗର ଦ୍ୱାରସ୍ଥ ହେବା ପରେ ଅଧିକାରୀମାନେ ଏକ ସ୍ୱତନ୍ତ୍ର ଟ୍ରାପ୍ ଅପରେସନ୍ କରିଥିଲେ। ନିର୍ଦ୍ଧାରିତ ସ୍ଥାନରେ ଲାଞ୍ଚ ଟଙ୍କା ଗ୍ରହଣ କରୁଥିବା ସମୟରେ ଭିଜିଲାନ୍ସ ଟିମ୍ ତାଙ୍କୁ ଧରିବା ସହ ଟଙ୍କା ଜବତ କରିଥିଲା।
ଘଟଣା ପରେ ସାଇ ଦର୍ଶିନୀ ଲେଙ୍କାଙ୍କୁ କେନ୍ଦ୍ରାପଡ଼ାସ୍ଥିତ ଭିଜିଲାନ୍ସ ଡିଏସପି କାର୍ଯ୍ୟାଳୟକୁ ନେଇ ପଚରାଉଚରା କରାଯାଉଛି। ଏହାସହ ତାଙ୍କ ଗରାପୁରସ୍ଥିତ ଭଡ଼ାଘର ସମେତ ଅନ୍ୟ ଦୁଇଟି ସ୍ଥାନରେ ଏକକାଳୀନ ଚଢ଼ାଉ ଜାରି ରହିଛି। ତାଙ୍କ ନିକଟରୁ ଅସଙ୍ଗତ ସମ୍ପତ୍ତି କିମ୍ବା ଅନ୍ୟ କୌଣସି ଆର୍ଥିକ ଅନିୟମିତତାର ପ୍ରମାଣ ଅଛିକି ନାହିଁ, ସେନେଇ ଭିଜିଲାନ୍ସ ବିଭାଗ ତଦନ୍ତ ଜାରି ରଖିଛି।
