UPI New Rule: ଅକ୍ଟୋବର ୧୫ରୁ ବଦଳିବ UPI ନିୟମ, ୨ ହଜାରରୁ ଅଧିକ ପେମେଣ୍ଟରେ ବ୍ୟବସାୟୀ ଦେବେ ୦.୪% MDR
ନୂଆଦିଲ୍ଲୀ: ୟୁପିଆଇ ବ୍ୟବହାର କରୁଥିବା ଗ୍ରାହକଙ୍କ ପାଇଁ ଆଶ୍ୱସ୍ତିର ଖବର। ଅକ୍ଟୋବର ୧୫, ୨୦୨୬ରୁ ୨,୦୦୦ ଟଙ୍କାରୁ ଅଧିକ ବ୍ୟବସାୟୀଙ୍କୁ ଦିଆଯାଉଥିବା ୟୁପିଆଇ ପେମେଣ୍ଟରେ ୦.୪ ପ୍ରତିଶତ ମର୍ଚେଣ୍ଟ ଡିସକାଉଣ୍ଟ ରେଟ୍ (MDR) ଲାଗୁ ହେବ। ତେବେ ଏହି ଚାର୍ଜ ଗ୍ରାହକଙ୍କଠାରୁ ନିଆଯିବ ନାହିଁ। ୭୫,୦୦୦ ଟଙ୍କା କିମ୍ବା ତା’ଠାରୁ ଅଧିକର ଯୋଗ୍ୟ ବ୍ୟବସାୟୀ ପେମେଣ୍ଟରେ MDR ସର୍ବାଧିକ ୩୦୦ ଟଙ୍କା ରହିବ।
ବ୍ୟକ୍ତିଠାରୁ ବ୍ୟକ୍ତିଙ୍କୁ ଟଙ୍କା ପଠାଇବା, ଅର୍ଥାତ୍ P2P ୟୁପିଆଇ ଟ୍ରାଞ୍ଜାକ୍ସନ୍ ସମ୍ପୂର୍ଣ୍ଣ ମାଗଣା ରହିବ। ସେହିପରି ୨,୦୦୦ ଟଙ୍କା ପର୍ଯ୍ୟନ୍ତ ବ୍ୟବସାୟୀଙ୍କୁ କରାଯାଉଥିବା ପେମେଣ୍ଟରେ ମଧ୍ୟ MDR ଲାଗିବ ନାହିଁ। ଛୋଟ ବ୍ୟବସାୟୀ ଓ ରାସ୍ତାକଡ଼ ବିକ୍ରେତାମାନେ ମାସକୁ ୟୁପିଆଇ QR ମାଧ୍ୟମରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଗ୍ରହଣ କଲେ ମଧ୍ୟ ଶୂନ ଏମଡିଆର ସୁବିଧା ପାଇବେ। ଅର୍ଥ ମନ୍ତ୍ରାଳୟ ଅନୁସାରେ, ପ୍ରାୟ ୯୬ ପ୍ରତିଶତ P2M ଟ୍ରାଞ୍ଜାକ୍ସନ୍ ଏହି ନୂଆ ଚାର୍ଜରୁ ପ୍ରଭାବିତ ହେବ ନାହିଁ।
ରେଳ, ଟେଲିକମ୍, ବୀମା, ଇନ୍ଧନ ଓ କୃଷି ଭଳି ନିର୍ଦ୍ଦିଷ୍ଟ କ୍ଷେତ୍ରରେ ୨,୦୦୦ ଟଙ୍କାରୁ ଅଧିକ ପେମେଣ୍ଟ ପାଇଁ ୫ ଟଙ୍କାର ନିର୍ଦ୍ଧାରିତ MDR ଲାଗିବ। ମ୍ୟୁଚୁଆଲ୍ ଫଣ୍ଡ, ସିକ୍ୟୁରିଟି ଓ ଷ୍ଟକ୍ ବ୍ରୋକର ଭଳି ପୁଞ୍ଜି ବଜାର ସମ୍ବନ୍ଧୀୟ ପେମେଣ୍ଟରେ ୦.୦୨ ପ୍ରତିଶତ MDR ରହିବ, ଯାହାର ସର୍ବାଧିକ ସୀମା ୩୦୦ ଟଙ୍କା। ଉଦାହରଣ ସ୍ୱରୂପ, ରେଷ୍ଟୁରାଣ୍ଟରେ ୬,୦୦୦ ଟଙ୍କାର ବିଲ୍ ୟୁପିଆଇରେ ଦେଲେ ୨୪ ଟଙ୍କାର MDR ବ୍ୟବସାୟୀ ପକ୍ଷରୁ ଦେବାକୁ ପଡ଼ିବ; ଗ୍ରାହକଙ୍କୁ ଅତିରିକ୍ତ ଚାର୍ଜ ଦେବାକୁ ପଡ଼ିବ ନାହିଁ। ନୂଆ ବ୍ୟବସ୍ଥାର ଉଦ୍ଦେଶ୍ୟ ୟୁପିଆଇ ପେମେଣ୍ଟ ବ୍ୟବସ୍ଥାର ଦୀର୍ଘକାଳୀନ ସ୍ଥାୟୀତ୍ୱ ଓ ଡିଜିଟାଲ୍ ପେମେଣ୍ଟ ଭିତ୍ତିଭୂମିକୁ ସୁଦୃଢ଼ କରିବା ବୋଲି ସରକାର କହିଛି।
