Mayurbhanj News: ସ୍କୁଲରେ Mid-Day Mealରେ ଅନିୟମିତତା ଅଭିଯୋଗ, ପ୍ରଧାନଶିକ୍ଷକ ଏବଂ ପୋଲିସର ବ୍ୟବହାରକୁ ନେଇ ସାଂଘାତିକ ଅଭିଯୋଗ ଆଣିଲେ ଛାତ୍ର ଛାତ୍ରୀ
ମୟୂରଭଞ୍ଜ: ମୟୂରଭଞ୍ଜ ଜିଲ୍ଲା ଖୁଣ୍ଟା ବ୍ଲକ୍ର ବି.ସି. ପୁର ସ୍କୁଲରେ ମିଡ୍ ଡେ ମିଲ୍କୁ ନେଇ ଅନିୟମିତତା ଅଭିଯୋଗ ଆସିଛି। ସ୍କୁଲର କିଛି ଛାତ୍ରଛାତ୍ରୀ ଅଭିଯୋଗ କରିଛନ୍ତି ଯେ, ମଧ୍ୟାହ୍ନ ଭୋଜନ ଯୋଜନାରେ ଅନିୟମିତତା ହେଉଛି। ଏଥିସହ ପ୍ରଧାନଶିକ୍ଷକଙ୍କ ବ୍ୟବହାରକୁ ନେଇ ମଧ୍ୟ ଛାତ୍ରଛାତ୍ରୀମାନେ ଅଭିଯୋଗ ଆଣିଛନ୍ତି। ଅଭିଯୋଗ ଅନୁସାରେ, ପ୍ରଧାନଶିକ୍ଷକ ଛାତ୍ରଛାତ୍ରୀଙ୍କ ସହ ଦୁର୍ବ୍ୟବହାର କରୁଥିବା ବେଳେ ଅନେକ ସମୟରେ କାର୍ଯ୍ୟାଳୟ ସମୟରେ ମଦ୍ୟପାନ କରି ସ୍କୁଲକୁ ଆସୁଥିବା ଛାତ୍ରଛାତ୍ରୀ ଦାବି କରିଛନ୍ତି।
ଏହି ଅଭିଯୋଗ ନେଇ ଛାତ୍ରଛାତ୍ରୀମାନେ ମୟୂରଭଞ୍ଜ ଜିଲ୍ଲାପାଳଙ୍କ କାର୍ଯ୍ୟାଳୟ ଆଡ଼କୁ ଯାଇଥିଲେ। ତେବେ ସେଠାରେ ପୋଲିସ ମଧ୍ୟ ସେମାନଙ୍କ ସହ ଦୁର୍ବ୍ୟବହାର କରିଥିବା ଛାତ୍ରଛାତ୍ରୀମାନେ ଅଭିଯୋଗ କରିଛନ୍ତି। ଏପରିକି ଛାତ୍ରୀମାନଙ୍କ ସହ ମଧ୍ୟ ପୋଲିସ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଘଟଣା ସମୟରେ ସେଠାରେ କୌଣସି ମହିଳା ପୋଲିସ କର୍ମଚାରୀ ଉପସ୍ଥିତ ନଥିବା ମଧ୍ୟ ଛାତ୍ରଛାତ୍ରୀମାନେ ଦାବି କରିଛନ୍ତି।
ଛାତ୍ରଛାତ୍ରୀଙ୍କ ଏହି ଅଭିଯୋଗ ପରେ ସ୍କୁଲର ମିଡ୍ ଡେ ମିଲ୍ ବ୍ୟବସ୍ଥା, ପ୍ରଧାନଶିକ୍ଷକଙ୍କ ଆଚରଣ ଏବଂ ଛାତ୍ରଛାତ୍ରୀଙ୍କ ସହ ପୋଲିସର ବ୍ୟବହାରକୁ ନେଇ ପ୍ରଶ୍ନ ଉଠିଛି। ଘଟଣାରେ ଅଭିଯୋଗଗୁଡ଼ିକର ସତ୍ୟତା କଣ, ତାହା ତଦନ୍ତ ପରେ ସ୍ପଷ୍ଟ ହେବ। ସମ୍ପୃକ୍ତ ବିଭାଗ ପକ୍ଷରୁ ଘଟଣାର ତଦନ୍ତ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯିବା ନେଇ ଦାବି ହୋଇଛି।
