ହୀରାକୁଦର ୨୨ଟି ଗେଟ୍ ଖୋଲା; ବନ୍ୟା ଆଶଙ୍କା ନେଇ ମହାନଦୀ ତଳମୁଣ୍ଡର ୧୦ ଜିଲ୍ଲାକୁ ହାଇ ଆଲର୍ଟ
ସମ୍ବଲପୁର: ହୀରାକୁଦ ଡ୍ୟାମ୍ରୁ ୨୨ଟି ଗେଟ୍ ଦେଇ ବନ୍ୟାଜଳ ନିଷ୍କାସନ ଜାରି ରହିଥିବାରୁ ମହାନଦୀ ତଳମୁଣ୍ଡର ୧୦ଟି ଜିଲ୍ଲାକୁ ହାଇ ଆଲର୍ଟରେ ରଖାଯାଇଛି। ବନ୍ୟାଜଳ ନିମ୍ନାଞ୍ଚଳରେ ପ୍ରବେଶ କରିଥିବାବେଳେ ରାଜ୍ୟର ୨୦ଟି ଜିଲ୍ଲାର ୮.୩୪ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ବନ୍ୟା ଯୋଗୁଁ ରାସ୍ତା, ସେତୁ ଓ ଅନ୍ୟାନ୍ୟ ଜନସାଧାରଣଙ୍କ ଭିତ୍ତିଭୂମି ସହ ବିସ୍ତୃତ ଚାଷଜମିର ମଧ୍ୟ କ୍ଷତି ହୋଇଛି। ଉତ୍ତର ଓଡ଼ିଶାରେ ୧,୩୦୦ରୁ ଅଧିକ ଘର କ୍ଷତିଗ୍ରସ୍ତ ହୋଇଥିବାବେଳେ ଭଦ୍ରକ ଜିଲ୍ଲା ସବୁଠାରୁ ଅଧିକ ପ୍ରଭାବିତ ହୋଇଛି । ଯାଜପୁର, ବାଲେଶ୍ୱର ଓ ମୟୂରଭଞ୍ଜ ମଧ୍ୟ ବନ୍ୟା ପ୍ରଭାବରେ ଆସିଛି |
ଦିଲ୍ଲୀ ଗସ୍ତରୁ ଫେରିବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଏବଂ ବରିଷ୍ଠ ଅଧିକାରୀଙ୍କ ସହ ବନ୍ୟା ପ୍ରଭାବିତ ଅଞ୍ଚଳର ଆକାଶମାର୍ଗରୁ ସମୀକ୍ଷା କରିଛନ୍ତି। ସ୍ୱତନ୍ତ୍ର ରିଲିଫ୍ କମିଶନର ରାଜେଶ ପ୍ରଭାକର ପାଟିଲ କହିଛନ୍ତି ଯେ, ମହାନଦୀ ତଳମୁଣ୍ଡର କଟକ, ପୁରୀ, ଖୋର୍ଦ୍ଧା, ଜଗତସିଂହପୁର ଓ କେନ୍ଦ୍ରାପଡ଼ା ସମେତ ଅନୁଗୋଳ, ବୌଦ୍ଧ, ସମ୍ବଲପୁର, ସୁବର୍ଣ୍ଣପୁର ଏବଂ ନୟାଗଡ଼ ଜିଲ୍ଲା ବିଶେଷ ସତର୍କତା ଜାରି ହୋଇଛି। ଏହି ଜିଲ୍ଲାଗୁଡ଼ିକ ମହାନଦୀ ଡେଲ୍ଟା ଅଞ୍ଚଳରେ ଥିବାରୁ ବନ୍ୟା ବିପଦ ଅଧିକ ରହିଛି।
ଅଧିକାରୀଙ୍କ ସୂଚନା ଅନୁଯାୟୀ, ମହାନଦୀ ସହ ସାଳନ୍ଦୀ, ବ୍ରାହ୍ମଣୀ, ବୈତରଣୀ, ଜଳକା ଓ ବୁଢ଼ାବଳଙ୍ଗ ନଦୀରେ ଜଳସ୍ତର ବୃଦ୍ଧି ପାଇବାରୁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ହୀରାକୁଦ ଡ୍ୟାମ୍ର ଜଳସ୍ତର ୬୨୫.୪୭ ଫୁଟ୍ରେ ପହଞ୍ଚିଥିବାବେଳେ ଏହାର ପୂର୍ଣ୍ଣ କ୍ଷମତା ୬୩୦ ଫୁଟ୍। ବର୍ତ୍ତମାନ ଡ୍ୟାମ୍କୁ ପ୍ରାୟ ୪.୧୫ ଲକ୍ଷ କ୍ୟୁସେକ୍ ଜଳ ପ୍ରବେଶ କରୁଥିବାବେଳେ ହାରାହାରି ୩.୮୯ ଲକ୍ଷ କ୍ୟୁସେକ୍ ଜଳ ନିଷ୍କାସନ କରାଯାଉଛି। ତେବେ ଗତ ଦୁଇ ଦିନ ଧରି ବର୍ଷା ନ ହେବା ସହ ମୁଣ୍ଡଳୀ ବ୍ୟାରେଜ୍ରେ ଜଳପ୍ରବାହ ୮.୮୮ ଲକ୍ଷ କ୍ୟୁସେକ୍ରୁ ପ୍ରାୟ ୭ ଲକ୍ଷ କ୍ୟୁସେକ୍କୁ ହ୍ରାସ ପାଇଥିବାରୁ ଆଗାମୀ ଦିନରେ ବନ୍ୟା ପରିସ୍ଥିତିରେ ସୁଧାର ଆସିବ ବୋଲି ସରକାର ଆଶା ପ୍ରକାଶ କରିଛନ୍ତି।
