MMSY-TRIP ଯୋଜନାକୁ ମିଳିଲା ଗ୍ରୀନ ସିଗନାଲ; ଗ୍ରାମାଞ୍ଚଳ ସଡ଼କରେ ଆସିବ ବଡ଼ ପରିବର୍ତ୍ତନ
ଭୁବନେଶ୍ୱର: ଓଡ଼ିଶାର ଗ୍ରାମାଞ୍ଚଳରେ ସଡ଼କ ଭିତ୍ତିଭୂମିକୁ ଆଧୁନିକ ଓ ସୁଦୃଢ଼ କରିବା ଲକ୍ଷ୍ୟରେ ରାଜ୍ୟ ସରକାର ମୁଖ୍ୟମନ୍ତ୍ରୀ ସଡ଼କ ଯୋଜନା–ଟ୍ରାନ୍ସଫର୍ଡ ରୋଡ୍ ଇମ୍ପ୍ରୁଭମେଣ୍ଟ ପ୍ରୋଗ୍ରାମ୍ (MMSY-TRIP) ପାଇଁ ନୂତନ ନିର୍ଦ୍ଦେଶାବଳୀ ଜାରି କରିଛନ୍ତି। ୨୦୨୬-୨୭ରୁ ୨୦୨୯-୩୦ ପର୍ଯ୍ୟନ୍ତ ଚାରି ବର୍ଷ ମଧ୍ୟରେ ଅନ୍ୟ ବିଭାଗରୁ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତରିତ ପ୍ରାୟ ୨୩,୭୦୫ କିଲୋମିଟର ସଡ଼କର ଉନ୍ନତି କରାଯିବ। ଏହି ମହତ୍ୱାକାଙ୍କ୍ଷୀ ଯୋଜନା ପାଇଁ ୫,୩୬୫ କୋଟି ଟଙ୍କା ବ୍ୟୟବରାଦ କରାଯାଇଛି। ହସ୍ପିଟାଲ, ସ୍କୁଲ, କଲେଜ, ପଞ୍ଚାୟତ କାର୍ଯ୍ୟାଳୟ, ବଜାର ଓ ପର୍ଯ୍ୟଟନସ୍ଥଳକୁ ସଂଯୋଗ କରୁଥିବା ସଡ଼କଗୁଡ଼ିକୁ ପ୍ରାଥମିକତା ଦିଆଯିବ।
ନୂତନ ନିର୍ଦ୍ଦେଶାବଳୀ ଅନୁଯାୟୀ ସଡ଼କଗୁଡ଼ିକୁ ବିଟୁମିନ୍ (BT) କିମ୍ବା ସିମେଣ୍ଟ କଂକ୍ରିଟ୍ (CC) ମାନରେ ନିର୍ମାଣ କରାଯିବ। ସଡ଼କର ଚଳାଚଳ ପଥ ୩.୭୫ ମିଟର ରହିବା ସହିତ ମୋଟ ପ୍ରସ୍ଥ ୬ରୁ ୭.୫ ମିଟର ମଧ୍ୟରେ ନିର୍ଦ୍ଧାରଣ କରାଯିବ। ପ୍ରତ୍ୟେକ ପ୍ରକଳ୍ପ ପାଇଁ ସ୍ଥଳ ପରିଦର୍ଶନ ପରେ ବିସ୍ତୃତ ପ୍ରକଳ୍ପ ରିପୋର୍ଟ (DPR) ପ୍ରସ୍ତୁତ କରାଯିବ। ଡ୍ରେନ୍, କଲଭର୍ଟ, କ୍ରସ୍ ଡ୍ରେନେଜ୍, ବିଦ୍ୟୁତ୍ ଓ ଅନ୍ୟାନ୍ୟ ୟୁଟିଲିଟି ସ୍ଥାନାନ୍ତର, ବନ ଅନୁମତି, ସଡ଼କ ସୁରକ୍ଷା ଏବଂ ସଡ଼କ କଡ଼ରେ ଥିବା ଜନସେବା ପ୍ରତିଷ୍ଠାନର ସଂଯୋଗକୁ ମଧ୍ୟ ଡିପିଆର୍ରେ ସାମିଲ କରାଯିବ। ସମସ୍ତ କାର୍ଯ୍ୟ ଇ-ଟେଣ୍ଡରିଂ ମାଧ୍ୟମରେ କରାଯିବ ଏବଂ ପ୍ରକଳ୍ପ ବ୍ୟୟର ୧ ପ୍ରତିଶତ ଅର୍ଥରେ ସଡ଼କ କଡ଼ରେ ବୃକ୍ଷରୋପଣ ଓ ଏହାର ରକ୍ଷଣାବେକ୍ଷଣ ବ୍ୟବସ୍ଥା କରାଯିବ।
ସଡ଼କ ନିର୍ମାଣର ଗୁଣବତ୍ତା ନିଶ୍ଚିତ କରିବା ପାଇଁ ଦୁଇସ୍ତରୀୟ ଗୁଣବତ୍ତା ଯାଞ୍ଚ ବ୍ୟବସ୍ଥା କରାଯାଇଛି। କନିଷ୍ଠ ଯନ୍ତ୍ରୀଠାରୁ ଆରମ୍ଭ କରି ଅଧୀକ୍ଷଣ ଯନ୍ତ୍ରୀ ପର୍ଯ୍ୟନ୍ତ ପ୍ରଥମ ସ୍ତରରେ ନିରୀକ୍ଷଣ କରାଯିବ, ଯେତେବେଳେ ଅବସରପ୍ରାପ୍ତ ବରିଷ୍ଠ ଯନ୍ତ୍ରୀମାନଙ୍କୁ ଗୁଣବତ୍ତା ପର୍ଯ୍ୟବେକ୍ଷକ ଭାବେ ନିୟୋଜିତ କରାଯିବ। ନିର୍ମାଣ ପରେ ପାଞ୍ଚ ବର୍ଷ ପର୍ଯ୍ୟନ୍ତ ସଡ଼କର ରକ୍ଷଣାବେକ୍ଷଣ ସମ୍ପୃକ୍ତ ଠିକା ସଂସ୍ଥା ପାଇଁ ବାଧ୍ୟତାମୂଳକ ରହିବ। ରାଜ୍ୟ ସରକାରଙ୍କ ମତରେ, ଏହି ଯୋଜନା କାର୍ଯ୍ୟକାରୀ ହେଲେ ଗ୍ରାମାଞ୍ଚଳର ସଡ଼କ ସଂଯୋଗ ବ୍ୟବସ୍ଥାରେ ବ୍ୟାପକ ଉନ୍ନତି ଆସିବା ସହ ଶିକ୍ଷା, ସ୍ୱାସ୍ଥ୍ୟ, କୃଷି, ବାଣିଜ୍ୟ ଓ ଗ୍ରାମୀଣ ଅର୍ଥନୀତିକୁ ନୂଆ ଗତି ମିଳିବ।
