ଝାଙ୍କରିପାଲି ପ୍ରାଥମିକ ସ୍କୁଲରେ ମଧ୍ୟାହ୍ନ ଭୋଜନ ଚାଉଳ ଚୋରି ଅଭିଯୋଗ: ପ୍ରଧାନଶିକ୍ଷକ ନିଲମ୍ବିତ ।
ବଲାଙ୍ଗୀର,୩୦।୧୦: ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଲକ୍ ଘୁନସର ପଞ୍ଚାୟତ ଅନ୍ତର୍ଗତ ଝାଙ୍କରିପାଲି ପ୍ରାଥମିକ ସ୍କୁଲରେ ମଧ୍ୟାହ୍ନ ଭୋଜନ (Mid-Day Meal) ଚାଉଳ ଓ ଖାଦ୍ୟସାମଗ୍ରୀ ଚୋରି ଏବଂ ଏହାର ଅପବ୍ୟବହାର ନେଇ ଏକ ବଡ଼ ଧରଣର ଅନିୟମିତତା ସାମ୍ନାକୁ ଆସିଛି। ସ୍କୁଲର ପ୍ରଧାନଶିକ୍ଷକ ସୁରେଶ ଚନ୍ଦ୍ର ବାଗ୍ ଚାଉଳ ପ୍ୟାକେଟ୍ ନେଇ ପଳାଉଥିବା ସମୟର ସିସିଟିଭି (CCTV) ଫୁଟେଜ୍ ଭାଇରାଲ ହେବା ପରେ ଏହି ଘଟଣା ଚର୍ଚ୍ଚାକୁ ଆସିଛି।
ଗତ ଅକ୍ଟୋବର ୧୬ ତାରିଖ ଦିନ ସ୍କୁଲର ପ୍ରଧାନ ଶିକ୍ଷକ ସୁରେଶ ଚନ୍ଦ୍ର ବାଗ୍ ଏକ ପ୍ୟାକେଟ୍ ଚାଉଳ ଧରି ଯାଉଥିବାବେଳେ ସ୍ଥାନୀୟ ଲୋକେ ଏହା ଦେଖିବାକୁ ପାଇଥିଲେ। ଏନେଇ ଗ୍ରାମବାସୀ ଓ ଅଭିଭାବକ ମାନେ ତୁରନ୍ତ ଖବର କରିବା ସହ ସିସିଟିଭି କ୍ୟାମେରାରେ ଏହାର ଦୃଶ୍ୟ କଏଦ ହୋଇଥିବା ପ୍ରମାଣ ସାମ୍ନାକୁ ଆଣିଥିଲେ।
କେବଳ ଚାଉଳ ଚୋରି ନୁହେଁ, ବରଂ ସ୍କୁଲରେ ପିଲାମାନଙ୍କୁ ଦିଆଯାଉଥିବା ମଧ୍ୟାହ୍ନ ଭୋଜନରେ ମଧ୍ୟ ଅତ୍ୟନ୍ତ ନିମ୍ନମାନର ଖାଦ୍ୟ ପ୍ରଦାନ କରାଯାଉଥିବା ଅଭିଭାବକମାନେ ଅଭିଯୋଗ କରିଛନ୍ତି। ପିଲାମାନଙ୍କ ଭାଗର ପୂରା ଖାଦ୍ୟସାମଗ୍ରୀ ଏବଂ ଡାଲି-ତରକାରୀ ଠିକ୍ ଭାବରେ ମିଳୁନଥିବା ନେଇ ସେମାନେ କ୍ଷୋଭ ପ୍ରକାଶ କରିଛନ୍ତି।
ଘଟଣା ସମ୍ପର୍କରେ ଗ୍ରାମବାସୀମାନେ ଶିକ୍ଷା ବିଭାଗ ଓ ସ୍ଥାନୀୟ ବିଇଓ (BEO) ଙ୍କୁ ଅବଗତ କରିବା ପରେ ପ୍ରାରମ୍ଭରେ କୌଣସି ଠୋସ୍ ପଦକ୍ଷେପ ନିଆଯାଇ ନଥିଲା। ମାତ୍ର ସିସିଟିଭି ଫୁଟେଜ୍ ଏବଂ ଗ୍ରାମବାସୀଙ୍କ ଦୃଢ଼ ପ୍ରତିବାଦ ପରେ ଶିକ୍ଷା ବିଭାଗ ତତ୍ପରତା ପ୍ରକାଶ କରି ତତକ୍ଷଣାତ୍ ପଦକ୍ଷେପ ଗ୍ରହଣ କରିଛି। ପ୍ରଧାନଶିକ୍ଷକ ସୁରେଶ ଚନ୍ଦ୍ର ବାଗ୍ଙ୍କୁ ଏହି ଅନିୟମିତତା ଅଭିଯୋଗରେ ସସପେଣ୍ଡ (ନିଲମ୍ବନ) କରାଯାଇଛି।
