Mercedes-Benz Electric GLC: ପୁଣେରେ ଆରମ୍ଭ ହେଲା ନୂଆ ଇଲେକ୍ଟ୍ରିକ୍ SUVର ଉତ୍ପାଦନ, ଭାରତରେ ଆଉ ₹୨୦୦ କୋଟି ନିବେଶ କରିବ କମ୍ପାନୀ
ମହାରାଷ୍ଟ୍ର: ମର୍ସିଡିଜ୍-ବେଞ୍ଜ୍ ଇଣ୍ଡିଆ ମହାରାଷ୍ଟ୍ରର ପୁଣେ ସ୍ଥିତ ଚାକଣ ଉତ୍ପାଦନ କେନ୍ଦ୍ରରେ ନୂଆ Electric GLCର ସ୍ଥାନୀୟ ଉତ୍ପାଦନ ଆରମ୍ଭ କରିଛି। କମ୍ପାନୀର ନୂଆ ପିଢ଼ିର ଇଲେକ୍ଟ୍ରିକ୍ ଯାନ ପ୍ଲାଟଫର୍ମ MB.EA-M ଉପରେ ଆଧାରିତ ଏହା ପ୍ରଥମ ମଡେଲ୍, ଯାହା ଭାରତରେ ଉତ୍ପାଦନ ହେଉଛି। ଉତ୍ପାଦନ ଆରମ୍ଭ କାର୍ଯ୍ୟକ୍ରମରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସଙ୍କ ସହ ମର୍ସିଡିଜ୍-ବେଞ୍ଜ୍ AGର ଅଧ୍ୟକ୍ଷ ଓଲା କାଲେନିଅସ୍ ଏବଂ CTO ଡାକ୍ତର ଜୋର୍ଗ ବୁର୍ଜରଙ୍କ ସମେତ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
ଭାରତରେ ନିଜର ଉତ୍ପାଦନ କାର୍ଯ୍ୟକୁ ଆହୁରି ବଢ଼ାଇବା ପାଇଁ କମ୍ପାନୀ ୨୦୨୬ରେ ଅତିରିକ୍ତ ୨୦୦ କୋଟି ଟଙ୍କା ନିବେଶ କରିବା ନେଇ ଘୋଷଣା କରିଛି। ଏହି ନିବେଶ ଉତ୍ପାଦନ କାର୍ଯ୍ୟ, ଡିଜିଟାଲ୍ ବ୍ୟବସ୍ଥାର ଉନ୍ନତି ଏବଂ ନୂଆ ଗାଡ଼ି ମଡେଲ୍ କାର୍ଯ୍ୟକ୍ରମରେ ବ୍ୟୟ ହେବ। ଏହାଦ୍ୱାରା ଭାରତରେ ମର୍ସିଡିଜ୍-ବେଞ୍ଜ୍ର ମୋଟ ନିବେଶ ୩,୨୦୦ କୋଟି ଟଙ୍କାରେ ପହଞ୍ଚିବ।
କମ୍ପାନୀର ଦାବି ଅନୁଯାୟୀ, ଭାରତରେ କାର୍ଯ୍ୟ କରୁଥିବା ଲଗ୍ଜୁରୀ କାର୍ ନିର୍ମାତାଙ୍କ ମଧ୍ୟରେ ମର୍ସିଡିଜ୍-ବେଞ୍ଜ୍ର ଏହି ନିବେଶ ସର୍ବାଧିକ। ନୂଆ Electric GLCର ସ୍ଥାନୀୟ ଉତ୍ପାଦନ ଏବଂ ଅତିରିକ୍ତ ନିବେଶ ଭାରତରେ କମ୍ପାନୀର ଉତ୍ପାଦନ ଓ ବ୍ୟବସାୟିକ ଯୋଜନାକୁ ଆଗକୁ ବଢ଼ାଇବାର ଅଂଶ ଅଟେ।
