Maharashtra Government: ମହାରାଷ୍ଟ୍ର ସରକାରଙ୍କ କଡ଼ା ପଦକ୍ଷେପ, ମନ୍ତ୍ରୀଙ୍କ କାର୍ଯ୍ୟାଳୟରୁ ହଟିଲେ ୫୫୦ରୁ ଅଧିକ କର୍ମଚାରୀ
ମହାରାଷ୍ଟ୍ର: ମହାରାଷ୍ଟ୍ରରେ ମନ୍ତ୍ରୀଙ୍କ କାର୍ଯ୍ୟାଳୟରେ କର୍ମଚାରୀ ନିଯୁକ୍ତିକୁ ନେଇ କଡ଼ା ହୋଇଛନ୍ତି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ । ଯାଞ୍ଚ ଓ ନିୟମିତ ପ୍ରକ୍ରିୟା ବିନା କାର୍ଯ୍ୟରତ ଥିବା ୫୫୦ରୁ ଅଧିକ କର୍ମଚାରୀଙ୍କୁ ମନ୍ତ୍ରୀଙ୍କ କାର୍ଯ୍ୟାଳୟରୁ ହଟାଇ ସେମାନଙ୍କ ମୂଳ ବିଭାଗକୁ ଫେରାଇ ଦିଆଯାଇଛି। ଆଉଟସୋର୍ସିଂ, ଅସ୍ଥାୟୀ ବ୍ୟବସ୍ଥା ଏବଂ ଅନୌପଚାରିକ ମୌଖିକ ନିର୍ଦ୍ଦେଶ ମାଧ୍ୟମରେ ଏହି କର୍ମଚାରୀମାନେ କାମ କରୁଥିବା ଅଭିଯୋଗ ରହିଥିଲା।
ସୂଚନା ଅନୁସାରେ, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସମେତ ୪୦ଟି ମନ୍ତ୍ରୀ କାର୍ଯ୍ୟାଳୟ ପାଇଁ ମୋଟ ୯୦୪ଟି ଅସ୍ଥାୟୀ ପଦକୁ ଅନୁମୋଦନ ମିଳିଥିଲା। ତେବେ ଏଥିରୁ ମାତ୍ର ୫୪୯ଟି ପଦରେ ନିୟମିତ ପ୍ରକ୍ରିୟାରେ ନିଯୁକ୍ତି ହୋଇଥିବା ବେଳେ ଅନ୍ୟ ପଦଗୁଡ଼ିକରେ ଆବଶ୍ୟକ ଯାଞ୍ଚ ବିନା କର୍ମଚାରୀ ନିଯୁକ୍ତ ହୋଇଥିବା ଜଣାପଡ଼ିଛି। ଏହାପରେ ପ୍ରଶାସନ ପକ୍ଷରୁ ଏହି ନିଯୁକ୍ତିଗୁଡ଼ିକର ସମୀକ୍ଷା କରାଯାଇଥିଲା।
ଗତ ଅଗଷ୍ଟ ୨୫ ତାରିଖରେ ସାଧାରଣ ପ୍ରଶାସନ ବିଭାଗ ପକ୍ଷରୁ ଏନେଇ ନିର୍ଦ୍ଦେଶ ଜାରି କରାଯାଇଥିଲା। ଉଚିତ ଅନୁମତି ନଥିବା କିମ୍ବା ଆବଶ୍ୟକ ପୃଷ୍ଠଭୂମି ଓ ସତ୍ୟନିଷ୍ଠା ଯାଞ୍ଚ ହୋଇନଥିବା କର୍ମଚାରୀଙ୍କୁ ସେପ୍ଟେମ୍ବର ୧୦ ସୁଦ୍ଧା ନିଜ ମୂଳ ବିଭାଗକୁ ଫେରିବାକୁ କୁହାଯାଇଥିଲା। ନିର୍ଦ୍ଦେଶ ନମାନିଲେ ଦରମା ବନ୍ଦ ହେବ ବୋଲି ମଧ୍ୟ ସତର୍କ କରାଯାଇଥିଲା। ମହାରାଷ୍ଟ୍ର ସରକାରଙ୍କ ନୂଆ ପ୍ରଶାସନିକ ନିୟମ ଅନୁଯାୟୀ ଏହି ପଦକ୍ଷେପ ନିଆଯାଇଥିବା କୁହାଯାଉଛି।
