Odisha Flood: ନବୀନଙ୍କୁ ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ଟାର୍ଗେଟ! କହିଲେ,”ବନ୍ୟା ସମୟରେ ଗ୍ରାଉଣ୍ଡକୁ ଯାଆନ୍ତୁ”
ଭୁବନେଶ୍ୱର: ଓଡ଼ିଶାରେ ବନ୍ୟା ପରିସ୍ଥିତି ମଧ୍ୟରେ ବିରୋଧୀ ଦଳର ଭୂମିକାକୁ ନେଇ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ପ୍ରତିକ୍ରିୟା ରଖିଛନ୍ତି। ବନ୍ୟା ପ୍ରଭାବିତ ଅଞ୍ଚଳକୁ ଯାଇ ଲୋକଙ୍କ ସ୍ଥିତି ବୁଝିବାକୁ ବିରୋଧୀ ଦଳର ନେତା ନବୀନ ପଟ୍ଟନାୟକଙ୍କୁ ସେ ଆହ୍ୱାନ ଦେଇଛନ୍ତି। ପୂଜାରୀ କହିଛନ୍ତି, ବିରୋଧୀ ଦଳର ପ୍ରତିବାଦ କରିବା ଓ ବିଭିନ୍ନ ପ୍ରସଙ୍ଗ ଉଠାଇବାର ଅଧିକାର ରହିଛି। କିନ୍ତୁ ବନ୍ୟା ଭଳି ଜରୁରୀ ପରିସ୍ଥିତିରେ କେଉଁ ପ୍ରସଙ୍ଗକୁ କେତେବେଳେ ପ୍ରାଥମିକତା ଦିଆଯିବ, ସେନେଇ ବିଚାର କରିବା ଆବଶ୍ୟକ ବୋଲି ସେ କହିଛନ୍ତି।
ପୂଜାରୀଙ୍କ କହିବା ଅନୁସାରେ, ବର୍ତ୍ତମାନ ବନ୍ୟା ପ୍ରଭାବିତ ଅଞ୍ଚଳରେ ରିଲିଫ୍, ଉଦ୍ଧାର ଓ ପୁନରୁଦ୍ଧାର କାର୍ଯ୍ୟ ଉପରେ ଅଧିକ ଗୁରୁତ୍ୱ ଦିଆଯିବା ଦରକାର। ବିଧାନସଭାରେ ବନ୍ୟା ସ୍ଥିତି ନେଇ ଆଲୋଚନା ହେଲେ କେଉଁ ଅଞ୍ଚଳରେ ସରକାରୀ ସହାୟତା ପହଞ୍ଚିନାହିଁ କିମ୍ବା କେଉଁଠାରେ ଅଧିକ ସହାୟତା ଆବଶ୍ୟକ, ତାହା ଚିହ୍ନଟ କରିହେବ ବୋଲି ସେ କହିଛନ୍ତି। ଏହାଦ୍ୱାରା ଆବଶ୍ୟକ ଅଞ୍ଚଳକୁ ଶୀଘ୍ର ସହାୟତା ପହଞ୍ଚାଇବାରେ ସୁବିଧା ହେବ ବୋଲି ମନ୍ତ୍ରୀ କହିଛନ୍ତି। ବର୍ତ୍ତମାନର ବନ୍ୟାରେ ୨୬ଟି ଜିଲ୍ଲା ପ୍ରଭାବିତ ହୋଇଥିବା ନେଇ ସେ ବିଧାନସଭାରେ ତଥ୍ୟ ଦେଇଥିଲେ।
ବନ୍ୟା ପରିସ୍ଥିତିରେ ସରକାର ଓ ବିରୋଧୀ ଦଳ ଉଭୟଙ୍କ ଭୂମିକା ରହିଥିବା ସୁରେଶ ପୂଜାରୀ କହିଛନ୍ତି। ଅନ୍ୟପକ୍ଷରେ, ବିରୋଧୀ BJD ବନ୍ୟା ପରିଚାଳନାକୁ ନେଇ ସରକାରଙ୍କ ଉପରେ ପ୍ରଶ୍ନ ଉଠାଇବ ବୋଲି ପୂର୍ବରୁ କହିଥିଲା। ଏହି ସମୟରେ ଦକ୍ଷିଣ ଓଡ଼ିଶାର ବନ୍ୟା ପ୍ରଭାବିତ ଅଞ୍ଚଳରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜେ ସ୍ଥିତି ସମୀକ୍ଷା କରିବା ସହ ରିଲିଫ୍ ବ୍ୟବସ୍ଥା ନେଇ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
