Priyank Kharge Controversy: ବିବାଦରେ RSSକୁ ନେଇ ଦେଇଥିବା ପ୍ରିୟଙ୍କ ଖଡ଼ଗେଙ୍କ ଏକ ସୋସିଆଲ ମିଡିଆ ପୋଷ୍ଟ, ବେଙ୍ଗାଲୁରୁ ପୋଲିସ ନିକଟରେ ଅଭିଯୋଗ ଦାଖଲ
କର୍ଣ୍ଣାଟକ: କର୍ଣ୍ଣାଟକର ଗୃହମନ୍ତ୍ରୀ ପ୍ରିୟଙ୍କ ଖଡ଼ଗେଙ୍କ ଏକ ସୋସିଆଲ ମିଡିଆ ପୋଷ୍ଟକୁ ନେଇ ବିବାଦ ଦେଖାଦେଇଛି। RSS ଓ ସଂଘ ପ୍ରମୁଖ ମୋହନ ଭାଗବତଙ୍କୁ ପ୍ରଶ୍ନ କରିବା ପାଇଁ ସେ ଶେୟାର କରିଥିବା ଏକ ଫଟୋ AI ସହାୟତାରେ ଏଡିଟ୍ କରାଯାଇଥିବା ଅଭିଯୋଗ ହୋଇଛି। ଏହି ଫଟୋକୁ ଆଧାର କରି ଗୁଳି ଓ ଗୋଳାବାରୁଦ ଚୋରାଚାଲାଣ ମାମଲାରେ RSS ସହ ଜଡ଼ିତ କିଛି ଲୋକଙ୍କ ସମ୍ପୃକ୍ତି ନେଇ ପ୍ରିୟଙ୍କ ପ୍ରଶ୍ନ ଉଠାଇଥିଲେ। ଏବେ ଏହି ଫଟୋକୁ ନେଇ ତାଙ୍କ ବିରୋଧରେ ବେଙ୍ଗାଲୁରୁ ପୋଲିସ ନିକଟରେ ଅଭିଯୋଗ ଦାଖଲ ହୋଇଛି।
ପ୍ରିୟଙ୍କ ଖଡ଼ଗେ ସୋସିଆଲ ମିଡିଆରେ RSS କର୍ମୀଙ୍କ ଏକ ଫଟୋ ଶେୟାର କରି ମୋହନ ଭାଗବତଙ୍କୁ ପ୍ରଶ୍ନ କରିଥିଲେ। ବିହାର ଓ ହରିୟାଣାରୁ ୪୪,୨୫୦ଟି ଗୁଳି ଜବତ ହେବା ସହ ଜଡ଼ିତ ଏକ ଆନ୍ତଃରାଜ୍ୟ ଗୋଳାବାରୁଦ ଚୋରାଚାଲାଣ ମାମଲାରେ RSS ସହ ଜଡ଼ିତ ଲୋକଙ୍କ ଭୂମିକା କ’ଣ, ତାହା ଜାଣିବାକୁ ସେ ଚାହିଁଥିଲେ। ତେବେ ଏକ ଫ୍ୟାକ୍ଟ-ଚେକ୍ ୱେବସାଇଟ୍ ଦାବି କରିଛି ଯେ, ପ୍ରିୟଙ୍କ ଶେୟାର କରିଥିବା ଫଟୋଟି ମୂଳ ଫଟୋ ନୁହେଁ। ଏହା ପ୍ରଥମେ ଅଭିଷେକ ତିୱାରୀ ନାମକ ଏକ ସୋସିଆଲ ମିଡିଆ ଆକାଉଣ୍ଟରୁ ପୋଷ୍ଟ ହୋଇଥିଲା ଏବଂ ପରେ AI ସହାୟତାରେ ଏଥିରେ ପରିବର୍ତ୍ତନ କରାଯାଇଥିବା ଦାବି କରାଯାଇଛି।
ଉକ୍ତ ୱେବସାଇଟ୍ର ରିପୋର୍ଟ ଅନୁସାରେ, ଫଟୋରେ ଚାରିଜଣ ଅଭିଯୁକ୍ତଙ୍କୁ ଦେଖାଇବା ପାଇଁ AI ବ୍ୟବହାର କରାଯାଇଥିବା ସନ୍ଦେହ ରହିଛି। ଏଥିରେ ଦେଖାଯାଉଥିବା କିଛି ଲୋକଙ୍କ ମୁହଁରେ ସମାନତା ଏବଂ କେତେକଙ୍କ ହାତରେ ଥିବା ଲାଠିକୁ ନେଇ ମଧ୍ୟ ପ୍ରଶ୍ନ ଉଠାଯାଇଛି। ତେବେ ଏହି ଦାବିଗୁଡ଼ିକର ସ୍ୱତନ୍ତ୍ର ଯାଞ୍ଚ ହୋଇଛି କି ନାହିଁ, ତାହା ସ୍ପଷ୍ଟ ନୁହେଁ। ଅନ୍ୟପଟେ, ପ୍ରିୟଙ୍କ ଖଡ଼ଗେ RSS ଓ ବିଜେପିକୁ ଗୋଳାବାରୁଦ ଜବତ ମାମଲାରେ ଜବାବ ମାଗିବା ସହ ଘଟଣାର ଗଭୀର ତଦନ୍ତ ଦାବି କରିଥିଲେ। ଏହା ପୂର୍ବରୁ ଚଳିତ ବର୍ଷ ଜୁନ୍ରେ RSS ବିରୋଧରେ ମନ୍ତବ୍ୟ ଦେବା ସମ୍ପର୍କିତ ଅନ୍ୟ ଏକ ମାମଲାରେ ମଧ୍ୟ ତାଙ୍କୁ ସମନ୍ ଜାରି ହୋଇଥିଲା।
